بۇل مەنىڭ اكەم. وسىدان 2 جارىم اي بۇرىن ايىقپاس دەرت بۇل ومىردەن الىپ كەتپەگەندە اكەم بۇگىن 72 جاسقا تولار ەدى. ول شالعاي اۋىلداردىڭ تۇرعىندارى تازا سۋ ءىشسىن دەپ جەراستى سۋلارىنىڭ سىزباسىن سالعان. سونداي-اق ءقازىر باس ينجەنەر-ديزاينەر بازاربەك جۇمابەكتىڭ جوباسى ارقىلى جۇزەگە اسقان قۇدىقتاردان سۋ ىشكەن ءاربىر ادام اكەمە ىشتەي العىس ايتىپ جۇرەدى. مەن اكەمنىڭ تۋعان كۇنىنە وراي وعان حات جازىپ وتىرمىن. ونىڭ بۇل حاتتى وقيتىنىنا بەك سەنىمدىمىن. 

اكەشىم، ەگەر ءسىز مەنى ەستىپ، كورىپ وتىرساڭىز، ءسىزدى ماقتان تۇتاتىنىمدى ءبىلىڭىز. ءبىز ءسىزدى قاتتى جاقسى كورەمىز. انام ەكەۋىڭىز مەنى ادال، ادامگەرشىلىگى مول ادام قىلىپ تاربيەلەدىڭىزدەر. "ەلگە پايداڭ ءتيسىن، ادامدارعا پايداڭ ءتيسىن" دەپ ۇيرەتتىڭىزدەر. مەن سىزدەر ارتقان ءۇمىتتى اقتاۋعا تىرىسامىن. 

اكە ەسىڭىزدە مە، ءسىز ماعان ستۋدەنت كەزىمدە "ءبىراز جىلداردان كەيىن سەن ارقىلى باسقا ادامداردىڭ تاعدىرى شەشىلەتىن كۇن تۋادى. سول كەزدە سەن زاڭعا باعىناتىن، ەلگە قىزمەت ەتىپ، ادىلەتتى تۋ ەتكەن ازامات بولۋىڭ كەرەك. باسقا ادامدارعا ەمەس زاڭعا عانا باعىنۋ – سەنىڭ باستى مىندەتىڭ. ەگەر سەن ەلىڭدى سۇيسەڭ، حالقىڭدى سۇيسەڭ - مەنىڭ ءۇمىتىمدى اقتاعانىڭ"،- دەپ ەدىڭ. مەن بۇل سوزدەرىڭدى ەشقاشان ۇمىتپايمىن. 

سىزگە ەڭ باستى ءسوزدى ايتايىن، اكە! ءسىز اسپاندا مەنى ماقتان تۇتاتىن بولاسىز. مەن زاڭعا قىزمەت ەتۋگە، حالىققا قولدان كەلگەنشە كومەك كورسەتۋگە بار عۇمىرىمدى ارناپ كەلەمىن. بۇعان وكىنبەيمىن دە. مەن بۇل مىندەتتى ءومىر بويى زور ماقتانىشپەن ورىنداۋعا ءازىرمىن. جەر ماسەلەسى اسا كۇردەلى ەكەنىن بىلەمىن. ءسىز ءاردايىم ماعان ادال بول جانە اباي بول دەپ ايتاتىنسىڭ. مەن بارىنشا ساقپىن ءارى ادالمىن. مەنەن كومەك سۇراعانداردىڭ بارىنە قولىمنان كەلگەنشە قول ۇشىن سوزۋدامىن. سەنىڭ ءار جازبامدى وقىپ، قانداي ىستەر اتقارىپ جاتقانىمدى قاداعالىپ وتىرعانىڭدى بىلەمىن، سەزەمىن. ءقازىر حاتتى كوزىمنىڭ جاسىن تىيا الماي جازىپ وتىرمىن. بۇل حاتتى قالاي وقيتىنىڭنان دا حابارسىزبىن. بۇل حاتتى قالاي جىبەرسەم بولادى؟ ۇشاقتار ۇشپايتىن، پويىزدار بارا المايتىن جاققا... ءبىراق تۋعان كۇنىڭدە بۇل حاتتى وقيتىنىڭا سەنەمىن. 

اكەشىم، بىلەسىز بە، ەڭبەگىڭىزدىڭ جەمىسىن كورىپ ۇلگەرگەنىڭىزگە قۋانىشتىمىن. قۋانىشتى جيىنداردا، تۋعان-تۋىستىڭ ورتاسىندا مەن تۋرالى اڭگىمە قوزعالعان كەزدە مەنى ماقتان تۇتاتىنىڭىزدى ءجيى ايتاتىن ەدىڭىز. كەيدە جاي عانا ماقتايتىنسىز. ءبىراق بۇل مەن ءۇشىن وتە ماڭىزدى ەدى. مەن ءسىزدىڭ ءۇمىتىڭىزدى اقتاعانىما ريزامىن. ءسىزدى دەرتتەن قورعاپ قالا الماعانىمىز ءۇشىن كەشىرىم سۇرايمىن. مەن، انام، جازيرا جانە اعام بار امالدى قاراستىردىق. قولىمىزدان كەلگەنىن جاساپ باقتىق، الايدا بۇل قۇدايدىڭ قالاۋى بولدى. ءسىزدىڭ ورنىڭىز ويسىراپ قالدى. ءسىزدىڭ جوقتىعىڭىز قاتتى بىلىنەدى. تۇسىمدە ءسىزدى ءجيى كورەمىن. مۇمكىن ۇنەمى قاسىمىزدا ەكەنىڭىزدى ەسكەرتكەنىڭىز شىعار. ءسىز مەنىمەن ماقتانعانسىز، ءالى دە ماقتان تۇتاتىن بولاسىز! مەن ءسىزدى جاقسى كورەمىن!

تانىمال زاڭگەر باقىتجان بازاربەكتىڭ فەيسبۋك پاراقشاسىنان الىنعان

اۋدارعان: اسەل بولات قىزى