سەنات دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا رەسەيدىڭ فەدەرالدى جيىنى فەدەراسيا كەڭەسىنىڭ قورعانىس جانە قاۋىپسىزدىك كوميتەتى مەن حالىقارالىق ىستەر كوميتەتىنىڭ توراعالارىمەن كەزدەسۋ كەزىندە رەسەيلىكتەرگە امال مەرەكەسىن ءتۇسىندىرىپ، ازىلدەستى دەپ جازادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

قورعانىس جانە قاۋىپسىزدىك كوميتەتىنىڭ ءتوراعاسى ۆيكتور بونداريەۆ ارىپتەسى داريعا نازاربايەۆانى وتكەن 8 ناۋرىز – حالىقارالىق ايەلدەر كۇنىمەن قۇتتىقتادى.

"ەشتەن كەش جاقسى دەگەن. سونداي-اق، قۇتتىقتاۋعا بۇگىنگى كۇن دە جامان ەمەس دەپ سانايمىز. تاريحتان بىلەتىنىمدەي، بۇگىن قازاقستاندا جاڭا جىل باستالادى"، - دەدى بونداريەۆ.

وسى كەزدە سوزگە ارالاسقان داريعا نازاربايەۆا رەسەيدەن كەلگەن ارىپتەستەرىنە بۇگىن كۇن قانداي مەرەكە ەكەنىن ءتۇسىندىردى.

بۇگىن – كورىسۋ كۇنى، بۇل ءبىزدىڭ ءداستۇرلى مەرەكەمىز، ەرتەدەن تويلانادى. ءبىزدىڭ اتا-بابالارىمىز كوشپەلى ءومىر سالتىن ۇستانعانىن بىلەسىزدەر. سول كەزدە قىتىمىر قىستا ءبىر-بىرىن كورە الماعان. كۇن جىلىنىپ، قار ەري باستاعان كەزدە، قىستان امان-ەسەن شىققانىن تويلاپ، بىر-بىرىمەن قۇشاقتاسىپ كورىسكەن"، - دەدى سەناتور.

"ءبىز دە قىستان امان شىقتىق. مىندەتتى تۇردە قۇشاقتاسىپ كورىسەمىز"،- دەپ كۇلدى بونداريەۆ.

"وسى ەكى كۇن بويى قۇشاقتاسامىز. ءسىز دە، ءبىز دە قىستان امان-ەسەن شىقتىق. بىزدە بيىل 45 گرادۋسقا دەيىن اياز بولدى"، - دەپ ازىلدەدى نازاربايەۆا.