رەسەيلىك تۇرعىندار قىزىنىڭ ۆيچ ينفەكسياسىنا شالدىققانىن دارىگەرلەردەن جاسىرىپ قالعان دەپ جازادى Qamshy.kz اقپارات اگەنتتىگى amp.kp.ru سايتىنىڭ دەرەگىن نەگىزگە الىپ.  12 جاستاعى كىشكەنتاي قىزدىڭ سوڭعى كۇندەرى تۋرالى ادام شوشىرلىق مالىمەتتەر پايدا بولدى. 

اتا-انا اۋىر دەرتكە شالدىققانىن تۋعان قىزىنا دا ايتپاپتى. ولار اۋىر دەرت تۋرالى ەستۋ قىزىنىڭ پسيحيكاسىنا قاتتى اسەر ەتەدى دەپ قورىققان. سول سەبەپتى اتا-اناسى يننا (ەسىمى وزگەرتىلگەن - رەد.) 14 جاسقا تولعاننان كەيىن اۋىر دەرتى تۋرالى تولىعىراق ايتىپ، تۇسىندىرەمىز دەپ ويلاپتى. الايدا يننا ءوزىنىڭ نە ءۇشىن قاتتى قينالعانىن بىلمەي قايتىس بولدى.   

اقپان ايىنىڭ سوڭىندا يننانىڭ دەنە قىزۋى قاتتى كوتەرىلە باستايدى. اناسى جەدەل جاردەم شاقىرعانىمەن، يننانىڭ اكەسى قىزىن ۇيدەن ەمدەيتىنىن ايتىپ، اۋرۋحاناعا جاتقىزۋعا كەلىسىم بەرمەگەن. كەيىن دەنە قىزۋى تومەندەمەگەن سوڭ يننانى اۋرۋحاناعا جاتقىزادى. 

موروزوۆسك اۋرۋحاناسىندا ۆيچ-كە شالدىققان يننا كوز جۇمدى. ول جوعارى تەمپەراتۋرامەن اۋرۋحاناعا جەتكىزىلگەن. دارىگەرلەر يننانىڭ دەنە تەمپەراتۋراسىن 37-گە تۇسىرگەن. الايدا ول ايىعىپ كەتە المادى.     

يننانىڭ اتا-اناسى اۋرۋحاناعا ەمدەلۋگە ارنالعان انىقتامانى جەكە دارىگەرىنەن العان. سەبەبى ونىڭ جەكە دارىگەرى سول ۋاقىتتا ەڭبەك دەمالىسىندا بولىپتى. سونداي-اق اۋرۋحاناعا اكەلگەن كەزدە يننانىڭ مەديسينالىق قۇجاتى بولماپتى. ال اتا-اناسى دارىگەرلەرگە اسقىنعان دەرت تۋرالى جاق اشپاعان. 

يننا ءۆيچ-تى جۇقتىرعان ادامدارعا ارنالعان دارى-دارمەكتەردى ىشكەن. سونداي-اق اۋرۋحانادا دا سول دارىلەردى كۇنىنە 2 مەزگىل ءىشىپ ءجۇردى. الايدا دارىگەرلەر يننانىڭ اسقىنعان دەرتى تۋرالى بىلمەگەندىكتەن، بۇل دارىلەرگە نازار اۋدارماعان كورىنەدى. 

يننانىڭ اكە-شەشەسى دە ۆيچ جۇقتىرعان. يننا موروزوۆسك اۋرۋحاناسىندا ەم قابىلداي باستايدى. ناۋقاس اسقازانى اۋىراتىنىن ايتىپ، شاعىمدانادى. سول كەزدە دارىگەرلەر گاستريت بولۋى مۇمكىن ەكەنىن ايتقان. قانداي ەم-دوم قولدانسا دا يننا ساۋىعا قويمادى. 

يننا ۇنەمى اناسىنا حابارلاسىپ، ءوزىنىڭ حال-جاعدايىن ايتاتىن. بىردە يننا اناسىنا "اناشىم، مەن كۇيىپ بارامىن. مەن اۋىر حالدەمىن"، دەپ حابارلاما جازىپ جىبەرەدى. بۇل حابارلامانى وقىعان اناسى "شالبارىڭدى شەش" دەپ جاۋاپ جازعان. الايدا بۇل حابارلامانى وقىعان يننا جاۋاپ بەرىپ ۇلگەرمەيدى. اناسى بىردەن قىزىنا حابارلاسادى. الايدا يننا تەلەفون تۇتقاسىن كوتەرۋگە شاماسى كەلمەيدى. كەيىن دارىگەرلەرگە حابارلاسقان كەزدە قىزىنىڭ جانساقتاۋ بولىمىندە جاتقانىن ەستيدى. دارىگەرلەر جانساقتاۋ بولىمىندە جاتقان ناۋقاس تۋرالى ەشقانداي اقپارات بەرە المايتىنىن ايتقان سوڭ اتا-اناسى اۋرۋحاناعا كەلەدى. الايدا اكە-شەشەسى كەلگەن بويدا يننا و دۇنيەلىك بولادى. 

12 جاستاعى قىزدىڭ ولىمىنە قاتىستى تەكسەرۋ جۇمىستارى جۇرگىزىلىپ جاتىر. بارلىق ىسكە دارىگەرلەردى كىنالاۋعا بولمايدى. يننانىڭ شىن مانىندە بۇيرەگى اۋىرعان جانە ۆيچ دەرتىنە شالدىققانى بەلگىلى بولدى. دارىگەرلەر اۋىر دەرتى جايلى بىلمەگەندىكتەن 12 جاستاعى قىزعا قاجەتتى كومەكتى كورسەتە المادى. سونداي-اق يننانىڭ ولىمىنە ۆيچ-كە قارسى دارى-دارمەكپەن باسقا دارىلەردى ءبىر ۋاقىتتا ىشكەندىگى سەبەپ بولۋى مۇمكىن.