سەناتور داريعا نازاربايەۆا دايش (قازاقستاندا تىيىم سالىنعان) لاڭكەستىك ۇيىمىنىڭ قوزعالىسى ءقاۋىپ ءتوندىرۋى مۇمكىن ەكەنىن ايتتى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنىڭ دەرەگىنە سۇيەنىپ.

"شىنىندا، ءبىز استانا پروسەسىنىڭ سيرياداعى جاعدايدى رەتتەۋگە قوسقان ۇلەسىن ماقتان تۇتامىز. وعان قوسا، رەسەيدىڭ سيرياداعى پروبلەماعا ارالاسۋىنىڭ ارقاسىندا دايش-تىڭ سوڭعى قورعانى عانا قالدى. الداعى ۋاقىتتا بۇل ماسەلە شەشىمىن تابادى دەگەن ويدامىز"، - دەدى نازاربايەۆا.

ونىڭ ايتۋىنشا، لاڭكەستەردىڭ قاي باعىتقا ويىساتىنى ماڭىزدى سۇراق بولىپ تۇر.

"ولار كەلەسى ايماق رەتىندە ءبىزدىڭ جەرلەرگە جانە ورتا ازياعا ويىسپاقشى ما؟ ءبىز رەسەيدىڭ اۋعان شەكاراسىندا جاساعان رەتتەۋ جۇمىسىن جوعارى باعالايمىز. دايش لاڭكەستەرى اۋعانستاننىڭ سولتۇستىگىنە باعىت الۋدى جوسپارلاپ جاتقانىن، ودان ءارى ورتالىق ازياعا جىلجىماقشى دەگەن اقپارات بار. بۇل جاعداي ءبىزدى مازالايدى"، - دەدى داريعا نازاربايەۆا.

7 اقپاندا اقش پرەزيدەنتى دونالد ترامپ دايش لاڭكەستىك ۇيىمىمەن كۇرەسۋ ناۋقانىندا ولاردىڭ 100 باسشىسى مەن ون مىڭعا جۋىق اسكەرى جويىلعانىن مالىمدەدى.  

ۇسىنعان: نازەركە لابيحان