كەشەگى كوپبالالى انالارمەن كەزدەسكەننەن كەيىنگى تۇيگەن ويىم. 
تيپولوگياسى.
نەگىزىنەن ءۇش اۋدان وكىلدەرى: اۋەزوۆ، الاتاۋ، تۇركسىب.
96-97 پايىزى ءوز قانداستارىمىز.
پروبەمالارى.
1. انالاردىڭ ءبىرازى زاڭداردان بەيحابار، اقپاراتى از. 
ارينە بالا باعۋ، ءوسىرۋ وڭاي دۇنيە ەمەس. ءار بالاعا ۋاقىت ءبولۋ، تاماعىن بەرۋ، كىرىن جۋۋ، ساباعىن قاراۋ - ۋاقىت. سوندىقتان بولار، ولاردىڭ گازەت وقىپ، ينتەرنەت قاراۋعا ۋاقىتى دا بولماۋى بەك مۇمكىن. 
2. انالاردىڭ ءبىرازى جوعارىدا ايتىلعان سەبەپكە بايلانىستى وزدەرىنە تيەسىلى كومەك پەن جاردەم تۇرلەرىن المايدى، ول تۋرالى ەستىمەگەن دە.
قاراپايىم اڭگىمەدە انا كومەكتى الدىڭىز با - جوق، بىلمەپپىن، بالاڭىز مەكتەپتە ىستىق تاماق ىشە مە - جوق، كىتاپ-داپتەر اقشاسىن الا ما - جوق... تاعىسىن تاعى. 
3. ەڭ قيىن كەزەڭ - بالالاردىڭ كىشكەنتاي كەزى. وتاعاسى جۇمىسسىز قالىپ جاتسا، جاراقات السا - ناعىز تراگەديا. 
وكىنىشتىسى، قابىلداۋعا كەلگەندەردىڭ اراسىندا جەسىر دە، اجىراسقاندار دا بار. ءتورت بالاسىن تاستاپ كەتكەن ەركەكتەر دە بولادى ەكەن. سولاردىڭ اليمەنتىن الا الماي، دال بوپ جۇرگەن وتباسىلار دا جەتەرلىك.
4. الماتىعا جاڭادان قوسىلعان، ەش تىزىمدە جوق، الەۋمەتتىك باعدارلامادان ادا تالاي وتباسى بار. سولاردى زاڭداستىرۋ، تىزىمگە الۋ ماسەلەسى.
5. كەلگەن انالاردىڭ ءبىرازى - ەشتەڭەنىڭ كەرەگى جوق، باسپانا ماسەلەسى شەشىلسە بولدى دەپ تە جاتىر. قانشا جىلدان بەرى تىزىمدە، كەزەكتە تۇرمىز دەپ الاڭداۋدا. 
تىزىمدەگى 1276 وتباسى بولەك شىعارىلىپ، ورتاق كەزەكتەن تىس قامتىلادى دەپ، ءجونىن ايتىپ جاتىرمىز. 
تاعى ءبىر ماسەلە - مەكتەپ پەن ساديك كەزەگى. 
...
ماسەلەنى شەشۋ جولدارى:
1. بىزگە ونداعان مەملەكەتتىك ەمەس الەۋمەتتىك ۇيىمدار، انالار كلۋبى مەن ۆولونتەرلەر كەرەك. ۇيىندە بالامەن وتىرىپ، شىعا المايتىن انالار بار. سولارمەن جۇمىس ىستەۋ، ءجون سىلتەۋ، زاڭدى ءتۇسىندىرۋ، قاعازىن جيناۋعا قول ۇشىن بەرىپ، ءتيىستى كومەك-جاردەم تۇرلەرىنە ىلىكتىرۋ ءۇشىن بۇنداي ۇيىمدار اۋاداي قاجەت. سەنىمسىزدىك تە جوق ەمەس. انالار وزدەرى قاتارلى، ءوز ءومىرىن تۇسىنەتىن ادامدارعا كوبىرەك سەنەتىنى انىق. ءومىر كورگەن، تاجىريبەسى مەن قايراتى بار ادامداردى وسىعان كوپتەپ تارتسا.
2. ورتاق بازالار مەن دەرەك كوزدەرى. دۇرىس اقپارات الۋ قيىن. ءبارى جان-جاقتا شاشىراپ جاتىر. كوپبالالى وتباسىلاردىڭ ءارقايسىسىن پاسپورتتاپ، ورتاق بازا جاساۋ اۋاداي قاجەت. بالانىڭ ءوسۋى ونىڭ مەملەكەتتىك، قوعامدىق كومەك پەن ىزگىلىكتەر ساتىسىمەن قامتاماسىز ەتىلۋى ءتيىس. 
قالادا كوپبالالى انالار پاتەر كەزەگىنەن بولەك الىنىپ، ارنايى كەزەكپەن قامتىلادى دەپ جاتىر. بالكىم، كوپبالالى وتباسىلار ءۇشىن مەكتەپ، بالاباقشا، ت.ب. قاتىستى بولەك كەزەك پەن ءتىزىم جاساۋ كەرەك پە دەپ قالدىم. 
3. اقپارات الۋ، تاراتۋ جۇيەسى مۇلدەم ءالسىز. اقپارات تەك اياعىمەن ءجۇرىپ، دىكىلدەپ ەسىك قاققانداردا عانا بولماۋى شارت. كەرىسىنشە، اقپارات انالاردىڭ سوڭىنان ىلەسىپ ءجۇرۋى مىندەت. بالاباقشا، مەكتەپ، الەۋمەت، اۋرۋحانا جۇيەلەرى تەك ءوز مىندەتىن اتقارۋشى عانا ەمەس، ورتاق جۇيەنىڭ، ورتاق جۇمىستىڭ بولشەگى بولسا دۇرىس. انالارعا قامقورلىق ورتاق جۇمىس پەن پارىز. بارلىق جۇيە مەن مەمورگان ءبىر ماقساتقا، ءبىر باعىتقا قىزمەت ەتسە قۇبا-قۇپ. 
ءاربىر انالارعا ءبىر ورتاق ەلەكتروندى سەرۆيس كەرەك سياقتى. سونىمەن قاتار سول ەلەكتروندى قىزمەتتەردى ءتيىمدى قولدانۋعا ۇيرەتۋ دە قاجەت. كەشە بىر-ەكى انالار سوننىڭ قاعازىن الۋ ءۇشىن ول جاققا بارماي اق، ۇيالى تەلەفون ارقىلى الۋدى ۇيرەنىپ جاتىر، مىسالى. 
...
باستى ماسەلە، ارينە، ادام فاكتورى. الەۋمەتتىك ماسەلەمەن اينالىساتىن ورگاندار مەن قىزمەتتەرگە اقجۇرەك، مەيىرىمدى، ءومىر كورگەن، شاپاعاتى مول ادامدار كەلگەنى دۇرىس. كوپتەگەن ماسەلە مىنەزگە دە بايلانىستى ەكەن. انانى بىزگە نەگە ايتپاعان، مىنانى نەگە كورسەتپەدى، تۇسىندىرمەدى دەگەن اڭگىمە كوپ.
جاقىندا ۆشە دەگەن رەسەي عىلىمي ورتالىعىنىڭ بۇل ەلدەگى مەكتەپتەگى مۇعالىمدەردىڭ ءبىرازى وقۋشى ءۇشىن ءقاۋىپتى دەگەن دەرەگىن وقىدىم. ياعني، كاسىبي اۋرۋعا - جۇمىستا كۇيىپ كەتۋ (ۆىگورانيە) - شالدىققان دەپ جاتىر. الەۋمەت سالاسىندا مۇندايلاردىڭ سانى ءبىراز بار. وسىنى دا ويلاستىرۋ قاجەت. جاقسى زەرتتەۋلەر اۋاداي قاجەت دەپ ۇقتىم.

ايدوس سارىمنىڭ Facebook-تەگى پاراقشاسىنان الىندى

ۇسىنعان: گۇلىم جاقان