بيىل «التىن قالام» ادەبي جۇلدەسىنە 10 جىل تولىپ وتىر. جاڭا ماۋسىمعا جۇمىستار 15 ناۋرىزدان 15 قىركۇيەككە دەيىن قابىلدانادى. «التىن قالام 2019» ادەبي جۇلدەسىنىڭ باس سەرىكتەسى - باۋىرجان وسپانوۆ جەتەكشىلىك ەتەتىن «ZHERSU» ينۆەستيسيالىق-وندىرىستىك كورپوراسياسى، باس اقپاراتتىق سەرىكتەسىمىز «رۋسسكوە راديو».
بيىل جوبا HALYK GROUP، سونداي-اق، قازاقستان باسپا ءسوز كلۋبى، "كتك"، "31 تەلەارنا"، Dombyra TV، "مەلومان" ساۋدا جەلىسى، «Qamshy.kz» اقپارات اگەنتتىگى، "Massaget.kz" جاستار پورتالى، "ايقىن"، "جاس الاش" باسىلىمدارىنىڭ قولداۋىمەن وتەدى.
بايقاۋعا قازاق جانە ورىس تىلىندە جازىلعان جۇمىستار ناۋرىزدىڭ 15-نەن باستاپ، قىركۇيەكتىڭ 15-نە دەيىن قابىلدانادى. وقىرماندار قازان ايىنىڭ 1-نە دەيىن داۋىس بەرە الادى. ادەبي تۋىندىلاردى ۇيىمداستىرۋ كوميتەتىنىڭ adebiet2014@gmail.com، kenze2002@mail.ru ەلەكتروندىق پوشتاسىنا جولداۋعا بولادى. كونكۋرس جايلى تولىق مالىمەتتى جۇلدەنىڭ www.akalam.kz رەسمي سايتىنان بىلە الاسىزدار. سايىسقا تۇسكەن بارلىق شىعارما اتالعان سايتتا ورنالاستىرىلادى.
وقىرماندار تومەندەگى اتالىمدار بويىنشا داۋىس بەرەدى:
- دارابوز. جىلدىڭ ۇزدىك بالالار جانە جاسوسپىرىمدەر شىعارماسى
- جىلدىڭ ۇزدىك پوەزياسى
- جىلدىڭ ۇزدىك پروزاسى
- ەسەنجول دومبايەۆ اتىنداعى جىلدىڭ ۇزدىك ساتيراسى
- جىلدىڭ ۇزدىك فانتاستيكا جانە دەتەكتيۆ شىعارماسى
- جىلدىڭ ۇزدىك كينوسەنارييى جانە دراماتۋرگياسى
- ەسەنقۇل مامان ۇلى اتىنداعى سىيلىق قازاق تىلىندە جازىلعان ۇزدىك رومانعا بەرىلەدى.
العاشقى كەزەڭدە شىعارمالار www.akalam.kz ۆەب-سايتىندا ىرىكتەلەدى. وقىرماندار وزىنە ۇناعان جۇمىسقا داۋىس بەرە الادى. www.akalam.kz سايتىنداعى ونلايىن-داۋىس بەرۋ 6 اي بويى جالعاسادى. داۋىس بەرۋ اياقتالعان سوڭ، ءار اتالىم بويىنشا 5 شىعارما تاڭداپ الىنادى. سايىستىڭ ەكىنشى كەزەڭىنە وقىرماندار تاراپىنان ەڭ كوپ ۇپاي جيناعان شىعارمالار وتەدى. ودان كەيىن جۇلدەنى ۇيىمداستىرۋشىلار مەن جوبا سەرىكتەستەرىنەن قۇرالعان قازىلار ءاربىر نوميناسيا بويىنشا جەڭىمپازداردى انىقتايدى. وتكەن جىلدارداعىداي سايىس بارىسىندا شىعارما اۆتورلارى كورسەتىلمەيدى.
ەسەنقۇل مامان ۇلى اتىنداعى باس جۇلدە - 1 000 000 (1 ملن) تەڭگە قازاق تىلىندە جازىلعان ۇزدىك روماننىڭ اۆتورىنا بۇيىرادى. سونىمەن قاتار بالالار ادەبيەتىنە ارنالعان "دارابوز" بايقاۋىنىڭ جەڭىمپازىنا - 1 000 000 (1 ملن) تەڭگە بەرىلەدى. قارجىلاي سىيلىقتاردى «ZHERSU» ينۆەستيسيالىق-وندىرىستىك كورپوراسياسىنىڭ جەتەكشىسى باۋىرجان وسپانوۆ تاعايىنداپ وتىر.
«التىن قالام 2019» ادەبي جۇلدەسى جەڭىمپازدارىنىڭ ەسىمدەرى كۇزدە وتەتىن ماراپاتتاۋ شاراسىندا جاريالانادى.
كەنجە جۇمان ۇلى، «التىن قالام» ادەبي جۇلدەسىن ۇيىمداستىرۋشىلاردىڭ ءبىرى: «التىن قالام» جۇلدەسى 2009 جىلى قۇرىلدى. ارينە، ول كەزدە بايقاۋدىڭ 10 جىلدىعىن اتاپ وتەمىز، بايقاۋ جىل سايىن ۇيىمداستىرىلاتىن ءداستۇرلى بايگەگە اينالادى دەپ ويلاعان جوقپىز. الىس-جاقىن شەتەلدىك اۆتورلار ءوز شىعارمالارىن جونەلتىپ، «التىن قالامعا» قىزىعۋشىلىق تانىتادى دەگەن «ءۇش ۇيىقتاساق، تۇسىمىزگە كىرمەگەن». كىتاپ دۇكەندەرىنە كىرگەندە بايقاۋ جەڭىمپازدارىنىڭ كىتاپتارىن كورىپ مارقايىپ قالامىز. «التىن قالام» حالىقتىق بايگەگە اينالعانىن، اۆتورلارىمىزدىڭ قۇرمەتكە بولەنىپ جاتقانىن ماقتان تۇتامىز.
كونكۋرس جايلى:
بالالار جازۋشىلارىنا ارنالعان «دارابوز» بايقاۋى 2006 جىلى «ZHERSU» ينۆەستيسيالىق-وندىرىستىك كورپوراسياسىمەن بىرلەسىپ اشىلدى. باستى ماقسات – بالالار جازۋشىلارىنىڭ مارتەبەسىن كوتەرۋ جانە بالالار ادەبيەتىنىڭ ساپاسىن ارتتىرۋ.
«دارابوز» بايقاۋىنا 11 جىل ىشىندە شامامەن 1000 اۆتور بايگەگە قاتىستى. ۇزدىك شىعارمالاردان جيناقتالعان «كاۋسار بۇلاق» جانە «چيستىي رودنيك» كىتاپتارى وقىرمان نازارىنا ۇسىنىلدى. جارىق كورگەن كىتاپتار ەلىمىزدەگى مەكتەپتەرگە جانە كىتاپحانالارعا تەگىن تاراتىلدى. بۇل جيناقتار وقۋشىلار مەن ۇستازدارعا، تاربيەشىلەر مەن اتا-انالارعا جانە جالپى وقىرمان قاۋىمعا ارنالعان. بۇل بايقاۋ 2017 جىلدان بەرى «التىن قالام» ادەبي جۇلدەسى اياسىندا وتكىزىلە باستادى.
«التىن قالام» ادەبي جۇلدەسى
قازاق ادەبيەتىنىڭ بۇگىنى مەن بولاشاعىنا بەي-جاي قاراي المايتىن، قوعامدىق قىزمەتتىڭ ءار سالاسىندا ەڭبەك ەتىپ جۇرگەن دوسىم ساتپايەۆ، قۋات دومباي، كەنجە جۇمان ۇلى، راسۋل جۇمالى جانە ايدوس سارىم سەكىلدى ازاماتتار اقىلداسا كەلىپ، 2009 جىلى «التىن قالام» ادەبي جۇلدەسىن وتكىزۋ تۋرالى باستاما كوتەرگەن بولاتىن. ماقسات – ەلىمىزدىڭ رۋحاني-مادەني دامۋىنا قازاقستان ازاماتى رەتىندە ءوز ۇلەسىن قوسۋ جانە جاس دارىندار مەن جاڭا ەسىمدەردىڭ قالىڭ جۇرتقا تانىلۋىنا ىقپال ەتۋ. كەيىن ۇيىمداستىرۋشىلار قاتارىن ەلىمىزگە بەلگىلى تۇلعالار: ارمان شورايەۆ، نۇرجان مۇحامەدجانوۆا تولىقتىردى.
ايتا كەتەتىن جايت، قازىلار قۇرامىندا كاسىبي قالامگەرلەر، ادەبيەتشىلەر جوق. كوپتىڭ تالقىسىنا ۇسىنىلعان ادەبي شىعارمالاردىڭ اۆتورى دا كورسەتىلمەيدى. مۇنداي تالاپتار جۇلدەنىڭ ءادىل وتۋىنە كەپىل بولا الادى. «التىن قالام» بايقاۋ جۇمىستارىنا جازۋشىلار ەمەس، وقىرماندار باعا بەرەتىن قازاقستانداعى ءبىرىنشى ادەبي جۇلدە.
ۇيىمداستىرۋ كوميتەتىنىڭ ەلەكتروندىق مەكەن-جايى:
e-mail: adebiet2014@gmail.com
87013366053 WhatsApp
پىكىر قالدىرۋ