كەشە تۇركىستان وبلىستىق ءماسليحاتىنىڭ كەزەكتەن تىس حححIII سەسسياسى ءوتتى، دەپ حابارلايدى Qamshy.kz اقپارات اگەنتتىگى.

وندا قازاقستان پرەزيدەنتى قاسىم-جومارت توقايەۆتىڭ پارلامەنت پالاتالارىنىڭ بىرلەسكەن وتىرىسىندا تۇڭعىش پرەزيدەنتتىڭ ەسىمىن ماڭگىلىككە قالدىرۋ ءۇشىن وبلىس ورتالىقتارىنداعى نەگىزگى كوشەلەردىڭ ءبىرىن نۇرسۇلتان نازاربايەۆتىڭ ەسىمىمەن اتاۋ تۋرالى باستاماسى قارالدى. سەسسيا شەشىمى بويىنشا  وبلىس ورتالىعىنداعى اربات داڭعىلىنا نۇرسۇلتان نازاربايەۆ ەسىمى بەرىلۋ تۋرالى ۇسىنىس ايتىلىپ، ول دەپۋتاتتار تاراپىنان قولداۋ تاپتى.

تۇركىستان قالاسىنداعى ءىرى كوشەلەردىڭ ءبىرى – اربات داڭعىلىنا نۇرسۇلتان نازاربايەۆتىڭ ەسىمى بەرىلدى.  

بۇل داڭعىل بەكزات ساتتارحانوۆ داڭعىلىنىڭ قيىلىسىنان باستاپ، تاۋكە حان داڭعىلى مەن ءنازىر تورەقۇلوۆ كوشەسىنىڭ قيىلىسىنا دەيىنگى ارالىقتى قامتيدى.

ايتا كەتەيىك، 2018  جىلدىڭ ماۋسىم ايىندا ۇلت كوشباسشىسى نۇرسۇلتان نازاربايەۆ وڭتۇستىك قازاقستان وبلىسىن تۇركىستان وبلىسى دەپ قايتا قۇرۋ تۋرالى جارلىق شىعارعان بولاتىن. بۇگىنگى تاڭدا تۇركىستان قالاسى وبلىس ورتالىعى رەتىندە قارقىندى تۇردە دامىپ كەلەدى. قالادا اۋقىمدى قۇرىلىس جۇمىستارى جۇرگىزىلىپ جاتىر.

ۇسىنعان: نازەركە لابيحان