بۇگىن قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ جۇمىس ساپارىندا تۇركىستان وبلىسىنىڭ اتقارۋشى ورگان باسشىلارىمەن، ارداگەرلەر جانە زيالى قاۋىم وكىلدەرىمەن كەزدەستى. قازاقستان پرەزيدەنتى الدىمەن جۇرتشىلىقتى مەرەكەمەن قۇتتىقتادى دەپ حابارلايدى Qamshy.kz اقپارات اگەنتتىگى.
«ەڭ الدىمەن، بارشاڭىزدى ۇلىستىڭ ۇلى كۇنىمەن شىن جۇرەكتەن قۇتتىقتايمىن! بيىلعى 19 ناۋرىزدا، كوكتەمنىڭ شۋاقتى كۇنىندە ءبارىمىز ەلىمىزدەگى تاريحي وقيعاعا كۋا بولدىق. مەملەكەت بولاشاعىن ويلاعان تۇڭعىش پرەزيدەنتىمىز ماڭىزدى شەشىم قابىلدادى. وسىنداي سىندارلى كەزەڭدە ەلباسىن جانە مەنى قولداعان بارشا حالقىما ريزاشىلىعىمدى بىلدىرەمىن.
ءبىز بيلىكتىڭ اۋىسۋىن تۇراقتى جاعدايدا جۇزەگە اسىرامىز. مەنىڭ نەگىزگى ماقساتىم – ەلباسىنىڭ ستراتەگيالىق باعىتىنىڭ ساباقتاستىعىن قامتاماسىز ەتۋ»، – دەگەن قاسىم-جومارت توقايەۆ تۇركىستان وبلىسى مەن ونىڭ ورتالىعى تۇركىستان قالاسىن دامىتۋ باعىتىنداعى جۇمىستار جالعاساتىنىن جەتكىزدى.
«بۇگىن مەن تۇركى دۇنيەسىنىڭ رۋحاني استاناسى – تۇركىستانعا تاعزىم ەتۋ ءۇشىن ارنايى كەلدىم. تۇركىستان – ەلىمىزدىڭ التىن بەسىگى، مادەنيەتىمىز بەن رۋحانياتىمىزدىڭ سيمۆولى جانە بۇكىل حالقىمىزدىڭ بويتۇمارى. بۇل قاسيەتتى جەردى كوزىمىزدىڭ قاراشىعىنداي ساقتاپ، دامىتۋىمىز كەرەك. ەلباسىنىڭ بۇل قالاعا ەرەكشە مارتەبە بەرۋ تۋرالى شەشىمى كەزدەيسوق ەمەس. تۇركىستاندى تۇلەتىپ، وركەندەتۋ ماسەلەسى ءاردايىم تۇڭعىش پرەزيدەنتىمىزدىڭ نازارىندا بولادى. ەجەلگى تۇركىستاننىڭ جاڭعىرۋى جانە جاڭارۋى دامۋ جولىمىزدىڭ دۇرىستىعىن كورسەتەدى. پرەزيدەنت رەتىندەگى العاشقى ساپارىمنىڭ تۇركىستاننان باستالعانى مەن ءۇشىن اسا ماڭىزدى»، – دەدى قاسىم-جومارت توقايەۆ.
مەملەكەت باسشىسى وسى جيىندا قوعامداعى نەگىزگى ماسەلەرەرگە توقتالىپ، ساباقتاستىق، ادىلەتتىلىك، ىلگەرىلەۋ ۇستانىمدارى بويىنشا جۇمىس ىستەيتىنىن ايتتى.
«ۇكىمەتتىڭ، مينيسترلەردىڭ، بارلىق دەڭگەيدەگى اكىمدەردىڭ، پوليسيانىڭ، پروكۋراتۋرانىڭ، سوتتاردىڭ باستى ماقساتى – ازاماتتاردىڭ قۇقىعىن قورعاۋ. زاڭنان جوعارى ەشنارسە بولماۋى كەرەك. ورتالىق جانە جەرگىلىكتى ورگانداردىڭ باسشىلارىنا قاتىستى ورىندى شاعىم تۇسكەن جاعدايدا ولاردىڭ ءبارى جازالاناتىن بولادى. سوندىقتان باسشىلار حالىقپەن تىعىز قارىم-قاتىناستا جۇمىس ىستەۋى قاجەت. جىلىنا ءبىر رەت ۇيىمداستىرىلاتىن ەسەپ بەرۋ كەزدەسۋلەرى – كوزبوياۋشىلىق. حالىقپەن كۇن سايىن بىرگە بولىپ، قويان-قولتىق جۇمىس ىستەۋى كەرەك. جەمقورلىقپەن كۇرەس كۇشەيە تۇسەدى» دەگەن پرەزيدەنت جاستاردى قولداۋ، جاڭا جۇمىس ورىندارىن اشۋ، «رۋحاني جاڭعىرۋ» باعدارلاماسى بويىنشا جۇمىس ىستەۋ جونىندە تاپسىرما بەردى. سونىمەن بىرگە بيۋدجەت قارجىسىن ۇنەمدەۋ، ول ءۇشىن يميدجدىك ءىس-شارالار مەن جيىنداردى ازايتۋ كەرەكتىگىن ەسكەرتتى.
تۇركىستان وبلىسىنىڭ اكىمى ءومىرزاق شوكەيەۆ «قۇرمەتتى قاسىم-جومارت كەمەل ۇلى! وڭىرىمىزگە ارنايى كەلىپ، تىنىس-تىرشىلىگىمەن تانىسقانىڭىزعا العىسىمىز زور. تۇركىستانعا دەگەن قۇرمەتىڭىز بەن قامقورلىعىڭىزعا راحمەت. ەل سەنىمىن اقتاۋ، جانە بۇگىنگى ماجىلىستە ءسىز ايتقان باستامالار مەن تاپسىرمالار بويىنشا ناقتى جۇمىستار اتقاراتىن بولامىز»، – دەدى.
جيىندا «الاش» ادەبي سىيلىعىنىڭ يەگەرى، تانىمال جازۋشى مارحابات بايعۇت پرەزيدەنتتىڭ العاشقى جۇمىس ساپارىن تۇركىستاننان باستاعانىنا ريزاشىلىعىن ءبىلدىرىپ، ەلباسىمىز وكىلەتتىلىگىن تاپسىراردا ايرىقشا ساياسي مادەنيەت پەن پاراساتتى شەشىم قابىلداعانىن اتاپ ءوتتى. سونىمەن بىرگە تۇركىستان قالالىق ارداگەرلەر كەڭەسىنىڭ ءتوراعاسى جارقىنبەك قۇلبايىمبەتوۆ پەن ايتىسكەر-اقىن مارجان ەسجانوۆا دا جۇرەكجاردى لەبىزدەرىن ايتىپ، مەملەكەت باسشىسىنىڭ قازاقستاننىڭ جانە تۇركىستاننىڭ دامۋىنا ۇلەس قوساتىنىنا سەنەتىندەرىن جەتكىزدى.
ۇسىنعان: فاريزا جومارت قىزى
