ق ر پرەمەر-مينيسترى اسقار مامين ۇكىمەت ۇيىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ تابىستارى تومەن كوپ بالالى جانە تولىق ەمەس وتباسىلارعا، مۇمكىندىكتەرى شەكتەۋلى بالالارى بار وتباسىلارعا تۇرعىن ءۇيدىڭ قولجەتىمدىلىگىن ارتتىرۋ تۋرالى تاپسىرمالارىن ورىنداۋ جونىندە جۇمىس كەڭەسىن وتكىزدى دەپ حابارلايدى Qamshy.kz اقپارات اگەنتتىگى primeminister.kz سايتىنا سىلتەمە جاساي وتىرىپ.

پرەمەر-مينيستردىڭ ايتۋىنشا، ۇكىمەت پەن اكىمدىكتەر اتالعان باعىتتا جۇمىستاردى جۇرگىزىپ جاتىر. بيىل مامىر ايىندا كوپ بالالى وتباسىلارعا پاتەرلەر بەرىلە باستايدى. 5 جىل ىشىندە جالپى 28 مىڭ پاتەر بەرىلمەك. باسپاناعا مۇقتاج كوپ بالالى وتباسىلاردى تۇرعىن ۇيمەن قامتاماسىز ەتۋ ءۇشىن تۇرعىن ءۇي قۇرىلىس جيناعى جۇيەسى ارقىلى تۇرعىن ءۇي زايمدارىن بەرۋدىڭ جەڭىلدىكتى تەتىگى ازىرلەندى.

يندۋستريا جانە ينفراقۇرىلىمدىق دامۋ ءمينيسترى ر. سكليار باسپانانىڭ قولجەتىمدىلىگىن ارتتىرۋ بويىنشا قابىلدانىپ جاتقان شارالار تۋرالى باياندادى.

كەڭەس بارىسىندا قىزىلوردا وبلىسىنىڭ حالىقتىڭ الەۋمەتتىك ءالسىز توبىنىڭ تۇرعىن ءۇي ماسەلەسىن شەشۋدەگى تاجىريبەسى ەرەكشە اتالىپ ءوتتى. «بالامەكەن» جوباسى اياسىندا قىزىلوردا وبلىسىنىڭ اكىمدىگى كوپ بالالى وتباسىلاردىڭ باسپانا ماسەلەسىن شەشۋدى كوزدەيتىن ب. وتەمۇراتوۆتىڭ جەكەمەنشىك قورىمەن بىرلەسىپ وتەۋسىز نەگىزدە بەرىلەتىن ۇيلەردى سالۋدى باستادى.

قىزىلوردا وبلىسىنىڭ اكىمى ق. كوشەربايەۆ پەن قور ديرەكتورى م. ايتماعامبەتوۆ جوبانى ىسكە اسىرۋ تۋرالى اقپارات بەردى. جۇمىس كوميسسياسى قىزىلوردا قالاسى بويىنشا قولايسىز تۇرعىن جاعدايلارىندا ءومىر ءسۇرىپ جاتقان 150 وتباسىنى انىقتادى، ولارعا پاتەرلەر بەرىلەتىن بولادى: 50 وتباسى جەرگىلىكتى بيۋدجەت قاراجاتى ەسەبىنەن باسپانامەن قامتىلادى، 100 وتباسى «بالامەكەن» جوباسى اياسىندا باسپاناعا يە بولماق. جالپى العاندا، قوردان ۇيلەردىڭ قۇرىلىسىن قارجىلاي قولداۋعا 450 ملن تەڭگە بولىنگەن.

وبلىس اكىمدىگىنىڭ دەرەكتەرىنە سايكەس، 1م2 تۇرعىن ءۇيدىڭ قۇنى 70 مىڭ تەڭگەنى قۇرايتىن بولادى. ۇيلەر وسى جىلدىڭ 1 قىركۇيەگىنە قاراي پايدالانۋعا بەرىلەدى. بۇعان قوسا، بەلگىلەنگەن مەرزىمگە قاراي قاجەتتى ينجەنەرلىك ينفراقۇرىلىم جۇرگىزۋ جۇمىستارى (ەلەكتر قۋاتى، گاز، سۋ، تەلەفون بايلانىسى، اۆتوجولدار جانە ت. ب.) اياقتالادى، سونداي-اق ءاربىر وتباسىعا 6 سوتىق جەر تەلىمى بولىنەدى.

بۇدان وزگە، قىزىلوردا وبلىسىنىڭ كوپ بالالى وتباسىلارىنىڭ ىشىنەن از قامتىلعان وتباسىلارعا ارنالعان جالدامالى تۇرعىن ءۇي باعدارلاماسىن ىسكە اسىرۋعا قوسىمشا 3،6 ملرد تەڭگە ءبولىندى. بۇل 470 پاتەردى قۇرايتىن 10 ءۇيدى سالۋعا جول اشادى. جالپى، بيىل وبلىستا 1966 پاتەردى قۇرايتىن 45 كوپقاباتتى تۇرعىن ءۇي سالىنادى، ولاردىڭ باسىم بولىگى مۇقتاج ازاماتتارعا بولىنەدى.  

كەڭەس قورىتىندىسىن شىعارا وتىرىپ، ق ر پرەمەر-مينيسترى اسقار مامين حالىقتىڭ ءال-اۋقاتىن جاقسارتۋعا بيزنەس وكىلدەرى دە ءوز ۇلەستەرىن قوسۋى كەرەك ەكەنىن ايتتى.

«قايىرىمدىلىق – يگىلىكتى ءىس»، — دەپ پرەمەر-مينيستر، قىزىلوردا وبلىسىنىڭ وڭ تاجىريبەسىن پايدالانۋدى تاپسىرىپ، بيزنەس وكىلدەرىن الەۋمەتتىك ءالسىز وتباسىلارعا الەۋمەتتىك قولداۋ كورسەتۋ جوبالارىن ىسكە اسىرۋعا شاقىردى.

كەڭەس قورىتىندىسى بويىنشا قىزىلوردا وبلىسىنىڭ اكىمدىگى مەن «بولات وتەمۇراتوۆ قورى» جەكەمەنشىك قورى اراسىندا ىنتىماقتاستىق تۋرالى مەموراندۋمعا قول قويىلدى.

ۇسىنعان: فاريزا جومارت قىزى