–سان-فرانسيسكو مەن لوندوندا جارىق كورەتىن Wired اتتى عىلىمي-تانىمدىق مەرزىمدى باسىلىمىندا ستامبۇل شاھارىنداعى بايازيت اتىنداعى مەملەكەتتىك كىتاپحانانى الەمدەگى وسى زامانعى ساۋلەتى وزگەشە، ديزاين ورنەگى ەرەكشە كىتاپحانالار اراسىندا ءتورتىنشى ورىننان كورىنگەن.
"ءۇمىم وسمانلى كىتاپحاناسى" دەگەن اتاۋمەن 1884 جىلى سالىنعان كىتاپحانانى كۇردەلى جوندەۋدەن وتكىزگەن ءارى ديزاينىن سىزعان Tabanlıoğlu Mimarlık كومپانياسى بولاتىن. اتالمىش مادەني ورىندا وقىرماندارعا ءبىر ميلليونعا تارتا قۇندى قۇجات ساقتالعان. ولاردىڭ جارتىسىنا جۋىعىن كىتاپتار قۇرايدى. كىتاپحانا قورىندا 11 120 قولجازبا ساقتالعان.
Wired عىلىمي-تانىمدىق مەرزىمدى باسىلىمنىڭ نۇسقاسى بويىنشا الەمدەگى ەڭ ادەمى وسى زامانعى كىتاپحانالار تىزىمىندە ءبىرىنشى ورىن دانياداعى، دالىرەگى، سكانديناۆيا تۇبەگىندەگى اسا ءىرى Dokk1 كىتاپحاناسىنا، ال ەكىنشى ورىن اقش-تىڭ ۆەرمونت شتاتى اۋماعىندا ورىن تەپكەن لوۋرەنس كوپشىلىككە ارنالعان كىتاپحاناعا بۇيىرعان.
ءۇشىنشى ورىنعا قىتايدىڭ چجەن يۋان قالاسىنداعى يانچجوۋ كىتاپحاناسى جايعاسقان. بەسىنشى ورىنعا نورۆەگياداعى ۆەننەسلا كىتاپحاناسى تابان تىرەگەن. التىنشى ورىندى نورۆەگتەردىڭ بۋدە كىتاپحاناسى مىسە تۇتقان.
چيكاگوداعى كوپشىلىككە ارنالعان كىتاپحانا جەتىنشى ورىنعا شىقسا، ۇلىبريتانياداعى بيرمينگەم كىتاپحاناسى (قورىندا 800 مىڭ تۋىندى بار) سەگىزىنشى ورىنعا يەك ارتقان.
ال توعىزىنشى ورىندا - كاناداداعى گاليفاكس ورتالىق كىتاپحاناسى، سوڭعى ورىندا - مەكسيكانىڭ مونتەررە قالاسىنداعى كونارت كىتاپحاناسى.
ۇسىنعان: گۇلىم جاقان
