ديماش وزىنە قانداي قىزداردىڭ ۇنايتىنىن ايتتى دەپ جازادى Qamshy.kz اقپارات اگەنتتىگى.
–كرەمل تورىندەگى العاشقى كونسەرتىڭىز قالاي ءوتتى؟
–كەرەمەت ءوتتى. ءبىراق "اتتەگەن-اي" دەگەن تۇستار بولدى. ونسىز بولمايدى عوي، ەندى. ءبىراق كورەرمەندەردىڭ ىقىلاسىنا بولەندىم، قوشەمەتىن كوردىم. ماعان بۇدان اسقان باقىت جوق. جانكۇيەرلەردىڭ قولداۋىنىڭ ارقاسىندا ءوزىمدى قۇددى ءبىر مايكل دجەكسونداي سەزىندىم. سوندىقتان وسى كەشتە ماعان قولداۋ بىلدىرگەن جەرگىلىكتى تۇرعىندارعا جانە شەت ەلدەن كەلگەن قوناقتارعا العىسىمدى بىلدىرەمىن. وسى كونسەرتتىڭ وتۋىنە تىكەلەي سەپتىگىن تيگىزگەن اتا-اناما، اتاقتى كومپوزيتور يگور كرۋتويعا ۇلكەن راقمەتىمدى ايتقىم كەلەدى.
–ءسىزدى جانكۇيەرلەرىڭىز ءسىزدى حانزادا دي، پەرىشتە دەپ اتاپ جاتادى. مۇنداي اتاققا يە بولۋ ءسىز ءۇشىن ۇلكەن جاۋاپكەرشىلىك شىعار؟
–شىن جۇرەگىممەن جانكۇيەرلەرىمە راقمەت ايتقىم كەلەدى. ءبىراق مەن ەشقانداي پەرىشتە ەمەسپىن. مەنىڭ دە قاتەلىك جىبەرەتىن كەزىم بولادى. مەن دە بارلىعى سەكىلدى قاراپايىم اداممىن.
–ءسىز قازاقتىڭ حالىق ءانى "دايديداۋدى" بۇكىل الەمگە تانىتتىڭىز. ەندىگى ارمانىڭىز قانداي؟
–قازىرگى تاڭدا شەت مەملەكەتتەردە از-ماز تىڭدالىپ جاتقاندىعى بار. ءبىراق ودان ءارى تانىتسام دەپ ارماندايمىن.
–سىزگە قانداي قىزدار ۇنايدى؟
–اقىلدى بولسا بولدى عوي. ەڭ باستىسى – سول. سوسىن تاربيەلى بولسا، جاقسى. ءبىراق ونى نە قىلاسىزدار؟ ونى قايتەسىزدەر؟ (كۇلدى)
ۇسىنعان: اسەل بولات قىزى
