قاراعاندى قالاسىندا مەشىتكە كەلۋشىلەر جەرگىلىكتى تۇرعىننىڭ الداپ كەتكەنىن ايتىپ شاعىمداندى. ول ادامدارعا بيزنەسكە اقشا سالۋ ارقىلى پايدا تابۋعا بولاتىنىنا سەندىرگەن. اقشانى العاننان كەيىن ءىز-تۇسسىز جوعالىپ كەتكەن. بۇل تۋرالى Qamshy.kz اقپارات اگەنتتىگى tengrinews.kz سايتىنا سىلتەمە جاساي وتىرىپ حابارلايدى. 

"بارلىق "ىسكەرلىك ارىپتەستەرىمەن" الاياق  مەشىتتە كەزدەستى. «مەن ەراسىلدى (ەسىمى وزگەرتىلگەن — رەد.)   ءۇش جىلدان بەرى بىلەمىن، ءبىرىنشى كۇننەن باستاپ ول ماعان وتە سالماقتى، مەيىرىمدى جانە قۇدايدان قورقاتىن جىگىت سياقتى كورىندى. جاقسى كيىنگەن، قىمبات اۆتوكولىكتەرگە مىنگەن، سونداي-اق مۇقتاج جاندارعا كومەكتەسەتىندىگىن ايتقان. سودان كەيىن ول قىتايدان تاۋار الدىرىپ جۇرگەندىگىن،  ونى ساتىپ الۋ ءۇشىن ينۆەستور ىزدەپ جۇرگەندىگىن ايتتى. قارجىلاي دەمەۋ كورسەتكەن ادامعا اقشاسىن پايىزبەن قايتاراتىنىن ايتىپ سەندىردى. ءبىراز ۋاقىتتان كەيىن وعان تاۋاردى ساتىپ الۋ ءۇشىن اقشانىڭ ءدال ءقازىر كەرەك ەكەندىگىن ايتتى، وعان  20 ميلليون تەڭگەنى سەنىپ تاپسىردىم»، - دەيدى قاراعاندىلىق مارات.

ماراتتىڭ ايتۋىنشا، ەراسىل بۇل جاعداي تۋرالى ەشكىمگە ايتپاۋدى وتىنگەن. الايدا كوپ كەشىكپەي، ەراسىلعا سەنەتىن مەشىتتە باسقا ادامدار دا پايدا بولعان. 2014 جىلى مەككەگە قاجىلىققا بىرگە بارعان ساپارىندا  وعان 84 مىڭ دوللار اقشا بەرگەن. 

"باستاپقىدا ول قارىزدى قايتارىپ ءجۇردى. ءبىراق، كەيىن قارىزدى قايتارۋدى توقتاتتى. ول ماعان 57 مىڭ تەڭگە قارىزدار بولعان. 2017 جىلى ول ماعان قارىزدى تولىقتاي ەكى ايدىڭ ىشىندە قايتارۋعا ۋادە ەتىپ، قولحات جازىپ بەرگەن بولاتىن. دەگەنمەن، ونىمنان ەشتەڭە دە شىقپادى" — دەيدى مارات.

ەراسىل ودان بولەك مەشىتكە كەلگەن 2 ادامدى قۇرىعىنا ءتۇسىرىپ، 30 ميلليون تەڭگە پايدا تاپقان ەكەن. سونداي-اق ەراسىلدىڭ 6 جىل وتاسقان ايەلى ايگەرىم دە ەراسىلدىڭ قۇربانى بولعان. 

"ءبىزدىڭ ەكى بالامىز بار. ۇلكەن بالام مۇگەدەك. ءبىر جارىم جىل بۇرىن ول ءبىزدى استاناعا كوشىرىپ اكەلدى. سوسىن، قاراعاندىداعى بۇرىنعى ءۇيدى ساتىپ، استانادان جاڭا ءۇي الۋعا كوندىردى. ءۇيدى ەراسىلدىڭ اتىنا جازدىردىم. ول ءۇيدىڭ قۇجاتتارى مەن اكەمنىڭ كاماز-ىن ساتىپ قاشىپ كەتتى."- دەيدى ايگەرىم. 

جابىرلەنۋشىلەر پوليسياعا شاعىمدانعانمەن، ولاردىڭ وتىنىشتەرى قاراۋسىز قالعان. «2018 جىلدان باستاپ 2019 جىلدىڭ ناۋرىزىنا دەيىن ءتورت ادام الاياقتىق ءۇشىن پوليسياعا ءوتىنىش بەرگەن. دەگەنمەن، قىلمىستىق ءىس جۇرگىزۋ كودەكسىنىڭ 179-بابىنا سايكەس، ازاماتتىق-قۇقىقتىق مامىلەلەردى جازباشا تۇردە جاسالماعان جانە جارامسىز دەپ تانىعان.

اۋدارعان: فاريزا جومارت قىزى