پارا بەر دە بارا بەر! اقتوبەلىك ستۋدەنتتەر ەمتيحان كەزىندە ءتاۋىر باعا ءۇشىن اقشا بەرەتىندەرىن جايىپ سالدى. ەڭ سوراقىسى وقۋشىلارىنان داستارحان جايىپ، تاماق سۇرايتىن دا ۇستازدار بار كورىنەدى. بۇل تۋرالى Qamshy.kz اقپارات اگەنتتىگى كتك جاڭالىقتارىنىڭ مالىمەتىنە سۇيەنىپ وتىرىپ حابارلايدى. 

ساۋالناماعا مىڭ جارىم ستۋدەنت قاتىسقان. ولاردىڭ جارتىسىنان كوبى باعا ءۇشىن پارا بەرگەندەرىن مويىنداپتى. اسىرەسە دارىگەرلەر مەن مۇعالىمدەر دايىندايدىن مەملەكەتتىك ۋنيۆەرسيتەتتەرگە شاعىم كوپ تۇسكەن.  مۇندا ۇستازدار سىناق كەزىندە بەس مىڭ تەڭگەدەن باستاپ سەكسەن مىڭعا دەيىن پارا الادى. سونداي-اق ستۋدەنتتەر باعا ءۇشىن اقشا سۇرايتىن وقىتۋشىلارىنىڭ ءاتى-جونىن ءتىزىپ بەرگەن. ەندى ونىمەن قۇزىرلى مەكەمەلەر اينالىساتىن بولادى.     

- قۇقىق قورعاۋ ورگاندارى مەن جوعارعى وقۋ ورىندارىنىڭ باسشىلارى بۇل انكەتيروۆانيەدە كورسەتىلگەن ءمان-جايلاردىڭ بارلىعىن انىقتاۋ قاجەت. شىندىعىنا كوز جەتكىزۋ كەرەك. ول شىندىق پا، الدە جوق پا. شىندىق بولسا اركىم ءوزىنىڭ قۇزىرەت شەگىندە بەلگىلى ءبىر شارالار قولدانۋ كەرەك، - دەدى اقتوبە وبلىستىق مەملەكەتتىك قىزمەت ىستەرى جانە جەمقورلىققا قارسى ءىس-قيمىل دەپارتامەنتى باسشىسى راسۋل مەدەتوۆ.