بانگلادەشتە جاس بوسانعان ايەل ءبىر ايدان سوڭ تاعى ءبىر ۇل مەن قىزدى امان-ەسەن ومىرگە اكەلدى دەپ حابارلايدى Qamshy.kz اقپارات اگەنتتىگى Mirror سايتىنا سىلتەمە جاساپ. 

بانگلادەشتە تۇراتىن جاس وتباسى – 20 جاستاعى اريفا سۋلتانا مەن كۇيەۋى سۋمون بيسۋوز 25 اقپان ايىندا العاش رەت بالالى بولىپ، اتا-انا اتانادى. جاس انا بالالى بولۋدىڭ قىزىعىنا ەندى ۇيرەنىسە باستاعاندا، 26 ناۋرىز كۇنى تاعى دا پەرزەنتحاناعا تۇسەدى.

ءسويتىپ، كەلىنشەك كوپ ۇزاماي تاعى دا ەكى بوپەنى دۇنيەگە الىپ كەلەدى. "ءبىر اي كەشىگىپ دۇنيەگە كەلگەن ۇل مەن قىزدىڭ دەنساۋلىعى وتە جاقسى"،- دەيدى اريفانىڭ دارىگەرلەرى.

مەديسينا قىزمەتكەرلەرىنىڭ ايتۋىنا قاراعاندا، اريفانىڭ ەكى جاتىرى بار ەكەن. سول سەبەپتى ءبىرىنشى بالاسىن بوسانعاننان كەيىن تاعى دا ەگىزدەرگە اياعى اۋىر ەكەنىن بىلمەگەن. بۇل تابيعاتتا وتە سيرەك كەزدەسەتىن قۇبىلىس دەيدى ماماندار. ءبىرىنشى بالاسىن تۋعاننان كەيىن 26 كۇندە تاعى دا سۋى كەتىپ، پەرزەنتحاناعا جەتكىزىلىپتى.

تۇرمىس دەڭگەيى ورتاشا جاس جۇبايلار جارىق دۇنيە ەسىگىن ەندى اشقان سابيلەرىن وسىرۋگە شامامىز جەتەر مە ەكەن دەپ ۋايىمدايدى. دەگەنمەن، وتاعاسى ءۇش بالاسىن دا ەشكىمنەن كەم قىلمايمىن دەپ وزىنە سەرت بەرىپ وتىر.

"اللانىڭ بەرگەن سىيى شىعار، سابيلەرىمنىڭ ءبارى دەنى ساۋ بولىپ تۋدى. ولاردى باقىتتى ەتۋ ءۇشىن بارىمدى سالامىن"، - دەدى ءۇش بالانىڭ اكەسى سۋمون.

ۇسىنعان: ماقپال سەمباي