مادينا ءابىلقاسىموۆا ۇلتتىق بانك ءتوراعاسىنىڭ ورىنباسارى بولىپ تاعايىندالدى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.
"مەملەكەت باسشىسىنىڭ وكىمىمەن ءابىلقاسىموۆا مادينا ەراسىل قىزى قازاقستان رەسپۋبليكاسىنىڭ ۇلتتىق بانكى ءتوراعاسىنىڭ ورىنباسارى بولىپ تاعايىندالدى"، - دەلىنگەن حابارلامادا.
مەملەكەت باسشىسىنىڭ قاۋلىسىمەن جانات بوستان ۇلى قۇرمانوۆتىڭ ۇلتتىق بانك ءتوراعاسىنىڭ ورىنباسارى قىزمەتىنەن بوساتىلعانى ايتىلادى.
مادينا ءابىلقاسىموۆا 1978 جىلى الماتى قالاسىندا دۇنيەگە كەلگەن.
1999 جىلى قازاق مەملەكەتتىك باسقارۋ اكادەمياسىن "حالىقارالىق ەكونوميكالىق قاتىناستار" ماماندىعى بويىنشا بىتىرگەن.
2002 جىلى كولۋمبيا ۋنيۆەرسيتەتىن حالىقارالىق قاتىناستار ماگيسترى دارەجەسىمەن "ەكونوميكالىق ساياساتتى باسقارۋ" ماماندىعى بويىنشا ءتامامداعان.
2011 جىلى گارۆارد ۋنيۆەرسيتەتىنىڭ كەننەدي اتىنداعى مەملەكەتتىك باسقارۋ مەكتەبىن "مەملەكەتتىك باسقارۋ ماگيسترى" ماماندىعى بويىنشا اياقتاعان. ءتۇرلى جىلدارى ستراتەگيالىق جوسپارلاۋ اگەنتتىگىنىڭ باس مامانى، ەكونوميكا جانە بيۋدجەتتىك جوسپارلاۋ مينيسترلىگىنىڭ ستراتەگيالىق جوسپارلاۋ باسقارماسىنىڭ باسشىسى، "ماركەتينگتىك-تالدامالىق زەرتتەۋلەر ورتالىعى" اق مەملەكەتتىك ساياساتتى تالداۋ دەپارتامەنتىنىڭ ديرەكتورى بولىپ ەڭبەك ەتكەن.
2006-2008 جىلدارى ءابىلقاسىموۆا ق ر پرەمەر-مينيسترى كەڭسەسىنىڭ الەۋمەتتىك-ەكونوميكالىق ءبولىم مەڭگەرۋشىسىنىڭ ورىنباسارى بولعان، ودان كەيىن ق ر پرەزيدەنتى اكىمشىلىگىنىڭ ستراتەگيالىق ازىرلەمەلەر جانە تالداۋ ورتالىعى مەڭگەرۋشىسىنىڭ ورىنباسارى بولىپ تاعايىندالعان.
2011 جىلعى قىركۇيەكتەن 2013 جىلعى اقپانعا دەيىن ق ر ەكونوميكالىق دامۋ جانە ساۋدا ۆيسە-مينيسترى لاۋازىمىن اتقارعان.
2012 جىلدان باستاپ دۇنيەجۇزىلىك بانكتىڭ قازاقستانداعى باسقارۋشىسىنىڭ ورىنباسارى، 2013-2014 جىلدارى ەكونوميكا جانە بيۋدجەتتىك جوسپارلاۋ ۆيسە-مينيسترى قىزمەتتەرىندە بولدى.
ۇسىنعان: ماقپال سەمباي
