اقپارات جانە قوعامدىق دامۋ مينيسترلىگى جەلىدە قازاقستاندىقتاردىڭ تەگىنە مىندەتتى تۇردە "نۇر" ءسوزى قوسىلىپ جازىلادى دەگەن حابارلاماعا قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

ايتا كەتسەك، بۇگىن WhatsApp مەسسەندجەرىندە تاراعان گازەتتە جاريالانعان ماقالانىڭ سۋرەتى قازاقستاندىقتاردى ءبىراز شۋلاتتى. ماقالادا يندۋستريا جانە سيفرلىق دامۋ مينيسترلىگىنىڭ قاۋلىسىنا سايكەس، قازاقستاندىقتار 2019 جىلدىڭ 1 ساۋىرىنەن باستاپ تەگىنە "نۇر" ءسوزىن قوسىپ جازۋعا مىندەتتەلەدى دەپ جازىلعان.

"ياعني، احمەتوۆ – نۇر-احمەتوۆ، يۆانوۆ – نۇر-يۆانوۆ، كيم – نۇر-كيم بولادى جانە تاعى باسقا"، - دەلىنگەن ماتەريالدا.

اقپارات جانە قوعامدىق دامۋ مينيسترلىگى گازەتتە باسىلعان ماقالانىڭ 1 ءساۋىر – كۇلكى كۇنىنە ارنالعان ءازىل-قالجىڭ ەكەنىن حابارلادى.

"بۇل جالعان اقپارات. ماسەلەن، ماتەريالدا يندۋستريا جانە سيفرلىق دامۋ مينيسترلىگىنىڭ قاۋلىسىنا سىلتەمە جاسالعان. قازاقستاندا مۇنداي مينيسترلىك جوق ەكەنىن سىزدەر جاقسى بىلەسىزدەر"، - دەدى مينيسترلىكتىڭ باسپا ءسوز حاتشىسى ايجان مۋسينوۆا.

ەكىنشىدەن، ونىڭ ايتۋىنشا، ماقالادا بەلگىسىز بىرەۋدىڭ ءسوزى كەلتىرىلگەن.

"ەگەر ناعىز قاۋلى بولسا، وندا تۇسىندىرمەنى مەملەكەتتىك ورگاننىڭ ناقتى وكىلى بەرەتىن ەدى، نەمەسە كەم دەگەندە ءوز ءاتى-جونىن، لاۋازىمىن كورسەتەر ەدى. ۇشىنشىدەن، ماتەريالدىڭ استىندا دەرەككوز – "ءبىرىنشى ساۋىردەگى ششۋچينسك" دەپ كورسەتىلگەن، ياعني بۇل ءبىرىنشى ساۋىرگە ارنالعان ءازىل ەكەنىن تۇسىنۋگە بولادى"، - دەدى مۋسينوۆا.

ۇسىنعان: اسەل بولات قىزى