اقتوبەدە بالاباقشا تاربيەشىلەرى بۇلدىرشىندەردى اشتان قاتىرىپ، تاماق سۇراسا شاپالاقپەن ۇرعان. بۇل تۋرالى اتا-انالار شاعىمدانۋدا. بۇل قانشالىقتى راس؟ ال مەكەمە باسشىلىعى نە دەيدى؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.
الينا وبايدۋللينا كورمەگەنىم ەندى وسى بالاباقشا بولسىن دەپ وتىر. ءۇش جاسار ۇلى "تاربيەشى شاپالاقپەن سالىپ جىبەردى" دەپ كەلگەندە، "بالا عوي، قوسىپ ايتقان شىعار" دەپ سەنبەپتى. ال جاقىندا كەلىنشەكتىڭ قولىنا تاڭعى اس كەزىندەگى مىنا بەينەجازبا تۇسكەن. ونى كورىپ، توبە شاشى تىك تۇرىپتى.
«بالالاردىڭ الدىندا بوتقا دەگەن اتىمەن بولعان جوق، تەك نان مەن ماي، سوسىن شاي بولدى. دەرەۋ تۇسكى اس كەزىندە باردىم، مەڭگەرۋشىمەن سويلەستىم. تۇسكى اسقا نە بەرەسىزدەر دەپ ەدىم، سورپا بولادى دەدى. مەن وعان دا كۇمانداندىم. ال ەكىنشى اس بولعان جوق. سەبەبىن سۇراعاندا، ءبارى اتا-انالاردىڭ قارىزىنا كەلىپ تىرەلەدى دەپ ءتۇسىندىردى»، - دەپ شاعىمداندى بالالاردىڭ اناسى الينا وبايدۋللينا.
استان شىققان ايقاي ءالى باسىلماي تۇر. بالاباقشا قۇرىلتايشىسى "مۇنىڭ بارلىعى ءبىزدىڭ مەكەمەگە جابىلعان جالا" دەپ وتىر. ءمازىر تالاپقا ساي جاسالادى دەپ سەندىردى.
«شامالى قاتەلىكتەر بولدى بىزدە، نيۋانسى. سەبەبى، ءبىر اتا-انا ەكىنشى تاماقتانۋ كەزىندە تەلەفونعا ءتۇسىرىپ الىپ 1-تاماق دەپ سوسسەتكە سالدى. مەن جالا جاۋىپ تۇر دەيمىن»، - دەيدى بالاباقشانىڭ قۇرىلتايشىسى تولقىن شەكتىبايەۆا.
بالاباقشا قوجايىنى قانشا جەردەن اتا-انا جالا جاپتى دەگەنىمەن مەملەكەتتىك تاپسىرىستى ورىنداپ وتىرعاننان كەيىن «سۋدىڭ دا سۇراۋى» بار. قالالىق ءبىلىم ءبولىمى ارنايى كوميسسيا قۇرىپ، مەكتەپكە دەيىنگى ۇيىمدا تەكسەرىستى باستاپ كەتكەن.
«اتا-انا تاراپىنان شاعىم بولعاندا، تاماق ماسەلەسى، اس ءمازىرى ، سوسىن وقۋ پروسەسى سول شاعىم كەزىندە بۇكىل قۇجاتتارىن زەرتتەيمىز. اس ءمازىرى تاماقتارى دۇرىس دايىندالمايدى دەپ بەرىلىپ تۇر. سوندىقتان، سول باعىت بويىنشا جۇمىستار جۇرگىزەمىز»، - دەيدى قالالىق ءبىلىم ءبولىمىنىڭ باس مامانى گۇلجان ءامىروۆا.
وسى جاعداي سەبەپ بولدى ما، جوق الدە كەزدەيسوقتىق پا، ايتەۋىر اتا-انالار بالالارىن باسقا مەكەمەگە اۋىستىرۋعا ارىزدانىپ جاتىر ەكەن.
اتا-انالارى شۋ شىعارعان بالاباقشانىڭ بالالارىنا تاماقتى مىنەكەي، وسى اسۇيدە ازىرلەگەن. وزدەرىڭىز كورىپ تۇرعانداي، ءقازىر مىنا جەردە ءتىپتى ەلەكتر جارىعى دا جوق ەكەن. مۇندا ءقازىر قالالىق ءبىلىم ءبولىمى ارنايى تەكسەرىس جۇرگىزىپ جاتىر. كەمشىلىكتەردى جويۋعا بەلگىلى ءبىر ۋاقىت بەرەدى. ەگەر سول ۋاقىت ىشىندە جويماسا، كەلىسىم شارتتى ۇزەمىز دەپ مالىمدەدى.
ۇسىنعان: نازەركە لابيحان
