ورتالىق جۇمىسى 5-15 جاس ارالىعىنداعى بالالاردىڭ شىعارماشىلىق قابىلەتتەرىن، ينكليۋزيۆتى ءبىلىم بەرۋ مەن موتوريكاسىن دامىتۋعا باعىتتالعان، دەپ حابارلادى اتىراۋ وبلىستىق وڭىرلىك كوممۋنيكاسيالار قىزمەتى Qamshy.kz اقپارات اگەنتتىگىنە.

«ۆەنەرا» ينكليۋزيۆتى شىعارماشىلىق شەبەرحاناسى اۋتيزم، داۋن سيندرومى، سال اۋرۋى سەكىلدى دامۋىندا ەرەكشەلىكتەرى بار بالالارمەن جۇمىس ىستەيدى، جاڭا نىساندا اتا-انالارعا پسيحولوگيالىق كومەك كورسەتۋ مەن قولداۋ شارالارى دا قامتىلعان.

– ورتالىق 25 ادامعا ارنالعان، مۇندا بالالارمەن لوگوپەد، ارت-تەراپيا، لوگوريتميكا ماماندارى اينالىسادى. سەنسورلىق-ديناميكالىق ينتەگراسيا زالى، دەنە شىنىقتىرۋ، بەيىمدەلۋ زالى بار. اتا-انالاردى قولداۋعا باعىتتالعان شارالار دا ۇيىمداستىرىلادى. بەيىندىك مامانداردان بولەك اۆا-تەراپيا كابينەتتەرى جۇمىس ىستەيدى. اۆا-تەراپيانىڭ باستى ماقساتى – بالانىڭ جەكە قابىلەتتەرىن نەگىزگە الا وتىرىپ، مىنەز-قۇلىق تەحنولوگياسى مەن اسەر ەتۋ ءادىسى ارقىلى جاڭا داعدى قالىپتاستىرۋعا، قورشاعان ورتانى ءوز ەركىمەن مەڭگەرۋىنە مۇمكىندىك جاساۋ،- دەيدى ورتالىق باسشىسى، ەرەكشە بالانىڭ اناسى گۇلبارام ەرمۇقانوۆا. –ورتالىق جۇمىسىنىڭ باستالۋىنا دەمەۋشىلەر كومەك جاسادى، مەملەكەت تاراپىنان عيمارات بەرىلدى.

ورتالىقتىڭ اشىلۋ سالتاناتىنا اتىراۋ وبلىسىنىڭ اكىمى نۇرلان نوعايەۆ قاتىسىپ، اتقارىلىپ جاتقان شارالاردىڭ ماڭىزدىلىعىن اتاپ ءوتتى. جەرگىلىكتى اتقارۋشى ورگاندار ەرەكشە بالالاردىڭ پروبلەمالىق ماسەلەلەرىن شەشۋ ءۇشىن بارلىق جاعداي جاساۋعا دايىن. بۇل - مەملەكەتتىڭ بولاشاق ۇرپاققا دەگەن قامقورلىعى، بالالاردى الەۋمەتتىك بەيىمدەۋگە قولداۋ كورسەتۋ.

– قازىرگى قوعامدا مۇمكىندىكتەرى شەكتەۋلى بالالاردىڭ الەۋمەتتىك دامۋى وزەكتى ماسەلەلەردىڭ ءبىرى. وسى ورتالىقتىڭ اشىلۋىن كوپتەن كۇتتىك. بالالار مەن اتا-انالاردىڭ جاعدايلارى بارشاڭىزعا بەلگىلى. ەرەكشە بالالاردى الەۋمەتتەندىرۋ ءۇشىن نە ىستەۋ كەرەك؟ ءبىز ءوز تاراپىمىزدان وسىنداي ورتالىقتاردى قۇرۋعا قاجەت جاعدايدىڭ ءبارىن جاساۋعا دايىنبىز. وبلىس اۋداندارىندا دا وسىنداي ورتالىقتار اشۋ ماسەلەسى كۇن تارتىبىندە تۇر. وسى ءساتتى پايدالانىپ، ورتالىقتىڭ اشىلۋىنا كومەك قولىن سوزعان ازاماتتاردىڭ، دەمەۋشىلەر مەن ەرىكتىلەردىڭ بارىنە، باسقانىڭ تاعدىرىنا نەمقۇرايلى قاراي المايتىن ابزال جاندارعا العىس ايتامىن،-دەدى نۇرلان نوعايەۆ.

ورتالىق جۇمىسىمەن تانىسقان ايماق باسشىسى الەۋمەتتىك ماسەلەلەردى شەشۋگە قوعامدى، قوعامدىق ۇيىمدار مەن بيزنەس-قاۋىمداستىقتى بەلسەندى تارتۋ كەرەكتىگىن اتاپ ءوتتى. مەملەكەتتىك الەۋمەتتىك تاپسىرىستاردىڭ دا ماڭىزى زور. ازاماتتىق قوعام مەن مەملەكەتتىك ءوزارا بايلانىسى كوپتەگەن ماسەلەلەردىڭ شەشىمىن تابۋىنا ىقپال ەتەدى.