قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆ تۋعان جەرى - الماتى وبلىسى شامالعان اۋىلىنىڭ تۇرعىندارىمەن جۇزدەستى، دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.

قازاقستاننىڭ تۇڭعىش پرەزيدەنتى جۇرگىزىلىپ جاتقان ساياساتتىڭ ارقاسىندا ەلىمىزدىڭ حالىقارالىق ارەنادا مويىندالعانىن اتاپ ءوتتى.

"ءبىز ۇلكەن جۇمىس اتقاردىق. بۇرىن ەشكىمگە بەلگىلى بولماعان قازاقستان بۇگىن بۇكىل الەمگە تانىلدى. قازاقستاندىقتار ءتۇرلى ەلدەرگە بارىپ، دۇنيە ءجۇزىنىڭ ەڭ ۇزدىك وقۋ ورىندارىندا ءبىلىم الۋ مۇمكىندىگىنە يە بولدى"، – دەدى نۇرسۇلتان نازاربايەۆ.

سونداي-اق، ەلباسى الداعى قىزمەتى جونىندەگى جوسپارلارىنا توقتالدى.

"مەن ەلباسى رەتىندە ستراتەگيالىق ماسەلەلەرگە كوڭىل بولەتىن بولامىن. قاسىم-جومارت توقايەۆ مەنىڭ ارتقان ءۇمىتىمدى اقتايدى دەپ سەنەمىن"، – دەدى قازاقستاننىڭ تۇڭعىش پرەزيدەنتى.

نۇرسۇلتان نازاربايەۆ ەلىمىزدى جاڭعىرتۋ جونىندە قابىلدانىپ جاتقان شارالار، ەڭ الدىمەن، جاستاردى قولداۋعا جانە ولاردىڭ دامۋىنا باعىتتالعانىن اتاپ ءوتتى.

"مەن قازاقستاننىڭ بولاشاعى جارقىن بولاتىنىنا سەنەمىن. ول ءۇشىن بارلىق جاعداي جاسالعان. كىم بيزنەس اشقىسى كەلسە، وعان نەسيە بەرىلەدى. ماماندىعى جوق بولسا، مەملەكەت وعان جاڭا كاسىپتىك ءبىلىم بەرەدى. ماسەلە جۇمىستىڭ جوعىندا ەمەس، ماماندىقتىڭ بولماۋىندا. سونىمەن قاتار، ءبىز اۋىلداردى دامىتۋ ءۇشىن كوپتەگەن باعدارلامالاردى جۇزەگە اسىرىپ جاتىرمىز"، – دەپ تۇيىندەدى ەلباسى.

سونداي-اق، نۇرسۇلتان نازاربايەۆ بيىل ەلىمىزدە تەڭدەسى جوق الەۋمەتتىك شارالار قولعا الىنىپ وتىرعانىن اتاپ ءوتتى. رەسپۋبليكادا ازاماتتاردىڭ تۇرمىس ساپاسىن ارتتىرۋ ءۇشىن ءتۇرلى باعدارلامالار ىسكە اسىرىلۋدا. سونىمەن بىرگە، قازاقستاننىڭ تۇڭعىش پرەزيدەنتى قوعامدا پاتەرناليستىك تۇسىنىككە جول بەرمەۋدىڭ ماڭىزدىلىعىنا باسا نازار اۋداردى.

"كەز كەلگەن ەر ادامنىڭ ار-نامىسى بولۋعا ءتيىس. بالا تاربيەسى، ەڭ الدىمەن، اتا-انانىڭ جاۋاپكەرشىلىگى. ال مەملەكەت اتا-انالاردى جۇمىسپەن قامتىپ، بالالارىن اسىراۋىنا جاعداي جاساۋى كەرەك"، – دەدى نازاربايەۆ.

سوڭىندا ەلباسى كەزدەسۋگە قاتىسۋشىلارعا تابىس تىلەپ، ولاردىڭ جاڭا بەلەستەردى باعىندىرۋىنا نيەتتەستىك ءبىلدىردى، سونداي-اق بارلىعىن قازاقستاننىڭ يگىلىگى ءۇشىن ەڭبەك ەتۋگە شاقىردى.

ۇسىنعان: نازەركە لابيحان