پارلامەنت سەناتىنىڭ ءتوراعاسى داريعا نازاربايەۆا جۇڭگو حالىق رەسپۋبليكاسىنىڭ ەلشىسىن قابىلدادى دەپ حابارلايدى Qamshy.kz اقپارات اگەنتتىگى total.kz سايتىنا سىلتەمە جاساپ.

سەنات سپيكەرى قىتايمەن جان-جاقتى ستراتەگيالىق سەرىكتەستىك ورناتۋدىڭ ماڭىزى جوعارى ەكەنىن اتاپ ءوتتى.

"قازاقستان ەلباسى نۇرسۇلتان نازاربايەۆ پەن قحر ءتوراعاسى سي ءسزينپيننىڭ جوعارى دەڭگەيدەگى دوستىق، تاتۋ كورشىلىك جانە ءوزارا تۇسىنىستىك نەگىزىندەگى كەلىسىمدەرىن جۇزەگە اسىرۋعا نيەتتى. ستراتەگيالىق جان-جاقتى سەرىكتەستىك نەگىزىندەگى قارىم-قاتىناستى نىعايتۋ باعىتىن ۇستانامىز"، - دەدى داريعا نازاربايەۆا.

چجان سياو قحر حالىق وكىلدەرى بۇكىلقىتايلىق جينالىسى تۇراقتى كوميتەتىنىڭ ءتوراعاسى لي چجانشۋدىڭ داريعا نازاربايەۆاعا سەنات ءتوراعاسى قىزمەتىنە سايلانۋىمەن قۇتتىقتاۋىن جەتكىزدى جانە ءارى قاراي تابىستى جۇمىس ىستەۋىنە تىلەكتەستىگىن ءبىلدىردى.

"ءبىز ءسىزدىڭ پارلامەنتارالىق بايلانىستاردى دامىتۋعا جانە قىتايدىڭ "ءبىر بەلدەۋ، ءبىر جول" باستاماسىن قولداۋعا قوسقان جەكە ۇلەسىڭىزدى جوعارى باعالايمىز"، - دەدى ول.

سەنات باسشىسى ەكى ەل اراسىنداعى جاستار ىنتىماقتاستىعىن بەلسەندى دامىتۋ، اتاپ ايتقاندا، ستۋدەنتتەردىڭ الماسىپ وقۋىن جانە ءبىلىم گرانتتارىن بەرۋدى جولعا قويۋ قاجەتتىگىن اتاپ ءوتتى.

داريعا نازاربايەۆا شىڭجاڭ-ۇيعىر اۆتونوميالىق اۋدانىنداعى قازاقتار تاقىرىبىن قوزعاي كەلىپ، قحر-داعى ەتنيكالىق قازاقتار قازاقستان مەن جۇڭگو اراسىنداعى قارىم-قاتىناستا "دوستىق كوپىرى" ەكەنىن اتاپ ءوتتى. تاراپتار وسى سالادا تۋىندايتىن ماسەلەلەردى ءوزارا اقىلداسىپ، سىندارلى تۇردە شەشۋگە ۋاعدالاستى. كەزدەسۋ بارىسىندا سەنات ءتوراعاسى قازاقستان ازاماتتارى ءۇشىن تۋريستىك جانە جەكە ۆيزا بەرۋدى جاڭعىرتۋ ماسەلەسىن كوتەردى.

ۇسىنعان: ماقپال سەمباي