بايقوڭىر قالاسىن جالعا بەرۋدەن كەزەڭ-كەزەڭمەن شىعۋ ماسەلەسى قازاقستاندىق تاراپتىڭ كۇن تارتىبىندە تۇر، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

قازاقستان مەن رەسەي بايقوڭىر قالاسىن قازاقستاننىڭ قۇزىرەتىنە بەرۋ ماسەلەسىن تالقىلاپ جاتىر. بۇل تۋرالى بۇگىن سيفرلىق دامۋ، قورعانىس جانە اەروعارىش ونەركاسىبى ءمينيسترىنىڭ مىندەتىن اتقارۋشى مارات نۇرعوجين مالىمدەدى.

سەناتورلار راكەتا ۇشىرىلاتىن الاڭداردى عانا رەسەي ۇكىمەتىنە جالعا بەرۋدى قالدىرىپ، بايقوڭىر قالاسىن قازاقستاننىڭ قۇزىرەتىنە بەرۋ كەرەك ەكەنىن ايتتى. وسىعان قاتىستى سيفرلىق دامۋ، قورعانىس جانە اەروعارىش ونەركاسىبى مينيسترلىگىنىڭ پىكىرى قانداي ەكەنىن سۇرادى.

"بۇل ماسەلە ۇكىمەتارالىق كوميسسيانىڭ تۇراقتى باقىلاۋىندا. قالانى جالعا بەرۋدەن كەزەڭ-كەزەڭمەن شىعۋ ماسەلەسى قازاقستاندىق تاراپتىڭ كۇن تارتىبىندە تۇر. ءقازىر مەملەكەتتىك ورگاندار اراسىندا مۇقيات تالقىلاپ جاتىرمىز"، - دەدى نۇرعوجين سەناتتىڭ جالپى وتىرىسىندا.

ول روسكوسموس باسشىلىعىمەن بۇل ماسەلە اۋىزشا تارتىپتە تالقىلانعانىن اتاپ ءوتتى.

"وڭاي شەشىلە سالاتىن دۇنيە ەمەس، جان-جاقتى تالقىعا سالىپ، ارتىق-كەم تۇستارىن قاراستىرۋىمىز كەرەك"، - دەدى نۇرعوجين.

ايتا كەتسەك، بۇگىن سەنات ءماجىلىس ماقۇلداعان "1995 جىلعى 23 جەلتوقسانداعى قازاقستان مەن رەسەي اراسىنداعى بايقوڭىر قالاسىنىڭ مارتەبەسى جانە ونداعى اتقارۋشى وكىمەت ورگاندارىن قۇرۋدىڭ ءتارتىبى مەن ولاردىڭ مارتەبەسى تۋرالى كەلىسىمگە وزگەرىس ەنگىزۋ تۋرالى حاتتامانى راتيفيكاسيالاۋ تۋرالى زاڭدى قابىلدادى.

ۇسىنعان: نازەركە لابيحان