قىسقارتۋعا كوپ جاعدايدا وتە تالانتتى ادامدار ۇشىرايدى. ولاردىڭ جۇمىستان قۋىلۋىنا سەبەپ – قىزمەتىن ناشار اتقارعاندىقتان ەمەس، جاي عانا كورالماۋشىلىقتار نەمەسە شەكتەن تىس قىسىم.
دەسەك تە، ءبىرقاتار جۇمىس بەرۋشىلەر مۇنداي كادرلاردان بويىن اۋلاق ۇستاۋعا تىرىسادى. ءارى قاراي پاراقتاساڭىز، نە ءۇشىن قىزمەتتەن قۋىلعان ماماندى جۇمىسقا الۋ كەرەكتىگىنىڭ بىرنەشە سەبەپتەرىن ايتىپ بەرەمىز.
ولار بىردەن جۇمىسقا كىرىسۋگە دايىن تۇرادى
قازىرگى ۋاقىتتا مامانداردىڭ باسىم بولىگى ەكى نەمەسە ءۇش جۇمىستى قاتار جاساي بەرەدى. جاڭا جۇمىسقا كىرىسكەندە، نەگىزگى جۇمىسىنىڭ شارۋالارىنا الاڭداپ، بەرىلىپ كەتە المايدى. سونداي-اق، ول جاقتا ءالى اياقتالماعان جوبالارى نەمەسە قولىنا تيمەگەن جالاقىسى بولسا، ماسەلەنى ودان ءارى شيەلەنىستىرە تۇسپەك.
ال قىسقارتۋعا ۇشىراعان نەمەسە جۇمىسىنان قۋىلعان ازاماتتار دەرەۋ جاڭا ورىن تابۋعا بەلسەندى كىرىسەدى. ولار جاڭا قىزمەتىنە بىر-ەكى كۇننىڭ ىشىندە ارالاسىپ كەتۋگە دايار. ويتكەنى، ولاردىڭ اياقتاۋى ءتيىس شارۋالارى مەن بۇرىنعى جۇمىس ورىنىندا جاۋاپكەرشىلىكتەرى جوق.
ولاردىڭ كۇشى تاسىپ تۇرادى
ەگەر ۇمىتكەردىڭ جۇمىسقا دەگەن قىزىعۋشىلىعى تومەنگى دەڭگەيدە بولسا، ونىڭ جاڭا ورتاعا ءسىڭىپ كەتۋى ءبىرقاتار قيىندىقتار تۋعىزۋى ابدەن مۇمكىن. سەبەبى، ولاردا قالىپتاسىپ قالعان ورتاسىن، تۇراقتى جالاقىسىن قيماۋ، ەسكى كۇندەردى اڭساۋ سەكىلدى سەزىمدەر باسىمىراق بولادى. بۇنداي تيپتەگى مامانداردىڭ جىگەرىن جانىپ، بارىنشا جانارىنا وت بەرۋ شارت.
ال جۇمىستان قۋىلعان قىزمەتكەرلەردىڭ كوپشىلىگى وزدەرىنىڭ مانساپ جولدارىنىڭ جاڭا باعىتقا اۋىسقانىن سەزىنىپ، سول باعىتتا ءوزىن دالەلدەۋگە تىرىسادى. جاڭا جۇمىسشىنىڭ ءسىزدىڭ كاسىبىڭىز ءۇشىن تىرىسقانى - اقشاعا ساتىپ الا المايتىن قۇندىلىق. ويتكەنى، ول باسەكەلەستىك تۋعىزادى، ول كوماندانى العا سۇيرەيدى.
ولار ەرەكشە ورتاعا بارعىسى كەلەدى
قىزمەتكەرلەر كەي جاعدايدا ىشكى اتموسفەرا ءجوندى بولماعاندىقتان، وزدەرىنىڭ پوتەنسيالىن تولىعىمەن كورسەتۋگە مۇمكىندىك الا المايدى. سول سەبەپتى ونىڭ جۇمىسى اۆتوماتتى تۇردە ناشار حالدە بولادى. كەيىن بارلىعى بەلگىلى... ول جۇمىستان قۋىلىپ تىنعان.
ەندىگى جاڭا جۇمىسىندا ول ءوزىنىڭ قولى جەتپەگەن ىشكى اتموسفەرانى ىزدەيدى. ءسىز جۇمىس بەرۋشى رەتىندە اڭگىمە بارىسىندا كومپانيانىڭ اۋراسى جايلى، قىزمەتكەرلەردىڭ قارىم-قاتىناسى جايلى ايتۋدى ۇمىتپاڭىز.
ولاردىڭ ءبىرقاتارى ۋاقىتشا جۇمىس ىزدەيدى
كەي جاعدايلاردا جۇمىستان قۋىلعان قىزمەتكەرلەر تاماشا تابىس كوزىن نەمەسە قوماقتى قاراجات تاۋىپ الادى. ولار ەندىگى ۋاقىتتا تومەنگى جالاقى مەن تۇراقتى جۇمىسقا قىزىعۋشىلىق تانىتا قويماس. دەگەنمەن، سۇيەگىنە ءسىڭىپ كەتكەن ادەتىنەن ارىلعانشا، قوسىمشا رەتىندە جۇمىس ىزدەۋى مۇمكىن.
ەگەر سىزگە بەلگىلى ءبىر مامان ۋاقىتشا مەرزىمگە قاجەت بولسا، وسى ساناتتان قاراستىرعانىڭىز ابزال.
قىسقارعان قىزمەتكەرلەر – اشىلماعان تالانتتار
وزدەرىڭىزگە ءمالىم، كومپانيا ىشىندەگى قىسقارتۋ ناۋقانىنا جۇمىسىن، جاۋاپكەرشىلىگىن ءجوندى يگەرىپ كەتە الماعان قىزمەتكەرلەر ىلىگەدى.
ال ولار العاشقى قادامدارىن ەندى عانا جاساعان بولسا شە؟ وندا ولاردىڭ بويىندا بۇققان تالانتى بارى انىق. بالكىم، ءسىزدىڭ كومپانياڭىزداعى مانسابىندا جاس قىزمەتكەردىڭ جاڭا تالانتى جارق ەتە تۇسەر؟
