بۇگىن، 15 ءساۋىر كۇنى ءوڭىر باسشىسى نۇرلان نوعايەۆ ءماسليحات دەپۋتاتتارىنا ءوز ەركىمەن قىزمەتتەن كەتكەن بيبوز شاياحمەتوۆتىڭ ورنىنا قۇرمانعازى اۋدانىنىڭ جاڭا اكىمىنىڭ كانديداتتىعىن تانىستىردى. 

وبلىس اكىمى بۇل ورىنعا بۇرىن اتىراۋ وبلىستىق جولاۋشىلار كولىگى جانە اۆتوكولىك جولدارى باسقارماسىن باسقارعان قايرات نۇرتايەۆتى ۇسىندى.
نۇرلان نوعايەۆ اتاپ وتكەندەي، جاڭا اكىم قايرات نۇرتايەۆتىڭ كانديداتتىعى قازاقستان رەسپۋبليكاسىنىڭ پرەزيدەنت اكىمشىلىگىمەن كەلىسىلگەن. دەپۋتاتتار كانديداتتىقتى قولداپ، نۇرتايەۆتىڭ تاجىريبەلى باسشى ەكەنىن ايتتى. 

كەيىن، اۋدان اكتيۆى جيىندا وبلىس اكىمى بۇرىن اتالعان قىزمەتتە بولعان بيبوز شاياحمەتۇلىنا اتقارىلعان جۇمىستار ءۇشىن العىسىن ءبىلدىرىپ، قايرات نۇرتايەۆقا ءبىرقاتار ناقتى تاپسىرمالار بەردى.

قايرات نۇرتايەۆتىڭ ينجەنەر-مەحانيك جانە زاڭگەر ماماندىقتارى بويىنشا ەكى جوعارى ءبىلىمى بار، سونداي-اق، «ەكونوميكا جانە بيزنەس» ماماندىعى بويىنشا ماگيستراتۋرا ءتامامداعان.

2004 جىلدان باستاپ اتىراۋ وبلىستىق ەكونوميكا جانە كاسىپكەرلىكتى قولداۋ باسقارماسىندا باس مامان قىزمەتىن اتقارعان. 2005 جىلدان 2007 جىلعا دەيىن اتىراۋ وبلىستىق جولاۋشىلار كولىگى جانە اۆتوكولىك جولدارى ءبولىمىنىڭ باس مامانى بولدى. 2007 جىلدان باستاپ اتىراۋ وبلىستىق جولاۋشىلار كولىگى جانە اۆتوكولىك جولدارى ءبولىمى باسشىسىنىڭ ورىنباسارى قىزمەتىنە تاعايىندالدى. 2008 جىلدان باستاپ اتىراۋ وبلىستىق جولاۋشىلار كولىگى جانە اۆتوكولىك جولدارى ءبولىمى باسقارماسىنىڭ اۆتوكولىك جولدارى ءبولىمىنىڭ باسشىسى بولدى. 

2010 جىلدان 2017 جىلعا دەيىن اتىراۋ وبلىستىق جولاۋشىلار كولىگى جانە اۆتوكولىك جولدارى باسقارماسى باسشىسىنىڭ ورىنباسارى لاۋازىمىندا بولىپ، 2017 جىلدان بۇگىنگى كۇنگە دەيىن اتىراۋ وبلىستىق جولاۋشىلار كولىگى جانە اۆتوكولىك جولدارى باسقارماسىنىڭ باسشىسى قىزمەتىن اتقاردى.