اتىراۋدا جاستار ءىسى جونىندەگى كەڭەستىڭ كەزەكتى وتىرىسى ءوتتى دەپ حابارلايدى وڭىرلىك كوممۋنيكاسيالار قىزمەتى.

جينالىسقا مەملەكەتتىك ورگانداردىڭ باسشىلارى، وبلىستىق ارداگەرلەر كەڭەسىنىڭ، قوعامدىق جانە كاسىپوداق ۇيىمدارىنىڭ، جاستار بىرلەستىكتەرىنىڭ مۇشەلەرى مەن ستۋدەنتتەر قاتىستى. 

-ەلىمىزدە جاستار اراسىنداعى جۇمىسسىزدىق دەڭگەيى 3،8%،  ال ءبىزدىڭ وڭىردە- 2،4%. بۇگىندە وبلىستاعى ستۋدەنتتەر «ماڭگىلىك ەل»، «جاستار يندۋسترياعا»، «سەرپىن-2050» باعدارلامالارى بويىنشا ءبىلىم الىپ جاتىر. جۇزدەن استام مەكەمەنىڭ باسشىلارىمەن كەزدەسىپ، جۇمىسپەن قامتۋ باعدارلامالارى بويىنشا تۇسىنىك جۇمىستارىن جۇرگىزدىك. باسقارماعا دا مەكەمەلەردەن سۇرانىستار تۇسەدى. بيىل جاستار تاجىريبەسىمەن مەكەمەلەرگە 1000 جاس بارادى. وتكەن جىلى 1186 ادام وقىتۋدان ءوتىپ، 511ء-ى جۇمىسقا ورنالاستى،-دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى سەرىك قاميدوللا.

وبلىس اكىمى كۇن تارتىبىندەگى تاقىرىپ بويىنشا تاپسىرمالار بەردى.
-جاستار تاجىريبەسى- تيىمدىلىگىن كورسەتكەن جوبا. وتكەن جىلى وعان مىڭنان استام جاس قاتىسىپ، جارتىسى جۇمىسقا ورنالاستى، بۇل جاقسى كورسەتكىش. وبلىستا 12 مىڭنان استام مەكەمە بار، ستۋدەنتتەر سولاردا ءبىلىم الا وتىرىپ، وندىرىسكە ارالاسۋعا، وزدەرىن جەتىلدىرۋگە مۇمكىندىك الادى. جوق دەگەندە 2-3 مىڭ كاسىپكەر ۋنيۆەرسيتەت بىتىرگەن جاستارعا تاجىريبەدەن ءوتۋدى ۇسىنادى، ولارعا ەڭبەك اقى جەرگىلىكتى بيۋدجەت ەسەبىنەن تولەنەدى. ەگەر جاس قىزمەتكەر ءوزىن جاقسى قىرىنان كورسەتسە، جۇمىسقا قالدىرادى. ەندى نەگە كۆوتا سانىن كوبەيتپەسكە؟ جوو بىتىرگەن جاستاردىڭ ماماندىقتارى بويىنشا جۇمىسقا ورنالاسقاندارى جاقسى،-دەدى ايماق باسشىسى نۇرلان نوعايەۆ.

سونىمەن قاتار، اتىراۋ وبلىسىنىڭ اكىمى قۇزىرلى ورگاندارعا جۇمىسسىزدىقتىڭ الدىن الۋ ءۇشىن ءار جاس تاجىريبەدەن ءوتۋشىنى جەكە باقىلاۋعا الۋدى تاپسىردى.
 
-كەزىندە ەلباسى ءار مەكتەپ تۇلەگىن باقىلاۋدا ۇستاۋدى تاپسىرعان بولاتىن. كىم قانداي مەكتەپتى ءبىتىردى، قانداي وقۋ ورنىنا ءتۇستى، قانداي قىزمەتكە ورنالاستى؟ ەگەر جۇمىسسىز بولسا،  نەمەن اينالىسۋدا؟ بۇل اۋدان باسشىلارىنىڭ، اۋىل اكىمدەرىنىڭ، وقۋ ورىندارىنىڭ جۇمىسى. جاستار اراسىنداعى جۇمىسسىزدىقتى ازايتۋعا باعىتتالعان شارالار،-دەدى نۇرلان نوعايەۆ.