جامبىل وبلىسىنىڭ اۋماعىندا اۆتوبۋس اۋدارىلعان كەزدە زارداپ شەككەن كەيبىر جولاۋشىنىڭ جاعدايى ءالى مۇشكىل. اۋرۋحاناعا تۇسكەن توعىز ادامنىڭ ۇشەۋى جانساقتاۋ بولىمىندە جاتىر.

بۇل تۋرالى Qamshy.kz اقپارات اگەنتتىگى حابارلايدى، Stan.kz پورتالىنا سىلتەمە جاساپ.

ال، قازا تاپقان 11 جاننىڭ ءمايىتى تۋعاندارىنا تابىستالىپتى. مارقۇمداردىڭ ۇشەۋى وزبەكستان ازاماتى. اتىشۋلى قورداي اسۋىنداعى جول اپاتى قالاي بولعان؟ وعان كىم كىنالى؟

ون ءبىر ادامنىڭ ءومىرىن قيعان جانتۇرشىگەرلىك جول اپاتى قورداي-الماتى تاس جولىندا بولعان. سەنبى كۇنى تاڭعى بەستەر شاماسىندا شىمكەنتتەن شىققان ەكى قاباتتى اۆتوبۋس الدىندا سوقتىعىسىپ تۇرعان ەكى كولىككە قايتا سوقتىعىسپاس ءۇشىن ءرولىن جول جيەگىنە بۇرىپتى. قوعامدىق كولىكتى مىنا تەمىر قورعاندار دا قورعاي الماعان. ءقازىر وقيعا ورنىندا بىردە ءبىر كولىك بولماعانىمەن جانى قينالعان جانداردىڭ قانى جان جاعىندا شاشىراپ جاتىر.

ءبىر-بىرىنىڭ ۇستىنە قۇلاعان جولاۋشىلار شىرت ۇيقىدان شوشىپ وياندىق دەيدى. اراسىندا اۋەلى ءتۇسىم شىعار دەپ ەش قيمىلسىز بۇرىشتا قاتىپ قالعاندار دا بولعان. شىنى شاعىلىپ، شىڭعىرعان داۋىستان بىرەۋدى ەسىتۋ مۇمكىن ەمەس بولعانىن ايتادى. جولدا ادام با، سومكە مە قاراماي، جان باعىپ اۆتوبۋستان شىققانشا اسىعىپتى.

- بىلمەيمىن، ۇيىقتاپ جاتقانمىن.

- قاي جەرلەرىڭىزدە جاراقات؟ قولىڭىز باسىڭىز؟

- مەنىڭ جاراقاتىمدى نە ىستەيسىز؟ كەلىنشەگىمنەن ايىرىلدىم. كەتىڭىزدەرشى انا جاققا.

ايەلىمەن جولعا شىعىپ، قاپيادا ايىرىلىپ قالعان ازاماتتىڭ باسى جارىلىپ، بەتى جىرتىلىپ، قولى سىنعان. وزدىگىمەن جۇرۋگە مۇرشاسى جوق. تىلدەسە المادىق، قايعىدان جۇرەگى قان جىلاپ تۇر.

ال، كۋگاشيەۆتەر اۋلەتى تاشكەنتتەن اكەسىن جەرلەپ قايتىپ كەلە جاتىپتى. ءبىر وتباسىنداعى ۇشەۋى دە امان بولعانىمەن، جاراقاتتارى اۋىر. ءبارى جۇرگىزۋشىنىڭ كىناسى دەيدى.

"بۇل تەك جىلدامدىقتان بولىپ تۇر. ەگەر جاي كەلە جاتقاندا، توقتاتىپ الۋعا بولار ەدى اۆتوبۋستى. اۆتوبۋس تورت-بەس رەت اۋناعان. سۋرەتتەرىن كورگەن شىعارسىڭدار. توبەسى قالماعان"، - دەيدى تۇرعىن باحريددين كۋگاشيەۆ.

ءىشى ادامعا لىق تولى قوعامدىق كولىكتە ەكى جۇرگىزۋشىمەن قوسقاندا 40 جولاۋشى بولعان. ونىڭ 8ء-ى وقيعا ورنىندا جان تاپسىرسا، ۇشەۋىنىڭ دەمى اۋرۋحانادا ۇزىلگەن. قايتىس بولعانداردىڭ كوبى جوعارى قاباتتا جاتقاندار. امان قالعاندارىن ءتۇرلى جاراقاتتارىمەن قوردايداعى اۋرۋحاناعا جەتكىزىپتى. وزبەكستان، تاجىكستان جانە ءوز ەلىمىزدىڭ ازاماتتارى.

"ءبىز وزبەكستاننان ءوز جورالارىمدى تانيمىن. ۇشەۋى بولدى. باسقاسىن تانىمايمىن"، - دەدى وزبەكستان ازاماتى ومىربەك ايتبايەۆ.

"مەن تاجىكستاننانمىن. ءبىز ۇشەۋ ەدىك. مەندە جاقسى. جاراقات جوق"، - دەدى ۆوليدجون دۋسايەۆ.

ابدەن كامەرادان قاشىپ، سويلەۋدەن ۇزىلدى-كەسىلدى باس تارتقاندار اۆتوبۋستاعى جەرلەستەرى جايىندا تولىق اقپارات بەرمەدى. تەك قازاقستانعا ءناپاقا ىزدەپ كەلگەندەرىن ايتتى. ال، ەكى جۇرگىزۋشى ساپ-ساۋ. ەش جەرلەرى جاراقاتتانباعان. اۋرۋحانادان پوليسەيلەر ولاردى دا اپىر-توپىر تەرگەۋگە اكەتتى. تىلدەستىرمەدى. ءبارى قۇددى كەلىسىپ العانداي، كامەرا كورسە، الدى-ارتىنا قاراماي قاشۋدا.

جول اپاتىننا قازا تاپقانداردىڭ مايىتتەرى كۇنى كەشە تۋعاندارىنا تابىستالعان. مارقۇمداردىڭ 8ء-ى قازاقستان، 3-ەۋى وزبەكستان ازامتارى ەكەن. شەكارادان وتكىزدىك دەيدى شەندىلەر. ال، اۋرۋحانادا زارداپ شەككەن توعىز ادام جاتىر، كەيبىرىنىڭ جاعدايى اۋىر.

"ونىڭ ۇشەۋى جانساقتاۋ بولىمىندە. بىرەۋى - وزبەكستان ازاماتى. التاۋى التى ادام ءارتۇرلى بولىمشەلەردە. ەكەۋى  - تاجىكستان ازاماتى"، - دەدى وبلىس اكىمى اسقار مىرزاحمەتوۆ.

جامبىل وبلىسىنىڭ اكىمى قورداي-الماتى تاس جولىندا اپات بولاتىنداي ەشقانداي سەبەپ بولمادى،  ءبارى جۇرگىزۋشىلەردىڭ جۇگەنسىزدىگىنەن دەيدى. ال، وقيعا ورنىن قۇتقارۋشىلار تىپ-تيپىل عىپ تازالاپ كەتكەنىمەن، ءار جەردە ءبىر جولاۋشىلاردىڭ قۇلاقشىنى، مايىسقان اياق كيىمدەرى مەن جۇرگىزۋشىنىڭ ۆيزيتكاسىنا دەيىن شىنى استىندا بۇكتەتىلىپ جاتىر.