باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتىنىڭ ءمۇعالىمىن پىشاقتاپ تاستاۋعا نيەتتەنگەن قازاقستاندىق ستۋدەنتكە قاتىستى ۇكىم شىقتى دەپ حابارلايدى كتك تەلەارناسى. جاسلان قۇدايبەرگەنوۆ ءتورت جىل باس بوستاندىعىنان ايىرىلعان. ول كەسىلگەن مەرزىمدى جالپى رەجيمدەگى كولونيادا وتەيدى.

قۇدايبەرگەنوۆتى سوتتا ماسكەۋلىك ادۆوكات قورعادى. ونى ايىپتالۋشىنىڭ اتا-اناسى جالداعان. ءىستىڭ ءمان-جايىن تەكسەرۋ توعىز ايعا سوزىلدى. وسى ۋاقىت ارالىعىندا جاس جىگىت ءوزىن ۇستاپ وتىرعان قىزمەتكەرلەر ۇستىنەن شاعىم ايتقان جوق جانە قازاقستاندىق ديپلوماتتارمەن جولىعۋدان باس تارتى.

27 جاستاعى جاسلان قۇدايبەرگەنوۆ ورىنبور وبلىسىنىڭ كەڭساي اۋىلىندا دۇنيەگە كەلگەن. بايقوڭىر قالاسىندا تىركەلگەن قازاقستان ازاماتى بولىپ ەسەپتەلەدى. ماسكەۋدە 2011 جىلدان بەرى تۇرىپ جاتىر ەكەن.

وقيعا 2018 جىلدىڭ 29-ماۋسىمىندا ورىن العان. اسپيرانت ۋنيۆەرسيتەتتىڭ اجەتحاناسىندا 28 جاستاعى ءمۇعالىم الەكساندر دميترييەۆكە پىشاقپەن ۇمتىلعان. وقيعا ورىنىنا كەلىپ جەتكەن پوليسيا قىزمەتكەرلەرى جارالى ءمۇعالىمدى تاۋىپ، ونى اۋرۋحاناعا جەتكىزدى. ءوز كەزەگىندە ءمۇعالىم پوليسيا قىزمەتكەرلەرىنە بەلگىسىز ادام جاراقاتتاپ كەتكەنىن ايتقان.

شابۋىل جاساپ، جاراقات سالعان جاسلان وقيعا ورىنىنان ءىز سۋىتقان. كەلەسى كۇنى قالانىڭ ءىىد ونىڭ قولعا تۇسكەنى تۋرالى اقپارات جاريالادى. قازاقستاندىق ازاماتتى ەكى ايعا ۋاقىتشا تەرگەۋ يزولياتورىنا قاماپ، ونىڭ ۇستىنەن "دەنساۋلىققا سانالى تۇردە جاراقات سالۋ" بابى بويىنشا ءىس قوزعالدى.

ال كۇدىكتى ءوز كەزەگىندە شابۋىلىن ەكەۋارا تۇسىنىسپەۋشىلىك پەن ءمۇعالىمدى جاقتىرماۋىنان تۋعان قادام ەكەنىن ايتقان.

ۇسىنعان: ادىلەت مادەنيەت