ايتىس اقىندارى مەن جىرشى-تەرمەشىلەردىڭ حالىقارالىق وداعى "نۇر وتان" پارتياسىنىڭ كانديداتى قاسىم-جومارت توقايەۆتى قولدايدى. بۇل تۋرالى 24 ساۋىردە الماتىدا وتكەن وداق قۇرىلتايىندا ايتىلدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الا وتىرىپ.
وداق ءتوراعاسى ءجۇرسىن ەرمان پرەزيدەنت سايلاۋىنا تۇسپەيتىنىن مالىمدەدى. بۇعان دەيىن قازاقستاندىق كەيبىر اقپارات قۇرالدارى مەن الەۋمەتتىك جەلىدە "ءجۇرسىن ەرمان سايلاۋعا كانديداتۋراسىن ۇسىنباق" دەگەن اقپارات تاراعان.
قۇرىلتايدا ءجۇرسىن ەرمان "اۋەلدە پرەزيدەنت سايلاۋىنا ءتۇسۋدى ويلاعانىن ايتادى. ءبىراق نۇر-سۇلتان جاقتان ءبىر ادامدار "سايلاۋعا قاتىسساڭ، ايتىستىڭ جولىن جاۋىپ الۋىڭ مۇمكىن دەپ ەسكەرتكەن". وسىدان كەيىن ول "سايلاۋعا قاتىسۋ ويىنان اينىعان".
ءجۇرسىن ەرمان پرەزيدەنت سايلاۋىنا ءتۇسىپ، حالىقتىڭ، بيلىكتىڭ نازارىن قازاقتىڭ ايتىس جانە جىر-تەرمە ونەرىنە اۋدارعىسى كەلگەن. ەرماننىڭ ايتۋىنشا، قۇرىلتايعا دەيىن ول الماتى اكىمى، "نۇر وتان" پارتياسىنىڭ الماتى قالالىق فيليالىنىڭ جەتەكشىسى باۋىرجان بايبەكپەن كەزدەسكەن.
"اكىم ايتىستى ءسىز سايلاۋعا تۇسپەسەڭىز دە قولدايمىز دەپ ۋادە بەردى" دەيدى ءجۇرسىن ەرمان.
قازاقستاننىڭ قازىرگى پرەزيدەنتى قاسىم-جومارت توقايەۆتى 23 ساۋىردە "نۇر وتان" پارتياسى پرەزيدەنت سايلاۋىنا كانديدات رەتىندە ۇسىنعان.
سونداي-اق "ۇلى دالا قىراندارى" رەسپۋبليكالىق قوزعالىسى سادىبەك تۇگەلدى، قازاقستان رەسپۋبليكاسى كاسىپوداقتار فەدەراسياسىنان (قركف) امانگەلدى ءتاسپيحوۆتى، "اقجول" پارتياسى ءماجىلىس دەپۋتاتى دانيا ەسپايەۆانى پرەزيدەنت سايلاۋىنا كانديدات رەتىندە ۇسىنعان.
قازاقستاندا كەزەكتەن تىس پرەزيدەنت سايلاۋى 9 ماۋسىمدا وتەدى. كانديداتتاردى ۇسىنۋ 28 ساۋىردە، ال تىركەۋ 11 مامىردا اياقتالادى.
ۇسىنعان: اسەل بولات قىزى
