اقتوبە وبلىسىندا 19 جاستاعى ستۋدەنت جۇمباق جاعدايدا قايتىس بولدى. بويجەتكەننىڭ مۇردەسىن بادامشا اۋىلىنداعى ءبىر ءۇيدىڭ مونشاسىنان تاۋىپتى. مارقۇمنىڭ تۋىستارى بولسا، قىزىمىز ول ۇيگە بارماق تۇگىلى، ءتىپتى جاقىن ارالاسقان كورشىلەرىمىز دە ەمەس دەپ وتىر. ساراپتاما كەۋدەسىنەن تىزەسىنە دەيىن دىمى قالماي كۇيىپ قالعان قىزدىڭ يىستەن ۋلاندى دەپ قورىتىندى شىعارعان. الايدا، مارقۇمنىڭ جاقىندارى مۇنىمەن كەلىسپەيدى. ولار بىرەۋلەر قىلقىندىرىپ ءولتىرىپ، سوسىن ۇستىنە ىستىق سۋ قۇيعان دەپ وتىر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىنە سۇيەنىپ حابارلايدى.

جۇلدىزدىڭ جاسى نەبارى 19-دا بولعان. وتباسىنداعى ءۇش بالانىڭ كەنجەسى ءارى جالعىز قىز. اۋىلىنداعى كوللەدجدە اسپاز ماماندىعىنا وقىپ ءجۇرىپتى. سىرقاتتانىپ جۇرگەن اناسىنا قولقابىس بولسىن دەپ، سونداعى ءدامحانادا جۇمىس ىستەگەن. 

«مەن نكەلىسپەيمىن، ول دەگەن ءولىم. مەن ەشقانداي قىزىمدى قيا المايمىن. ول وزىنەن ءوزى بارىپ بىرەۋدىڭ مونشاسىن جاعا المايدى. بىرىنشىدەن، اراق ىشپەيدى، تەمەكى تارتپايدى، ول قالاي بىرەۋدىڭ مونشاسىنا باراتىنىن ايتا المايمىن»، - دەيدى مارقۇمنىڭ اناسى كەنجە تولەشوۆا.

وقيعا بادامشا اۋىلىندا بولعان. جاقىندارىنىڭ ايتۋىنشا، جۇلدىز تۇنگى ساعات 1-دە ءدامحانادان جۇمىستان شىققان. ال ءولى دەنەسىن ەرتەسىنە كۇندىزگى ساعات 11-لەردە تابادى. تاۋىپ العان - مونشانىڭ قوجايىنىنىڭ ۇلى ەكەن. ول جەرگە جۇلدىزدىڭ قالاي بارعانى، كىممەن بارعانى جاقىندارىنا ءالى كۇنگە - جۇمباق. 

"قارىنداسىمدى بىرەۋ شاقىرىپ العان يلي دالادان اكەلىپ، ۇستىنە ىستىق سۋ قۇيعان. سول سەبەپتى قايتىس بولعان. ەندى زاكليۋچەنيە بەرىپ تۇر، «ۋگارنىي گاز» دەپ. يەسى ايتادى، «مەندە ءبارى جاقسى ىستەيدى، پەچكا دا دۇرىس، «دەيستۆۋيۋششايا بانيا» دەپ تۇر!" - دەيدى مارقۇمنىڭ اعاسى مارات تولەشوۆ.

«ەندى، كۇمانىمىز بار، ادەيى ولتىرگەن شىعار... قىلعىندىرعان سياقتى، مويىنىندا ءبىر ىزدەر تۇرعان سياقتى»، - دەپ ايتادى مارقۇمنىڭ جەڭگەسى جۇماگۇل تولەشوۆا.

قايعىلى جاعدايدان بەرى 10 كۇن وتكەن. ءبىراق، اعايىندارى ءالى كۇنگە تەرگەۋشىلەردەن ماردىمدى جاۋاپ الا الماي ءجۇرمىز دەيدى. ءىستىڭ تۇسىنىكسىز تۇستارى كوپ ەكەننى ايتادى. 

"ماعان قوڭىراۋ شالىپ جۇرەگى توقتاپ قالدى دەدى. ەندى مىنا قاعازدا گازبەن ۋلاندى دەدى"، - دەپ ايتتى كەنجە تولەشوۆا.

ادىلدىك ىزدەگەن تولەشوۆتەر پروكۋرورلارعا شاعىمدانباسقا امالىمىز قالمادى دەپ وتىر. ويتكەنى، تەرگەۋشىلەر ءىستىڭ مان-جايىمەن تانىستىرماق تۇگىلى، قىلمىستىق ءىستىڭ قاي باپپەن قوزعالعانىن دا ايتپاپتى. 

"جازباشا ارىزدى ءبىز قابىلدادىق، ءتيىستى تارتىپپەن تىركەلەدى. سوسىن، زاڭدا بەكىتىلگەن مەرزىمدە ارىز قارالىپ، قىلمىستىق ءىس مىندەتتى تۇردە زەرتتەلەدى"، - دەپ مالىمدەدى وبلىستىق پروكۋراتۋرا تەرگەۋ باسقارماسىنىڭ باسشىسى تيمۋر قىدىرالين.

جۇلدىزدىڭ جاقىندارى ونىڭ اقجارقىن، پىسىق، وعاش قىلىعى جوق، ەركە بولعانىن ايتادى. كوللەدجدى اياقتاپ، ديپلومىن الۋىنا دا نەبارى ساناۋلى ۋاقىت قالعان ەكەن. 

مارقۇمنىڭ جاقىندارى بويجەتكەن يىستەن ۋلانىپ ءولدى دەگەنگە مۇلدەم سەنبەيدى. سوت-مەديسينالىق ساراپتاماسىنىڭ قورىتىندىسىنا دا كۇمانمەن قاراپ وتىر. سوندىقتان، مايىتكە ەكسگۋماسيا جاساۋعا ارىزدانىپ قويعان.

ۇسىنعان: نازەركە لابيحان