قازاقستاننىڭ اقپارات جانە قوعامدىق دامۋ ءمينيسترى داۋرەن ابايەۆ "الماتى مارافون" كەزىندە "شىندىقتان قاشا المايسىڭ" دەگەن جازۋى بار پلاكات ۇستاپ شىققان بەلسەندىلەردىڭ ۇستالىپ، 15 تاۋلىككە قامالۋىنا قاتىستى پىكىر ءبىلدىردى.

ءوز سوزىندە مينيستر سوت شەشىمىنە قاتىستى پىكىر بىلدىرە المايتىنىن ايتتى دەپ حابارلايدى Qamshy.kz اقپارات اگەنتتىگى Stan.kz سايتىنا سىلتەمە جاساپ.

ابايەۆ بۇعان دەيىن ىشكى ىستەر ءمينيسترى ەرلان تۇرعىمبايەۆ قۇقىق قورعاۋ ورگاندارىنىڭ بەلسەندىلەردى نە ءۇشىن تۇتقىنداعانىن تۇسىندىرگەنىن اتاپ ءوتتى.

"لاۋازىمدى تۇلعا، مەملەكەت قىزمەتكەرى رەتىندە سوت شەشىمىنە قاتىستى پىكىر بىلدىرە المايمىن. ونىڭ ۇستىنە، سوت وتىرىسىنا قاتىسپادىم، ءىس ماتەريالدارىمەن تانىس ەمەسپىن" – دەيدى مينيستر.

الايدا اقپارات ءمينيسترى ازامات جانە ب ا ق قولدانۋشىسى رەتىندە پىكىر بىلدىرە الاتىنىن ايتتى.

"كىم نە دەسە دە، بۇل ساياسي ناۋقان. سەبەبى سونىڭ كريتەريلەرىنە ساي كەلەدى. بىرىنشىدەن، بۇل جاريالىلىق، ەكىنشىدەن، ۇندەۋدىڭ بولۋى، ۇشىنشىدەن، ساياسي وقيعامەن، ياعني سايلاۋمەن بايلانىستىرۋ.

مەملەكەت باسشىسى سايلاۋ پروسەسىنىڭ اشىقتىعىن نەگىزگى ارتىقشىلىق دەپ اتادى. سوندىقتان، ازاماتتىق باستاما رەتىندە بەلسەندىلەردىڭ ارەكەتىن قولدايمىن. الايدا، ىشكى ىستەر ءمينيسترى ايتقانداي، مۇنداي ناۋقاندار زاڭ اياسىندا وتكىزىلۋى ءتيىس"، - دەيدى داۋرەن ابايەۆ.

ەسكە سالا كەتسەك، 21 ساۋىردە الماتىدا وتكەن مارافون كەزىندە ءال-فارابي داڭعىلى مەن شاشكين كوشەسىنىڭ قيىلىسىندا "شىندىقتان قاشا المايسىڭ»" "#مەنىڭ تاڭداۋىم بار"، #ADILSAILAYUSHIN دەگەن جازۋى بار پلاكات ۇستاعان ادامدار تۇتقىندالدى. ارتىنشا ولار 15 تاۋلىككە قامالدى. ىشكى ىستەر ءمينيسترى بەلسەندىلەردىڭ ۇستالۋىنىڭ سەبەبىن ءتۇسىندىردى.

ۇسىنعان: ادىلەت مادەنيەت