اتىراۋ وبلىسىندا وڭىرلىك«ىسكەر انا» جوباسىن جۇزەگە اسىرۋ جالعاسۋدا. كوپبالالى، جالعىزباستى جانە ەرەكشە قاجەتتىلىگى بار بالالاردى تاربيەلەپ وتىرعان انالارعا، از قامتىلعان وتباسىلار ايەلدەرىنە ارنالعان قىسقا مەرزىمدى جاڭا ماماندىق الۋ كۋرستارى ۇلكەن سۇرانىسقا يە.

"ازاماتتىق ورتالىق" جۇزەگە اسىرىپ جاتقان جوبا اياسىندا بۇگىندە وقۋ كۋرستارىنا 519 ادام ءوتىنىش بىلدىرگەن.
جوبانى جۇزەگە اسىرۋ بارىسىندا وقۋ كۋرستارىنان وتكەن 100 ادام جاڭا ماماندىققا يە بولىپ، سەرتيفيكات الدى. 108 ايەل وقۋلارىن جالعاستىرۋدا.

كۋرستارعا قاتىسۋشىلارعا 10 ماماندىق ءتۇرى تاڭداۋعا بەرىلگەن: تىگىنشى، اسپاز، سۋلىلىق سالونىنىڭ شەبەرى( مانيكيۋر، بەت ارلەۋشى)، شاشتاراز، ەسەپشى، ماسساجيست، اعىلشىن ءتىلى كۋرسى، وندىرىستىك ءىس، ساتۋشى. جوبانىڭ ماقساتى- ماماندىعى مەن جۇمىسى جوق ايەلدەردىڭ ءوزىن ءوزى قامتاماسىز ەتۋىنە قول جەتكىزۋ.

كۋرستار اياقتالعان سوڭ ەڭ ۇزدىك بىتىرۋشىلەر جەكە بيزنەس اشۋ ءۇشىن جابدىقتار الا الادى. ول ءۇشىن npoatyrau.kz سايتىنا كىرىپ، ءوتىنىمدى تاپسىرۋ قاجەت. بۇگىنگى كۇنى 46 ادام وسىنداي جابدىقتارعا يە بولدى (ماكياج جيىنتىقتارى، تىگىن ماشينالارى، ماسساجدىق كيىمدەر، شاشتاراز قۇرىلعىلارى جانە ت.ب.).

سونىمەن قاتار، قاتىسۋشىلار پسيحولوگيالىق ترەنينگتەن وتەدى، ءوز بيزنەسىنىڭ بولاشاعىن ناسيحاتتاۋدى ۇيرەنەدى، الەۋمەتتىك جەلىلەردە ءوزارا ارەكەتتەسۋدىڭ نەگىزدەرىمەن تانىسادى.

«بۇل انالارعا جاڭا ماماندىقتار بەرۋمەن قاتار، ولارعا وتباسىنىڭ جانە جاس ۇرپاقتىڭ بولاشاعىنا دەگەن سەنىم سىيلايدى»- دەيدى جوبانىڭ قاتىسۋشىلارى.

ايتا كەتەيىك، بۇل جوبا اتىراۋ وبلىسىنىڭ اكىمى نۇرلان نوعايەۆتىڭ حالىققا ەسەپ بەرۋ كەزدەسۋىندەگى تاپسىرماسىنان باستاۋ الدى.