مەديسينالىق ساقتاندىرۋ قورى ساراپشىلارى «ماڭعىستاۋمۇنايگاز» اق باسقارماسى قىزمەتكەرلەرىمەن كەزدەستى. وندا 2020 جىلدىڭ 1 قاڭتارىنان باستاپ ەنەتىن مىندەتتى الەۋمەتتىك مەديسينالىق ساقتاندىرۋ  (ءمامس) جۇيەسى تۋرالى كەڭ تالقىلاندى.

         «دەنساۋلىق سالاسىنداعى قىزمەت كورسەتۋدىڭ ساپاسى مەن قولجەتىمدىلىگىن ارتتىرۋ – ءمامس جۇيەسىنىڭ باستى ماقساتى» - دەپ اتاپ ءوتتى ءمامس قورى ماڭعىستاۋ فيليالىنىڭ ديرەكتورى باقىت تورعايباي ۇلى يسماحانبەتوۆ.

-بۇگىنگى تاڭدا قاراپايىم حالىقتىڭ قىمبات مەديسينالىق قىزمەتتەرگە قالتاسى كوتەرە بەرمەيدى. دارى-دارمەكتەردىڭ دە قۇنى ارزان ەمەس. وسى ماقساتتا مەملەكەتىمىز ەگجەي-تەگجەيلى ساراپتاپ، اۋقىمدى زەرتتەۋ جۇرگىزۋ ناتيجەسىندەمەديسينالىق ساقتاندىرۋ جۇيەسىن ەنگىزۋدى جوسپارلاپ وتىر. بۇل جاڭالىق حالىقتىڭ الەۋمەتتىك تۇرمىسىن جاقسارتۋعا سەپتىگىن تيگىزەدى. ساقتاندىرىلعان ازاماتتار ماگنيتتى-رەزونانستى توموگرافيا (مرت)، كت سياقتى قىمبەت زەرتتەۋلەردەن تەگىن وتە الادى، سونداي-اق بۇيرەك، باۋىر، جۇرمەك اۋىستىرۋ سياقتى كۇردەلى وتالاردى اقىسىز جاساتاتىن بولادى، - دەدى ول.

         باقىت تورعايباي ۇلىنىڭ ايتۋىنشا، مىندەتتى الەۋمەتتىك مەديسينالىق ساقتاندىرۋ پاكەتىنە كىرمەيتىن مەديسينالىق قىزمەتتەردىڭ جەكەلەگەن تۇرلەرى ەرىكتى مەديسينالىق ساقتاندىرۋ (بۇدان ءارى – ەمس) ارقىلى تولەنۋى مۇمكىن، مىسالى: ەرەسەكتەرگە ارنالعان ستوماتولوگيا، زياندى وندىرىستەردە جۇمىس ىستەيتىن قىزمەتكەرلەر ءۇشىن مىندەتتى مەرزىمدىك تەكسەرۋلەر، ساناتوريالىق-كۋرورتتىق ەمدەۋ جانە ت.ب. بارلىعى كاسىپورىننىڭ قالاۋى مەن قارجىلىق مۇمكىندىكتەرىنە بايلانىستى. جەكە تۇلعا نەمەسە كاسىپورىن (ۇجىمدىق شارت نەگىزىندە) ءمامس پاكەتىندە قىزمەتتەردى قايتالامايتىن ەمس قىزمەتتەر پاكەتىن تاڭداي الادى.

         بۇل جەردە ەسكەرتە كەتەتىن جايت، ولكەمىزدە ءىرى كاسىپورىندار بولماسا، ءوز جۇمىسشىلارىنا ەمس پاكەتىن ۇسىنۋعا بارلىق بىردەي مەكەمەنىڭ مۇمكىندىگى جەتە بەرمەيدى.

         2019 جىلدىڭ 1 قاڭتارىنان باستاپ قازاقستاندا ءوزىن-وزى جۇمىسپەن قامتىعان ازاماتتارعا سالىق تولەۋ رەجيمىنىڭ جاڭا ءتۇرى ءبىرىڭعاي جيىنتىق تولەم (بجت) ەنگىزىلدى. بجت ايلىق تولەم كولەمى: 1 اەك – رەسپۋبليكالىق، وبلىستىق ماڭىزى بار قالا تۇرعىندارى ءۇشىن (2 525 تەنگە)؛ 0،5 اەك – اۋىل تۇرعىندارى ءۇشىن (1 263 تەنگە). ءبىرىڭعاي جيىنتىق تولەمنىڭ 40%-ى مەديسينالىق ساقتاندىرۋ قورىنا اۋدارىلادى. 

         مۇنايشىلار  جەكە ەمحانالاردا تەگىن قارالۋ قانشالىقتى قولجەتىمدى ەكەندىگىن سۇرادى. ماڭعىستاۋ تۇرعىندارى مەديسينالىق ساقتاندىرۋ قورىنىڭ جەرگىلىكتى فيليالىمەن كەلىسىمشارت جاساسقان جەكە ەمحانالاردا تەگىن ەم قابىلداي الادى.