جىل سايىن 17 ءساۋىر كۇنى كوپشىلىك ەل دۇنيەجۇزىلىك گەموفيليامەن كۇرەس كۇنىن اتاپ وتەدى. وسى ماقساتتا دۇنيەجۇزىلىك گەموفيليا فەدەراسياسى مەن ددۇ اكسيالارىنا قوسىلادى.

            گەموفيليا – قاننىڭ ۇيۋىنا اسەر ەتەتىن VIII جانە IX فاكتورلاردىڭ جەتىسپەۋشىلىگىنەن تۋىندايتىن جانە تۇقىم قۋالايتىن اۋرۋ. ناۋقاستىڭ قانى وتە سۇيىق بولعاندىقتان، ادام دەنەسىن سوعىپ، ۇرىپ السا، ءتىس جۇلدىرعاندا قان توقتامايدى.

            الەمدە 400 مىڭعا جۋىق گەموفيلياعا شالدىققان ناۋقاس بار. ال قازاقستاندا 1273 ادام تىركەۋدە تۇر، ولاردىڭ 34 پايىزى – بالالار.

            گەموفيليانى ەمدەۋدەگى باستى ماقسات – سۇيىق قاننىڭ اعۋىن توقتاتۋ. ول ءۇشىن قۇرامىندا قاننىڭ قويۋلانۋىنا اسەر ەتەتىن پرەپارات پايدالانىلادى. ءدارى دونورلىق پلازمادان، گەننو-ينجەنەرلىك ادىسپەن الىنادى.قازاقستان مۇنداي پرەپاراتتى 2010 جىلدان پايدالانا باستادى. ءدارى ناۋقاستارعا مەملەكەت ەسەبىنەن تەگىن بەرىلەدى.

            ايتا كەتەيىك، ەلىمىزدە تەگىن دارى-دارمەكتىڭ شىن مانىندە مۇقتاج ناۋقاستارعا جەتىپ وتىرعاندىعى SMS-حابارلاما ارقىلى قاداعالاناتىن بولادى.حابارلامادا رەسەپتىنىڭ ءنومىرى مەن ءدارىنىڭ بەرىلگەن كۇنى كورسەتىلەدى. پرەپاراتتار شىن مانىندە قولىنا تيمەگەن پاسيەنتتەر SMS-حابارلاماعا جاۋاپ رەتىندە «0» سيفرىن جولداي الادى نەمەسە «سق-فارماسيا» ءجشس-نىڭ 1439 بايلانىس نومىرىنە قوڭىراۋ شالسا بولادى. 

            «مىندەتتى الەۋمەتتىك مەديسينالىق ساقتاندىرۋ قورى» ماڭعىستاۋ فيليالىنىڭ حابارلاۋىنشا، 2019 جىلدىڭ العاشقى توقسانىندا وڭىرىمىزدە دارى-دارمەكپەن قامتاماسىز ەتىلمەگەن 12 جاعداي كەزدەسكەن.

            بيىل قازاقستان بيۋدجەتىنەن گەموفيليامەن اۋىراتىندارعا 7،1 ملرد تەڭگە بولىنگەن.