اۋىر سالماقتا ونەر كورسەتەتىن قازاقستاندىق بوكسشى الي بالويەۆ (8-0، 7 كو)، بريتانيالىق MTK Global كومپانياسىمەن كەلىسىمشارتقا وتىرۋىنا قاتىستى ويىن ايتتى دەپ حابارلايدى Qamshy.kz اقپارات اگەنتتىگى Vesti.kz. سايتىنا سىلتەمە جاساپ.

كەلىسىمشارتقا قول قويىلعانى تۋرالى 13 مامىردا رەسمي جاريالاندى. كومپانيا بالويەۆتى "MTK Global گالاكتيكاسىنداعى جاڭا جۇلدىز" رەتىندە تانىستىرىپ، "قازاقتىڭ سوڭعى پاتشاسى" دەپ اتادى. 

"الەمدەگى ۇزدىك مەنەدجەرلىك كومپانيامەن كەلىسىمشارتقا قول قويىلعانىن ماقتان تۇتامىن. ولار ماعان ماقساتىما جەتۋگە كومەكتەسەدى دەگەن سەنىمدەمىن. قازاقستاندىق بوكستىڭ التىن ءداۋىرى كەلە جاتىر، ال سۇلتان زاۋربەك، ءابىلقايىر شەگالييەۆ، ۆيكتور كوتوچيگوۆ، نۇرتاس اجبەنوۆ جانە جاڭقوش تۇراروۆ سياقتى بوكسشىلارى بار MTK Kazakhstan ۇلكەن كۇش. 

مەنىڭ ماقساتىم بار - ول الەم چەمپيونى بولۋ. بۇل كەلىسىمشارت مەنىڭ ارمانىمدى جاقىن ەتەدى، مەنەدجەرلەردىڭ كومانداسىمەن جۇمىستى اسىعا كۇتەمىن"، - دەپ كەلتىرەدى بالويەۆتىڭ ءسوزىن MTK Global باسپا ءسوز قىزمەتى.

26 جاستاعى بالويەۆ كاسىپقوي رينگتە 2017 جىلدان جۇدىرىقتاسادى. ول پولشادا باستاپ، قازاقستان، اقش جانە رەسەيدە جەكپە-جەكتەر وتكىزگەن. 

MTK Global ءىسىن جۇرگىزەتىن اتاقتى بوكسشىلار قاتارىندا تايسون فيۋري (27-0-1، 19 كو) جانە بيللي دجو سوندەرس (27-0، 13 كو) بار. ءقازىر بۇل كومپانيا بوكسپەن عانا شەكتەلمەي، مما-دە ءىس جۇرگىزىپ كورۋدە.

ۇسىنعان: ماقپال سەمباي