اتىراۋ وبلىسىنىڭ اكىمى نۇرلان نوعايەۆ ءبىلىم بەرۋ باسقارماسىنىڭ باسشىلىعىنا مۇعالىمدەردى جۇمىسقا تارتۋ بويىنشا جۇمىستى كۇشەيتۋدى تاپسىردى. بۇگىنگى كۇنگە دەيىن وقۋ ورىندارىندا 472 ۇستاز تاپشى. نەگىزىنەن، ورىس ءتىلدى مەكتەپتەردە.

- ءبىز وسى ساۋال بويىنشا جۇمىستانۋدامىز. وبلىستىڭ ءبىرقاتار وقۋ ورىندارىن ارالادىق. بيىلعى جىلى 174 جاس مامان كەلەدى دەپ جوسپارلانۋدا،- دەپ ناقتىلادى اتىراۋ وبلىستىق ءبىلىم بەرۋ باسقارماسى باسشىسىنىڭ مىندەتىن اتقارۋشى جانسۇلۋ تورەمۇراتوۆا.

ءوڭىر باسشىسى نۇرلان نوعايەۆ مامان تاپشىلىعى جاعدايىندا قازاقستاننىڭ وزگە وبلىستارىنان تاجىريبەلى پەداگوگتاردى شاقىرتۋ كەرەكتىگىن ايتتى.

- قاجەتتى مامانداردى ءبىزدىڭ وڭىرىمىزگە شاقىرىڭىزدار. ءبىز ولارعا بارلىق جاعدايدى جاساپ، ۇيمەن قامتاماسىز ەتۋگە دايىنبىز. بۇل مەكتەپ ديرەكتورلارىنا دا قاتىستى. كونكۋرس جاريالاپ، تاجىريبەلى مامان قويىڭدار. ەشكىم سىزدەرگە كەدەرگى كەلتىرىپ، قارسى تۇرا المايدى،- دەپ اتاپ ءوتتى ايماق باسشىسى.

سونداي-اق، وبلىس اكىمى ايتا كەتكەندەي، مامان ىزدەۋ جۇمىسىن تەك ءبىلىم بەرۋ باسقارماسى عانا ىسكە اسىرماي، بارلىق دەڭگەيدەگى اكىمدەر دە جۇزەگە اسىرۋى ءتيىس. وسىنداي جاعدايدا عانا ماسەلە ءوز شەشىمىن تاباتىن بولادى. بۇدان باسقا، ايماق باسشىسى وقۋ ورىندارىنداعى جوندەۋ جۇمىستارىن ءوز ۋاقىتىندا اياقتاۋدى تاپسىرىپ، جۇمىستاردىڭ جۇرگىزىلۋى وقۋ پروسەسىنە كەدەرگى كەلتىرمەۋ كەرەكتىگىن ايتتى. جازعى دەمالىس تاقىرىبى دا قوزعالدى، نۇرلان نوعايەۆ وقۋ لاگەرلەرىن بالالارعا تابيعي قولايلى جاعداي جاسالعان جەرلەردە وتكىزۋدى تاپسىردى.