اتىراۋ وبلىسىنىڭ اكىمى نۇرلان نوعايەۆ ءبىلىم بەرۋ سالاسى قىزمەتكەرلەرىمەن وتكىزگەن جينالىستا: - مەكتەپ ديرەكتورلارى مەملەكەتتىك ساتىپ الۋدىڭ قيىن راسىمدەرىنە قاتىسۋدىڭ ورنىنا ءوز مىندەتتەرىن اتقارۋلارى ءتيىس ، - دەدى.

نۇرلان نوعايەۆ مەكتەپ ديرەكتورلارىن بۇل پروسەسكە قاتىستىرماي، مەملەكەتتىك ساتىپ الۋ راسىمدەرىن جۇيەلەندىرۋدى جانە ورتالىقتاندىرۋدى تاپسىردى.

-مەكتەپ ديرەكتورلارى ءوز قۇزىرەتتەرىندەگى ماسەلەلەرمەن عانا اينالىسۋلارى كەرەك. مەملەكەتتىك ساتىپ الۋ راسىمدەرىنە قاتىسۋعا مىندەتتى ەمەس جانە بۇل جۇمىستى ورتالىقتاندىرۋ قاجەت. مەملەكەتتىك ساتىپ الۋ سالاسىن دۇرىس بىلمەگەندىكتەن، مەكتەپتەردە قاتەلىكتەر كەتەدى، سونىڭ كەسىرىنەن ساپاسىز تاۋارلار الىنىپ جاتادى، ال ول وقۋ پروسەسىنە كەرى اسەرىن تيگىزەدى. باسقا دا پروبلەمالار بار. ءار مەكتەپ ىستىق تاماق جەتكىزۋشىنى ءوزى انىقتايدى، سوندىقتان ءبىلىم بەرۋ مەكەمەلەرىندە اس ءمازىرى ءار ءتۇرلى. اتا-انالار تاراپىنان شاعىمدار بار. ورتالىقتاندىرۋ ارقىلى وسى جاعدايدى تۇزەۋگە بولادى، - دەپ اتاپ ءوتتى نۇرلان نوعايەۆ.

وبلىس اكىمىنىڭ ءبىرىنشى ورىنباسارى سەرىك شاپكەنوۆ بۇل باعىتتاعى جۇمىستار ءجۇرىپ جاتقانىن ايتتى. جاقىن ۋاقىتتا مەكتەپ ديرەكتورلارى مەملەكەتتىك ساتىپ الۋ ماسەلەلەرىمەن اينالىسپايتىن بولادى، سونداي-اق، بۋحگالتەرلىك ەسەپتى ورتالىقتاندىرۋ جوسپارلانىپ وتىر.

ء-قازىر بارىنە سيفرلىق ۇلگىدە قاراپ وتىرۋعا بولادى. ءبارى انىق، قولجەتىمدى كورسەتىلەتىن باعدارلاما قۇرۋ كەرەك. ءار وقىتۋشى ءوزىنىڭ قانشا جۇمىس ىستەپ، قانداي ەڭبەكاقى الاتىنىن كورىپ وتىرۋى ءتيىس. سول كەزدە قىزمەتكەرلەردىڭ وقۋ ساعاتتارىنا اقى تولەۋ توڭىرەگىندەگى ساۋالدارى مەن تالاپتارى بولمايدى،-دەدى نۇرلان نوعايەۆ.