حالىقارالىق وليمپيادا كوميتەتىنىڭ باسشىسى، دوكتور توماس باح قازاقستان ۇوك پرەزيدەنتى تيمۋر قۇلىبايەۆقا حات جولداپ، ونى قوعاممەن بايلانىس جانە سپورت ارقىلى الەۋمەتتىك دامۋ جونىندەگى (Public Affairs and Social Development through Sport Commission، PASD) حوك كوميسسياسىنىڭ مۇشەسى اتانۋىمەن قۇتتىقتادى، دەپ حابارلايدى Qamshy.kz اقپارات اگەنتتىگى ۇلتتىق وليمپيادا كوميتەتىنىڭ باسپا ءسوز قىزمەتىنە سىلتەمە جاساپ.

«ءسىزدى PASD كوميسسياسىنىڭ مۇشەسى ەتىپ تاعايىنداعانىما قۋانىشتىمىن. سىزگە ارىپتەستىگىڭىز ءۇشىن العىس ايتا وتىرىپ، جاقىن ارادا كەزدەسەتىنىمىزگە سەنىمدىمىن» دەلىنگەن حاتتا.

اتالعان كوميسسيا بۇعان دەيىن حالىقارالىق قاتىناستار جونىندەگى كوميسسيا دەپ اتالاتىن. PASD نەگىزگى مىندەتتەرى قاتارىنا حوك سەسسيالارىن وتكىزۋ، ۇيىمنىڭ اتقارۋشى كوميتەتى مەن حوك پرەزيدەنتىنە الەمدەگى سپورت پەن وليمپيزم ءرولىن دامىتۋ ستراتەگيالارىن ءتۇسىندىرۋ، وليمپيادالىق قوزعالىستى دامىتۋ، بۇۇ جانە وليمپيادالىق ويىنداردان بولەك وزگە دە ۇيىمدارمەن بايلانىس ورناتۋ جونىندە كەڭەس بەرۋ جاتادى.

كوميسسيا قۇرامىنا حوك اتقارۋشى كوميتەتىنىڭ مۇشەلەرى، ۇوك باسشىلارى، حالىقارالىق فەدەراسيالار مەن سپورتتىق ۇيىم جەتەكشىلەرى كىرەدى. اتاپ ايتار بولساق، حالىقارالىق جەڭىل اتلەتيكالىق فەدەراسيالار قاۋىمداستىعىنىڭ IAAF باسشىسى سەباستيان كوە مەن حالىقارالىق ترياتلون فەدەراسياسىنىڭ ITU پرەزيدەنتى ماريسول كاسادو جانە تاعى باسقا دا تانىمال سپورت تۇلعالارى. كوميسسياعا حوك مۇشەسى ءارى امەريكاارالىق دامۋ بانكىنىڭ باسشىسى، بۇكىلالەمدىك ەكونوميكالىق فورۋم قورى باسقارماسىنىڭ مۇشەسى، كولۋمبيالىق مورەنو لۋيس البەرتو جەتەكشىلىك ەتەدى.

قازاقستان ۇوك باسشىسى 24 مامىر كۇنى لوزاننادا (شۆەيساريا) وتەتىن ۇلتتىق وليمپيادالىق كوميتەتتەر قاۋىمداستىعى (ۇوكق) اتقارۋشى كوميتەتىنىڭ 78ء-شى وتىرىسىنا قاتىسادى دەپ جوسپارلانۋدا.

ەسكە سالا كەتەيىك، بىلتىر جىل سوڭىندا وتكەن ۇوكق باس اسسامبلەياسىنىڭ وتىرىسىندا ت. قۇلىبايەۆتى 2022 جىلعا دەيىنگى ۇوكق اتقارۋشى كوميتەتىنىڭ مۇشەسى ەتىپ تاعايىنداعان بولاتىن. ۇمىتكەرلەر الەمدەگى بارلىق 206 ۇوك اراسىنان قاراستىرىلدى. اتقارۋشى كوميتەت قۇرامىنا قۇرلىقتىق قاۋىمداستىقتار ۇسىنعان 24 ماڭىزدى سپورتتىق فۋنكسيونەر ەنگەن بولاتىن.  سونداي-اق، تيمۋر قۇلىبايەۆ ازيا وليمپيادالىق كەڭەسىنىڭ ۆيسە-پرەزيدەنتى. ول وسى قىزمەتىنە بيىلعى مامىردا قايتا تاعايىندالدى.

ۇسىنعان: مارجان سابەت