سوعىس سويقانى بولىپ جاتقان سيريادا ءالى كۇنگە دەيىن 300 قازاقستاندىق قالىپ وتىر. ولاردىڭ ىشىندە 170 بالا بار. بۇل تۋرالى قازاقستاننىڭ ۇقك باسشىسى باقىتبەك راحىمبەردييەۆ مالىمدەمە جاسادى دەپ حابارلايدى Qamshy.kz اقپارات اگەنتتىگى.

"ەر ادامدار، ايەلدەر جانە بالالاردى قوسقاندا، ءالى كۇنگە دەيىن سيريا جەرىندە 300 قازاقستاندىق ءجۇر"، - دەدى راحىمبەردييەۆ دۇيسەنبى كۇنى نۇر-سۇلتان قالاسىندا وتكەن بريفينگتە.

تۇڭعىش پرەزيدەنت باستاماسىمەن، قاسىم-جومارت توقايەۆتىڭ شەشىمىمەن 7-9 مامىر ارالىعىندا سيريا جەرىنەن "جۋسان" وپەراسياسىمەن 231 قازاقستاندىق قايتارىلعان-دى. ولاردىڭ ىشىندە 16 ەر ادام، 59 ايەل جانە 156 بالا بار.

ەلىنە ورالا سالىسىمەن 16 ەر ادام جانە 4 ايەل قازاقستاندا تىيىم سالىنعان "دايش" ۇيىمىنىڭ جاعىندا تەررورلىق مۇددەدە قىزمەت جاسادى دەگەن ايىپپەن قاماۋعا الىندى.

قالعاندارى اقتاۋ قالاسىنا جاقىن ماڭدا ورنالاسقان بەيىمدەلۋ ورتالىعىنا ورنالاستىرىلدى. ولارمەن پسيحولوگتار، بىلىكتى دارىگەرلەر جۇمىس جاساۋدا. بەيىمدەلۋ ۇدەرىسى ءبىر ايعا جۋىق ۋاقىتقا جوسپارلانعان.

بالالاردىڭ كوپشىلىگى مەكتەپ جاسىنا دەيىنگىلەر. ولاردىڭ ىشىندە 18 جەتىم بالا بار. ايتا كەتۋ كەرەك، "جۋسانمەن" جۇرتقا جەتكەن قازاقستاندىقتار اراسىنداعى بالالاردىڭ كوپشىلىگى جات توپىراقتا دۇنيەگە كەلگەن.