بۇگىن – قازاقستاننىڭ قازىرگى پرەزيدەنتى قاسىم-جومارت توقايەۆتىڭ تۋعان كۇنى. 66 جاسقا تولعان مەملەكەت باسشىسىنىڭ ءومىرى، مانساپ جولى، وتباسى تۋرالى ءتۇرلى قىزىقتى ماتەريالدار جارىق كورۋدە. Qamshy.kz اقپارات اگەنتتىگى دە ءوز كەزەگىندە پرەزيدەنتتىڭ وتباسىنا قاتىستى قىزىقتى فاكتىنى جاريالاعىسى كەلىپ وتىر.
قاسىم-جومارت توقايەۆتىڭ اتا-اناسى تۋرالى، اسىرەسە اكەسى تۋرالى دەرەك كوپ-اق. ويتكەنى، ونىڭ اكەسى كەمەل توقايەۆ – قازاق ادەبيەتىنە دەتەكتيۆ جانرىن الىپ كەلگەن بەلگىلى قالامگەر. ەكىنشى دۇنيەجۇزىلىك سوعىستىڭ بىرنەشە مايداندارىنا قاتىسقان ول الماتىعا ورالىپ، مەملەكەتتىك قىزمەتتەن شەكتەلگەننەن كەيىن عانا جازۋعا ءبىرجولا باس قويعان.
كەمەل توقايەۆتىڭ قاسىم دەگەن اعاسى بولعان. سول كىسى مايداننىڭ العاشقى جىلدارىندا-اق سوعىسقا اتتانىپ، ارتىنشا قارا قاعاز كەلەدى. اعاسىنىڭ اتىن وشىرمەۋدى ومىرلىك مۇددە كورگەن كورەگەن جازۋشى بالاسىنىڭ اتىن دا سولاي اتاۋدى ۇيعارعان.
"ءوزىمنىڭ ەسىمىم ءۇشىن تاعدىر كورۋگە جازباعان كوكەمە قارىزدارمىن. ال جانى جومارت، پەيىلى كەڭ ازامات بولسىن دەپ ارمانداعان انام مەنى جومارت اتاپتى"، – دەپ ءتۇسىندىرىپ بەرەدى توقايەۆ "اكە تۋرالى تولعانىس" اتتى كىتابىندا.
ال اناسى تۇرار شاباربايەۆا وتباسىندا جازۋشىنىڭ جاعدايىن جاساۋعا بار كۇشىن سالعان. سونىڭ ارقاسىندا كەمەل توقايەۆ قالامىنان قازاق ادەبيەتىنىڭ داۋىرلەۋىنە ۇلەس قوسقان ونداعان شىعارما جارىق كوردى.
ءجا، تاقىرىپتا ايتقان باعىتىمىزعا ويىسالىق. ءبىر كۇنى الماتى قالاسىنان قاسىم-جومارت كەمەل ۇلىنىڭ اناسى برەجنيەۆتىڭ شەرۋىن كورىپ قالادى.
"مەن سول كەزدە وسىنداي باقىتتى ءارى جاۋاپكەرشىلىگى مول تىرشىلىك ءبىزدىڭ جومارتقا دا بۇيىرعاي دەپ تىلەك تىلەدىم. بۇل تىلەگىمدى ەستىگەن كەمەل "اللا قابىل ەتسىن!" دەپ جاۋاپ بەرگەن"، - دەيدى پرەزيدەنتتىڭ اناسى وتكەن شاققا ورالىپ.
مىنە، قاسىم-جومارت كەمەل ۇلى بۇگىندە قازاقستان رەسپۋبليكاسىنىڭ پرەزيدەنتى قىزمەتىن اتقارۋدا. الدا كەلە جاتقان 9-ماۋسىمداعى كەزەكتەن تىس پرەزيدەنتتىك سايلاۋىنا كانديدات رەتىندە تىركەلىپ، ءقازىر ۇگىت-ناسيحات جۇمىستارىن جۇرگىزۋدە.
تەكتى ادامنان تەكتى ۇرپاق تۋادى. جازۋشىنىڭ ءور رۋحى مەن ۇلت، حالىق ءھام ەل ءۇشىن دەگەن ادال نيەتى ۇلىنىڭ بويىنداعى قانمەن قوسىلا ءجۇرىپ تۇرعانى ءسوزسىز.
دايىنداعان: ادىلەت مادەنيەت
