وسى كۇزدە قازاقستاندىق ارالاس جەكپە-جەك شەبەرى قۋات "نايمان" حاميتوۆ پەن ءازىربايجاندىق ناريمان ابباسوۆ اراسىندا ريەۆانش ءوتۋى مۇمكىن. بۇل تۋرالى قۋات حاميتوۆ Vesti.kz سايتىنا ايتقان دەپ جازادى Qamshy.kz اقپارات اگەنتتىگى.
قۋات حاميتوۆ قارىمتا جەكپە-جەكتىڭ وتەتىن ورنى مەن كۇنى تۋرالى دا مالىمدەگەن.
"قازىرگى كەزدە ابباسوۆپەن كەلىسسوز جۇرگىزىپ جاتىرمىز. مەن شايقاستىڭ كۇنىن بەلگىلەۋدى كۇتەمىن. قارىمتا جەكپە-جەكتى قىركۇيەك ايىندا ءازىربايجان استاناسى باكۋ قالاسىندا وتكىزەمىز دەپ ويلايمىن. سول كەزدە ادىلدىكتى قالپىنا كەلتىرەمىن"، - دەپ ايتقان حاميتوۆ Vesti.kz سايتىنا بەرگەن سۇحباتىندا.
ەستەرىڭىزدە بولسا، 27 ساۋىردە ماسكەۋ ماڭىنداعى مىتيششي قالاسىندا رەسەيلىك Fight Nights Global پروموۋتەرلىك كومپانياسىنىڭ بەلبەۋى ءۇشىن وتكەن باسەكەدە حاميتوۆ ناريمان ابباسوۆتان تورەشىلەردىڭ شەشىمىمەن جەڭىلگەن. ول جەكپە-جەك شەشىمىنىڭ ادىلەتسىز بولعانىن ايتىپ، اپەللياسيالىق شاعىم دا ءتۇسىردى. ءبىراق تورەشىلەر شەشىمى وزگەرگەن جوق.
(ۆيدەودا قۋات حاميتوۆ پەن ناريمان ابباسوۆ اراسىنداعى العاشقى جەكپە-جەك)
ايتا كەتەيىك، سول جەكپە-جەكتە 31 جاستاعى قۋات حاميتوۆ سپورتتىق كارەراسىندا جەتىنشى رەت جەڭىلگەن. ودان بولەك ول سپورتتىق مانسابىندا 19 رەت جەڭىسكە جەتىپ، ءبىر رەت تەڭ تۇسكەن.
ۇسىنعان: ميات كاشىباي
