ەلباسىمىزدىڭ «100 ناقتى قادام» ۇلت جوسپارىنىڭ العاشقى 15 قادامى كاسىبي مەملەكەتتىك اپپارات قۇرۋعا، ياعني مەملەكەتتىك قىزمەت سالاسىن جانداندىرۋعا باعىتتالعان بولاتىن.

قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتىنىڭ ۇيىمداستىرۋىمەن، ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە  «مەملەكەتتىك قىزمەت – ابىرويلى مىندەت» تاقىرىبىندا وبلىسىمىزداعى تابىستى جاس مەملەكەتتىك اكىمشىلىك قىزمەتشىلەر مەن  ستۋدەنتتەردىڭ كەزدەسۋى ءوتتى. بۇگىنگى ستۋدەنت – ەرتەڭگى مامان دەمەكشى، بولاشاقتا وسى سالاعا قىزىعۋشىلىق تانىتىپ جۇرگەن جاستارعا مەملەكەتتىك قىزمەتتىڭ ماڭىزى مەن بۇگىنگى تاڭدا الاتىن ورنى تۋرالى اقپارات بەرىلىپ، مەملەكەتتىك قىزمەتكەرلەرگە قانداي تالاپتار قويىلاتىنى تىلگە تيەك بولدى.

كەزدەسۋدىڭ  ماقساتى – مەملەكەتتىك قىزمەتكە قابىلەتتى جانە تالانتتى جاستاردى تارتۋ، مەملەكەتتىك قىزمەتكە ءتۇسۋ جولدارىن كەڭىنەن ناسيحاتتاۋ بولىپ تابىلادى.

اتالعان شارادا قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتىنىڭ مامانى قايرلييەۆا جۇلدىز قايرلى قىزى الدىمەن ستۋدەنتتەرگە مەملەكەتتىك اكىمشىلىك لاۋازىمدارعا جانە قۇقىق قورعاۋ قىزمەتىنە ءتۇسۋ جولدارى بويىنشا  توقتالىپ ءوتتى.

2016 جىلدىڭ 1 قاڭتارىنان باستاپ «قازاقستان رەسپۋبليكاسىنىڭ مەملەكەتتىك قىزمەتى تۋرالى» قازاقستان رەسپۋبليكاسىنىڭ زاڭى  قولدانىسقا ەنگىزىلدى.

زاڭنىڭ 26-بابىنا سايكەس «ب» كورپۋسىنىڭ مەملەكەتتىك لاۋازىمدارىنا العاش رەت تۇسەتىن نەمەسە مەملەكەتتىك قىزمەتتى توقتاتقاننان كەيىن وعان قايتادان كىرەتىن ازاماتتار مىناداي ىرىكتەۋ كەزەڭدەرىنەن قامتيدى:

1) ۋاكىلەتتى ورگان ايقىنداعان تارتىپپەن تەستتەن ءوتۋ؛

2) ۋاكىلەتتى ورگاننىڭ قورىتىندىسىن الا وتىرىپ، جەكە قاسيەتتەرىن باعالاتۋ؛

3) «ب» كورپۋسىنىڭ مەملەكەتتىك اكىمشىلىك لاۋازىمىنا ورنالاسۋعا ارنالعان جالپى كونكۋرس.

مەملەكەتتىك قىزمەتكە ورنالاسۋعا نيەت بىلدىرگەن ازاماتتار ەڭ الدىمەن زاڭنامانى بىلۋگە ارنالعان تەستىلەۋدەن جانە جەكە قاسيەتىن باعالاۋ  تەستىلەۋىنەن ءوتۋ قاجەتتىلىگىن اتاپ ءوتتى.

سونداي –اق كەزدەسۋ بارىسىندا وبلىسىمىزدا جاس بولسا دا باس بولىپ جۇرگەن  بۇگىنگى تاڭدا اتىراۋ وبلىسى جاستار ساياساتى ماسەلەلەرى باسقارماسىنىڭ باسشىسى روللان قابىل ۇلى ءسوز الىپ، جاستارعا مەملەكەتتىك قىزمەتتە قىزمەت اتقارۋ  جاۋاپتىلىقتى تالاپ ەتەتىندىگىن ايتىپ ءوتتى. سونىمەن قاتار، مەملەكەتتىك قىزمەتتەگى جۇمىسىن جەتەكشى مامان لاۋازىمىنان باستاپ، مەريتوكراتيا قاعيداسىمەن ءبولىم باسشىسىنا دەيىن كوتەرىلگەن اتىراۋ وبلىسى اكىمى اپپاراتىنىڭ باقىلاۋ جانە قۇجاتتامالىق قامتاماسىز ەتۋ ءبولىمىنىڭ باسشىسى گۇلزاميرا بيبوز قىزى ستۋدەنتتەرگە  ءوز ويىمەن ءبولىستى.