قازاقستاننىڭ نامىسىن قورعاپ جۇرگەن وليمپيادا چەمپيونى دانيار ەلەۋسىنوۆ(6-0، 3 كو) كاسىپقويلار قۇرامىندا ءوزىنىڭ جەتىنشى جەكپە-جەگىن ءچيليدىڭ بىلعارى قولعاپ شەبەرى لۋيس نورامبۋەنمەن(3-1-1، 0 كو) وتكىزەدى دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە بەرە وتىرىپ.

ورتاشا سالماقتا ونەر كورسەتەتىن قوس بوكسشىنىڭ جەكپە-جەگى اقش-تىڭ مەريلەند شتاتىنا قاراستى وكسون-حيلل ەلدى مەكەنىندە وتەتىن بوكستىڭ اندەركارت بولىگىنە جاتادى. باستى كەزدەسۋدە جەڭىل سالماقتاعى WBC International اتاعىنىڭ يەگەرى ديەۆين حەيني(21-0، 13 كو) مەن مەكسيكالىق انتوني موران(24-3، 17 كو) قولعاپ تۇيىستىرەتىن بولادى.

وسىعان دەيىن دانياردىڭ قارسىلاسى ميگەل زامۋديو بولۋى ءتيىس ەدى، ءبىراق مەريلەن كوميسسيا مۇشەلەر مەكسيكالىقتى الاڭعا شىعۋعا جارامسىز دەپ تاپتى.

بۇل 27-جاستاعى ەلەۋسىنوۆتىڭ اقش- تاعى ءتورتىنشى كەزدەسۋى. ول 2018 جىلدان باستاپ، كاسىپقويلار دەڭگەيىندە سىنعا ءتۇستى. سونىمەن قاتار، ۇلىبريتانيادا ەكى رەت باعىن سىناپ، ءبىر رەت موناكودا ءوزىن كورسەتكەن.

دانياردىڭ قۇرداسى نورامبۋەنو دە 2018 جىلدىڭ تامىز ايىنان باستاپ كاسىپقوي دەڭگەيگە ءوتتى. جارتىلاي سالماقتاعى العاشقى كەزدەسۋىن تۋعان جەرىندە وتكىزىپ، قارسىلاسىمەن تەڭ تۇسكەن، وسىدان كەيىنگى چيليدە وتكىزگەن ءۇش جەكپە-جەكتە دە جەڭىستى قانجىعاسىنا بايلاعان. اقش-تىڭ تورىندە 10-مامىردان باستاپ باعىن سىناپ، العاشقى جارىستا امەريكالىق ۆاردگەس ۆاردانيانعا(7-0، 1 كو) ەسە جىبەرگەن.

قارسىلاستار بۇگىن سالماقتارىن ولشەدى. ەكەۋىنىڭ دە سالماعى 147 فۋنتتان(66،678 كەلى) استى. ەكى تاراپتىڭ كەلىسىمى بويىنشا، ارتىق سالماققا رۇقسات ەتىلگەن. وتانداسىمىزدىڭ سالماعى قارسىلاسىنا قاراعاندا 454 گرامم اۋىر. دەمەك 68،129 كەلى مەن 67،675 كەلى سىنعا تۇسەتىن بولادى.

ەلەۋسىنوۆ پەن نورامبۋەنونىڭ قاتىسۋىمەن وتەتىن بوكس نۇر-سۇلتان ۋاقىتى بويىنشا مامىر ايىنىڭ 25-نەن 26-سىنا قاراعان ءتۇنى باستالادى. قازاقستاندىقتىڭ سايىسىن ەلىمىزدە تىكەلەي ەفيردەن كورسەتەدى.

اۋدارعان: بەك بايتاس