قازاقستاندىق كاسىپقوي بوكسشى دانيار ەلەۋسىنوۆ (7-0، 3 كو) چيليلىك بوكسشى لۋيس نورامبۋەنانى (3-2-1، 0 كو) جەڭدى دەپ حابارلايدى Qamshy.kz اقپارات اگەنتتىگى.
جارتىلاي ورتا سالماقتا (66،678 كگ) جۇدىرىقتاساتىن قوس بوكسشىنىڭ اراسىنداعى جەكپە-جەك اقش-تىڭ وكسون-حيللە (مەريلەند شتاتى) ەلدىمەكەنىندە 26 مامىردا ءوتتى. 6 راۋندقا جوسپارلانعان جەكپە-جەكتە دانيار ەلەۋسىنوۆ تورەشىلەردىڭ شەشىمىمەن جەڭدى.
بۇل – ەلەۋسىنوۆتىڭ كاسىقوي بوكستاعى جەتىنشى جەڭىسى. ول بۇعان دەيىن وتكىزگەن 6 جەكپە-جەگىندە دە قارسىلاستارىنان باسىم بولعان.
ايتا كەتەيك، چيليلىك بوكسشى دانيار ەلەۋسىنوۆكە جەكپە-جەككە ءبىر كۇن قالعاندا عانا قارسىلاس اتاندى. وعان دەيىن ەلەۋسىنوۆتىڭ پروموۋتەرلەرى دانيار كاسىپقوي كارەراسىنداعى جەتىنشى جەكپە-جەگىندە مەكسيكالىق بوكسشى ميگەل زامۋديوعا (43-12-1، 27 كو) قارسى جۇدىرىقتاسادى دەگەن اقپارات بەرگەن. الايدا مەريلەندا شتاتىنىڭ اتلەتيكالىق كوميسسياسى مەكسيكالىق بوكسشىعا جەكپە-جەككە شىعۋعا رۇقسات ەتپەدى. سونىمەن قاتار بۇعان دەيىن دانيار ەلەۋسىنوۆتىڭ 8 ماۋسىمدا ءوزىنىڭ وتانداسى گەناديي گولوۆكين مەن كانادالىق بوكسشى ستيۆ روللس اراسىندا وتەتىن بوكس كەشىندە مەكسيكالىق بوكسشى فەرناندو كاركاموعا (23-9، 18 كو) قارسى جۇدىرىقتاساتىنى دا ايتىلعان. ءبىراق قازاقستان نامىسىن قورعاپ جۇرگەن قوس بوكسشى ءبىر بوكس كەشىندە جۇدىرىقتاسا المايتىن بولدى. سەبەپ - گولوۆكين مەن ەلەۋسىنوۆتىڭ پروموۋتەرىنىڭ كەلىسە الماۋى.
ەستەرىڭىزگە سالا كەتەيىك، بۇل جەكپە-جەك 28 جاستاعى ەلەۋسىنوۆتىڭ اقش-تاعى ءتورتىنشى كەزدەسۋى. سونىمەن قاتار ول ۇلىبريتانيادا ەكى رەت رينگكە شىقسا، ءبىر رەت موناكودا جەكپە-جەك وتكىزگەن. 2016 جىلى ريودا وتكەن وليمپيادا ويىندارىندا التىن مەدال العان ەلەۋسىنوۆ 2018 جىلدىڭ ساۋىرىنەن باستاپ كاسىپقوي بوكستا جۇدىرىقتاسىپ ءجۇر.
ءقازىر دانيار ەلەۋسىنوۆ كاسىپقوي بوكسشىلاردىڭ رەيتينگىن جاريالاپ وتىراتىن Boxrec.com سايتىنىڭ تىزىمىندە جارتىلاي ورتا سالماقتاعى 1769 بوكسشىنىڭ اراسىندا 169 ورىندا كەلە جاتىر. ەلەۋسىنوۆتەن بولەك، ءدال وسى سالماقتا قازاقستاندىق بوكسشىلار نۇرسۇلتان جاڭابايەۆ (81 ورىن)، بوبىرجان مومىنوۆ (118 ورىن)، باحتيار ەيۋبوۆ (164 ورىن) بار. بۇل سالماقتىڭ كوشىن امەريكالىق بوكسشى تەرەنس كروۋفورد باستاپ تۇر. سونداي-اق، ۇزدىك وندىقتىڭ ىشىندە مەنني پاكياو (فيليپين)، دەنني گارسيا (اقش)، كيت تۋرمان (اقش)، امير حان (ۇلىبريتانيا) سىندى اتاقتى بوكسشىلار دا بار.
دايىنداعان: ميات كاشىباي
