25 مامىردا نۇر-سۇلتان قالالىق اكىمشىلىك سوتى ءۇيىنىڭ بالكونىنان "سايلاۋعا بويكوت" دەپ ايقايلاعان دارحان ومىربايەۆتى "زاڭ قىزمەتكەرلەرىنە باعىنبادى" دەپ ايىپتاپ، ەكى تاۋلىككە قامادى دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

نۇر-سۇلتان قالاسى اكىمشىلىك سوتىنىڭ سۋدياسى نۇرجان قايىربەك ونىڭ اكىمشىلىك قۇقىقبۇزۋشىلىققا ءبىرىنشى رەت تارتىلىپ وتىرعانىن ايتىپ، سول سەبەپتى جازانى جەڭىلدەتكەنىن جانە ۇكىمنىڭ بىردەن ورىندالاتىنىن جاريالادى. "سوت قاۋلىسى بىردەن قولىنا تاپسىرىلىپ، وعان ون كۇن ىشىندە شاعىمدانۋعا بولادى" دەدى سۋديا.

38 جاستاعى دارحان ومىربايەۆتىڭ ازاتتىق راديوسى تىلشىلەرىنە ايتۋىنشا، 20 مامىر كۇنى ادۆوكاتىنىڭ ءىسساپاردا بولۋىنا بايلانىستى سوتتى كەيىنگە قالدىرۋ تۋرالى ارىز جازعانىنا قاراماستان، ونى "سوتتان قاشىپ ءجۇر" دەپ كوشەدەن ۇستاپ، سوتقا اكەلگەن. سوتقا ونى قولداپ كەلگەن وننان استام ازاماتتىق بەلسەندى قاتىسقان.

دارحان ومىربايەۆ سوتتا 17 مامىر كۇنى كوپ بالالى وتباسىلارعا بەرىلەتىن الەۋمەتتىك كومەكتى الا الماعانى ءۇشىن قاپالانىپ، بالكونعا شىعىپ، Facebook الەۋمەتتىك جەلىسىندە تىكەلەي ەفيردە ميكروفوننان ءادىل سايلاۋدى تالاپ ەتىپ، ايقايلاعانىن ايتتى. بۇل تۋرالى Qamshy.kz اقپارات اگەنتتىگى جازعان بولاتىن.

"سودان سوڭ سىرتتاعى بالالار مەنىڭ دالاعا شىعۋىمدى سۇرادى. سىرتقا شىعىپ كورشىلەردەن، ەسىك الدىنداعى ادامداردان سايلاۋ تۋرالى پىكىرىن سۇرادىم. سول كەزدە پوليسيا وكىلدەرى كەلىپ، كيىمىمدى كيۋگە دە مۇمكىندىك بەرمەي، قولىمدى بۇراپ الىپ كەتتى. ولار ماعان كومەكتەسۋگە كەلگەن ايەلىمدى قورقىتىپ، وعان ەلەكترشوكەر قولداندى"، - دەدى ول.

دارحان ومىربايەۆتى پوليسيا قىزمەتكەرلەرى ۇيىنەن كۇشتەپ الىپ كەتكەن ۆيدەو.

ءبىراق ونى ۇستاپ الىپ كەتكەن پوليسيا لەيتەنانتى مانسۇر جاعىپاروۆ سوتتا ونىڭ ايتقاندارىن جوققا شىعاردى. ونىڭ سوزىنشە، پوليسيا پۋنكتىنە ەكى حابارلاما ءتۇسىپ، ىشىمدىك ىشكەن ادامنىڭ كىشكەنتاي بالالارعا ءتيىسىپ، بالكوننان سايلاۋ، پرەزيدەنت تۋرالى نەشە ءتۇرلى ايتىپ جاتقانىنا شاعىمدانعان.

"مەن ءۇش رەت زاڭ اتىمەن ايتامىن دەدىم. ول باعىنباعان سوڭ كۇشتەپ پوليسيا بولىمشەسىنە الىپ كەتتىك. ءبىراق مەن وعان دا، ايەلىنە دە ەلەكتروشوكەردى قولدانعانىم جوقپىن"، - دەدى پوليسيا قىزمەتكەرى مانسۇر جاعىپاروۆ سوتتا.

ادۆوكات باۋىرجان ازانوۆ دارحان ومىربايەۆتىڭ كىناسىن انىقتاۋ ءۇشىن ونىڭ ۇستىنەن شاعىم تۇسىرگەن تۇلعالاردى، پوليسيا وكىلدەرى مەن وعان تالداۋ جاساعان ناركولوگ دارىگەرلەردى سوتقا شاقىرۋدى سۇرادى. سۋديا ونىڭ ارىزىن جارتىلاي قاناعاتتاندىرىپ، تەك پوليسيا وكىلىنەن عانا جاۋاپ الدى.

پروكۋرور ج. تۇستىكبايەۆ دارحان ومىربايەۆتىڭ ارەكەتىنىڭ دۇرىس باعالانعانىن ايتىپ، وعان ەكى تاۋلىك بەرۋدى سۇرادى.

ادۆوكات ازانوۆ ومىربايەۆتىڭ كىناسىز ەكەندىگىن العا تارتىپ، وعان قاتىستى اكىمشىلىك ءىستى توقتاتۋدى تالاپ ەتتى.

ايتا كەتەيىك، ومىربايەۆتى پوليسيا بۇعان دەيىن دە باسقا ادامدارمەن بىرگە رۇقسات ەتىلمەگەن ميتينگكە قاتىستى دەگەن كۇدىكپەن 22 ناۋرىز بەن 9 مامىردا ۇستاپ، ونىڭ ۇيالى تەلەفونىن الىپ قويعان. ءبىراق كەيىن ونى پوليسيا بولىمشەسىنە اپارعان سوڭ بوساتىپ جىبەرگەن.

ۇسىنعان: ميات كاشىباي