وتكەن جىلدىڭ مامىر ايىندا ۇلى جەڭىس كۇنى قارساڭىندا ەكى مىڭ جىلدىق تاريحى بار تاراز قالاسىنداعى باۋىرجان مومىش ۇلى اتىنداعى «جەڭىس» ساياباعى قايتا كۇردەلى جوندەۋدەن ءوتىپ، مۇندا «ەرلىك» مەموريالدىق كەشەنى، جەتپىس مىڭعا جۋىق سوعىس ارداگەرلەرىنىڭ ەسىمى جازىلعان تاقتا، «ماڭگىلىك الاۋ» جانە تاعى دا ءبىرقاتار نىساندار اشىلعان بولاتىن. اتالعان ساياباق ىشىنە داڭقتى باتىر باۋىرجان مومىش ۇلى ەسكەرتكىشىنىڭ ورناتىلۋى دا ايتا قالارلىقتاي وقيعا بولعان ەدى. جامبىل وبلىسىنىڭ اكىمى اسقار مىرزاحمەتوۆتىڭ تىكەلەي تاپسىرماسىمەن قولعا الىنعان بۇل جۇمىستار اۋليەاتالىقتاردىڭ دا قولداۋىنا يە بولىپ كەلەدى.

9 مامىر – ۇلى جەڭىس كۇنىنە وراي تاراز قالاسىنداعى باۋىرجان مومىش ۇلى اتىنداعى «جەڭىس» ساياباعىنىڭ ىشىنەن «داڭق» مۇراجايى اشىلدى. مۇراجايدىڭ اشىلۋ سالتاناتىنا جامبىل وبلىسىنىڭ اكىمى اسقار مىرزاحمەتوۆ باستاعان قۇرمەتتى قوناقتار قاتىستى. بەلگىلى ابايتانۋشى عالىم، قازاقستان رەسپۋبليكاسى مەملەكەتتىك سىيلىعىنىڭ يەگەرى مەكەمتاس مىرزاحمەت ۇلى، باۋىرجان مومىش ۇلىنىڭ كەلىنى، جازۋشى زەينەپ احمەتوۆا قاتىستى. جالپى اۋماعى 1500 شارشى مەتردى قۇرايتىن زال ەكى قاباتتان تۇرادى. جوبا قۇنى – 546 ميلليون 769 مىڭ تەڭگەنى قۇرايدى. «دانق» زالىنىڭ ءبىرىنشى قاباتى ۇلى وتان سوعىسى جىلدارىن بەينەلەيتىن فوتوسۋرەتتەر مەن ەكسپوناتتارعا تولى. وندا 1000 شارشى مەترگە بارلىعى 1 ميلليون 500 مىڭنان  استام فوتوشەجىرەلەر توپتاستىرىلعان. زالدىڭ ءبىرىنشى بولىگىندە ورنالاسقان 1941، 1942، 1943، 1944 جانە 1945 جىلدارعا ارنالعان قابىرعالارداعى سۋرەتتەر سول كەزەڭدەگى سوعىس كورىنىستەرىن  ەرىكسىز كوز الدىڭا الىپ كەلەدى. اتاپ ايتساق، 1941-جىلعا ارنالعان قابىرعادا «باربوروسا» جوسپارىنىڭ كارتاسى، ماسكەۋ ءۇشىن شايقاسىنىڭ، گەنەرال-مايور ي.پانفيلوۆتىڭ، «وتان انا»، ب.مومىش ۇلىنىڭ، ن.بەلاشيەۆتىڭ جانە باسقا دا بارلىعى 100-دەن استام فوتوسۋرەتتەر مەن 200-دەن اسا قۇجاتتار قويىلعان. ال، زالدىڭ 1942-جىلعا نەگىزدەلگەن قابىرعاسى  «لەنينگراد بلوكاداسىنا» ارنالعان. وندا جىر الىبى – جامبىل جابايەۆتىڭ سۋرەتى، اقىننىڭ «لەنينگرادتىق ورەنىم» اتتى وتتى ولەڭى جانە وزگە دە دۇنيەلەر ورىن العان. 1943-جىلعا ارنالعان قابىرعادا ستالينگراد، كۋرسك شايقاستارىنا ارنالعان ۇلكەن فوتولار جيناعى ورنالاسقان. سول سەكىلدى 1944-45 جىلدارعا ارنالعان قابىرعادا قىزىل اسكەردىڭ ەۆروپانى ازات ەتۋىن بەينەلەيتىن فوتولار جيناعى بەرىلگەن. سونداي-اق، زالدا «رەيحستاگقا تۋ تىگۋ» بارەلەفى قويىلىپ، تىلداعى ەڭبەككەرلەردىڭ ومىرىنەن سىر شەرتەتىن، 1945 جىلعى 24 ماۋسىمداعى ماسكەۋ قالاسىندا وتكەن جەڭىس شەرۋى جانە جەڭىستىڭ 70 جىلدىعىنا ارنالعان استانا قالاسىندا وتكەن سالتاناتتى شارانىڭ سۋرەتتەرى دە كورىنىس تاپقان. جەرگىلىكتى مايدانگەرلەردىڭ 500-گە جۋىق مەدالى دە زالدان ورىن العان. نىساننىڭ ەكىنشى قاباتىندا «باۋىرجانتانۋ» عىلىمي-زەرتتەۋ ورتالىعى ورنالاسقان. ورتالىقتا ب.مومىش ۇلىنىڭ بالالىق شاعىنان  كەمەڭگەرلىك جاسىنا دەيىنگى ءومىرىن بەينەلەيتىن  مۋزەي جانە كوركەمسۋرەت بۇرىشى قۇرىلعان. وندا نەگىزىنەن مايدانگەر-قالامگەردىڭ شىعارماشىلىق-تۇلعالىق بولمىسىن ايشىقتاۋعا باسىمدىق بەرىلگەن. ورتالىق ىشىندە باۋكەڭنىڭ شىعارماشىلىعىنا ارنالعان كىتاپحانالىق بۇرىش پەن جيىن وتكىزۋگە ارنالعان كونفەرەنسيا زالى جاساقتالعان. سونىمەن قاتار، دەرەكتەر جيناقتايتىن ماماندارعا ارنالعان ءۇش قىزمەتتىك بولمە مەن ءبىر فوتولابوراتوريا قاراستىرىلعان.

  مۇراجايدىڭ ەسكيزدىك جوباسىن «Archi-Grup» جاۋاپكەرشىلىگى شەكتەۋلى سەرىكتەستىگى ازىرلەگەن. ال، مۇراجايدىڭ ءوزى باۋىرجان مومىش ۇلى اتىنداعى «جەڭىس» ساياباعىندا ورنالاسقان جانە ونىڭ جالپى اۋماعى 16 گەكتاردى قۇرايدى. نىسانعا جەر شارىنىڭ 80 پايىزىن قامتىعان ۇلى وتان سوعىسى مەن اۋعان سوعىسى جىلدارىن بەينەلەيتىن ەكسپوناتتار قويىلدى. مۇراجاي وتان ءۇشىن وت كەشكەن ەرلەردىڭ ەرلىگىن پاش ەتەتىن، جاستارعا مول ماعلۇماتتار بەرەتىن ورداعا اينالارى حاق. سونىمەن قاتار، «باۋىرجانتانۋ» ورتالىعى دا وسى مۇراجايدا ورنالاساتىن بولادى. جامبىل وبلىسىنىڭ اكىمى اسقار مىرزاحمەتوۆتىڭ يدەياسىنان تۋىنداعان «داڭق» مۇراجايى حالىقتىڭ رۋحاني سۇرانىسىن قاناعاتتاندىراتىن، جاستاردى پاتريوتتىق رۋحتا تاربيەلەيتىن ورتالىق بولماق.

دۋلات ايتباي