ەلباسى ن.نازاربايەۆ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا «باسپانامەن قامتۋ كورسەتكىشى سوڭعى 10 جىلدا ءبىر تۇرعىنعا شاققاندا 30 پروسەنتكە ءوسىپ، بۇگىندە 21،6 شارشى مەتردى قۇرادى. بۇل كورسەتكىشتى 2030 جىلى 30 شارشى مەترگە دەيىن جەتكىزۋ كەرەك» دەپ، بۇل باعىتتاعى جۇمىستاردى جۇيەلەۋدى شەگەلەپ تاپسىرعان بولاتىن. تۇڭعىش پرەزيدەنت ءوزىنىڭ «بەس الەۋمەتتىك باستاماسىندا» دا باسپانامەن قامتۋعا باسا كوڭىل بولگەنى بەلگىلى.

وسىنداي قاداۋ-قاداۋ مىندەتتەر جامبىل وبلىسىندا لايىقتى جۇزەگە اسۋدا. اسىرەسە،   «نۇرلى جەر» مەملەكەتتىك باعدارلاماسىنىڭ تيگىزىپ جاتقان شاراپاتى مول. سونىڭ جارقىن دالەلىندەي بولىپ  تاراز قالاسى «بايتەرەك» ىقشاماۋدانىندا 60 پاتەرلى ارەندالىق-كوممۋنالدىق تۇرعىن ءۇي پايدالانۋعا بەرىلدى. قونىستوي يەلەرىنىڭ قۋانىشىمەن بولىسكەن وبلىس اكىمىنىڭ ورىنباسارى ەركەبۇلان داۋىلبايەۆ ولارعا پاتەر كىلتتەرىن سالتاناتتى جاعدايدا تابىس ەتتى.

– وبلىستا «نۇرلى جەر» باعدارلاماسى بويىنشا بيىلعى جىلعا 30 تۇرعىن ءۇيدىڭ قۇرىلىسىنا 12 ميلليارد تەڭگەدەن استام قارجى قارالدى. بۇگىندە قۇرىلىس جۇمىستارى قىزۋ قارقىن الىپ، سونىڭ ناتيجەسىندە 60 وتباسىنىڭ باسپانامەن قامتىلۋ قۋانىشىنا ورتاقتاسىپ وتىرمىز. بۇدان بولەك، وسى جىلدىڭ سوڭىنا دەيىن 30 تۇرعىن ءۇيدىڭ 28ء-ى پايدالانۋعا بەرىلەدى دەپ كۇتىلۋدە. سونىڭ ەسەبىنەن جۇرتشىلىققا 2 175 پاتەر تاپسىرىلماقشى. وڭىرىمىزدە 25 مىڭ ادام ءۇي كەزەگىندە تۇرسا، ونىڭ 14 مىڭنان استامى تۇرعىن ۇيگە وتە مۇقتاج ازاماتتار. ونىڭ ىشىندە 2 641ء-ى كوپبالالى وتباسى ساناتىندا. بيۋدجەت تاپشىلىعىنا قاراماستان، باسپانا ماسەلەسىن شەشۋ ماقساتىندا وبلىس اكىمى اسقار مىرزاحمەتوۆتىڭ تاپسىرماسىمەن 360 پاتەرلى 8 جاتاقحانانىڭ قۇرىلىسى جاز ايىندا قولعا الىناتىن بولدى. ول جاتاقحانالار  الەۋمەتتىك وسال توپقا جاتاتىن ازاماتتارعا بەرىلەدى. جالپى، جىل اياعىنا دەيىن وسى تەكتەس جاڭادان سالىناتىن جاتاقحانالار ەسەبىنەن تۇرعىن ءۇي كەزەگى كەلگەنشە ازاماتتاردى جايلى  باسپانامەن قامتۋ ماقساتىندا جۇرت 612 پاتەرمەن قامتىلادى دەپ كۇتىلۋدە، – دەدى ەركەبۇلان ءابىلحان ۇلى.

مامىر مەرەكەسىندە قوس قۋانىشقا قاتار كەنەلگەندەر نەگىزىنەن تۇرعىن ءۇي كەزەگىندە تۇرعان الەۋمەتتىك وسال توپ وكىلدەرى. جاڭا كوپقاباتتى تۇرعىن ءۇي الەۋمەتتىك جاعىنان قورعالاتىن توپتاردىڭ ازاماتتارىنا جەكەشەلەندىرۋ قۇقىعىنسىز بەرىلگەن. ولار ايما-اي جالعا بەرىلگەن پاتەرگە تولەيتىن 5-6 مىڭ تەڭگە تولەماقىنى ۇلكەن كومەك دەپ وتىر.

جالپى، قونىستى قۇتقا بالاعانداردىڭ قاتارىندا 17ء-سى مەملەكەتتىك جانە بيۋدجەتتىك ۇيىم قىزمەتكەرى بولسا، 31ء-ى الەۋمەتتىك جاعىنان قورعالعاندار، 12ء-سى جەتىم بالالار.

اتالعان تۇرعىن ءۇي قۇرىلىسىن مەردىگەر «بينوم» جاۋاپكەرشىلىگى شەكتەۋلى سەرىكتەستىگى جۇرگىزىپتى. ونداعى پاتەرلەردىڭ 30-ى 71 شارشى مەتردى قۇرايتىن 3 بولمەلى بولسا، قالعانى 1،2 بولمەلى پاتەرلەر.

الداعى ۋاقىتتا پايدالانۋعا بەرىلەتىن 1 460 پاتەرلى 21 ءۇي كرەديتتىك بولسا، 526 پاتەرلى 7 ءۇي ارەندالىق نەگىزدە سالىنباق. ونىڭ ىشىندە 187 پاتەر كەزەكتەگى كوپبالالى وتباسىلاردىڭ ساتىپ الۋى ءۇشىن جوسپارلانعان.

باقىت جالعاس