بۇگىن ەلىمىزدەگى بارلىق مەكتەپتەردە «سوڭعى قوڭىراۋ» سوعىلىپ، كەزەكتى وقۋ جىلى ءوز مارەسىنە جەتتى. الدا جازعى كانيكۋل. وسى ورايدا جامبىلدىق وقۋشىلارعا قانداي جاعدايلار جاسالۋدا؟ ساۋىقتىرۋ شارالارى جوسپارلانعان با؟ بۇل ماقساتقا قانشا قارجى جۇمسالماق؟ ءبىز وسى سۇراقتاردى جامبىل وبلىسى اكىمدىگىنى ءبىلىم باسقارماسىنىڭ باسشىسى راحيا تۇرماحانبەتوۆاعا قويدىق.  

– بيىلعى جىلى جالپى 1-10-سىنىپتاردىڭ وقۋشىلارىن جازعى دەمالىستى ءتيىمدى پايدالانۋ جانە ساۋىقتىرۋ لاگەرلەرىمەن قامتۋدى جوسپارلاپ وتىرمىز. ءبىرىنشى باعىت – مەكتەپ ىشىندەگى جانە قالا سىرتىنداعى لاگەرلەرگە 95،1 پايىز وقۋشىلار بارادى. ەكىنشى باعىت – قوسىمشا ۇيىرمەلەردە ۇيىمداستىرۋ شارالارىنا 76،4 پايىز بالا تارتىلادى. بۇنىڭ ىشىندە تۋريستىك ساياحاتتار، 1 كۇندىك ەكسكۋرسيالار دا بار. وبلىس اۋماعىندا قالا سىرتىنداعى 10 لاگەر جۇمىس ىستەيدى. تورتەۋى – مەملەكەتتىك، التاۋى – جەكەمەنشىك. قالا سىرتىنداعى لاگەرلەرگە 8046 بالاعا جولداما بولىنگەن. بۇل جۇمىستارعا 343 ميلليون تەڭگە قاراجات ءبولىندى. بيىلعى ءبىر ەرەكشەلىك، لاگەرگە جولداما بەرۋ اۆتوماتتاندىرىلدى.

بۇل جۇمىستارعا 343 ميلليون تەڭگە قاراجات ءبولىندى،-دەيدى ر.تۇرماحانبەتوۆا. باسقارما باسشىسى اۋليەاتاداعى  ءبىلىم نىساندارىنىڭ جوندەۋ جۇمىستارىنا قانشا قارجى ءبولىنىپ وتىرعانىن دا ايتىپ بەردى.

– بىلتىرعى جىلدان وتپەلى 5 نىسان سالىنىپ جاتىر. ولار جامبىل اۋدانىنداعى بىرلەسۋ-ەڭبەكتەگى، مەركىنىڭ قازاق-ديحان اۋىلىنداعى، شۋ قالاسىنىڭ توعاي ماسسيۆىندەگى ورىن تاپشىلىعى بار مەكتەبى (رەسپۋبليكالىق بيۋدجەت ەسەبىنەن)، بايزاق اۋدانىنداعى ءۇش اۋىسىمدى اقشولاق مەكتەبى جانە جالپاقسازداعى اپاتتى مەكتەپ. بۇلاردىڭ ءبارى دە كەلەسى وقۋ جىلى باستالاتىن قىركۇيەكتە پايدالانۋعا بەرىلەدى. بۇدان باسقا وبلىسىمىزدا بيىل تاعى 7 ءبىلىم نىسانىنىڭ قۇرىلىسى باستالادى. ولاردىڭ بىرەۋى – مەكتەپ. اتالعان وسى 12 نىساننىڭ قۇرىلىسىنا 3،5 ميلليارد تەڭگە بولىنگەن. تاعى مەكتەپتەردىڭ قازاندىقتارىن قۇرۋ، سالۋ جانە قايتا جاڭعىرتۋعا 384 ميلليون تەڭگە، ال كۇردەلى جوندەۋ جۇمىستارىنا 1 ميلليارد 500 مىڭ تەڭگە قارجى قاراستىرىلدى،-دەيدى باسقارما باسشىسى.

جالپى، جامبىل وبلىسىنىڭ ءبىلىم سالاسىندا ىلگەرىلەۋ بار. ۇلاعاتتى ۇستازدار مەن وقۋشىلاردىڭ جەتىستىكتەرىنەن بولەك ماتەريالدىق-تەحنيكالىق بازانىڭ دا جاقسارا تۇسكەندىگى كوڭىل قۋانتادى. جاڭا مەكتەپتەر سالىنىپ، ەلگە ەسىگىن ايقارا اشۋدا. مەكتەپكە دەيىنگى مەكەمەلەر سانىنىڭ كوبەيگەندىگى دە قۇپتارلىق قادام. ويتكەنى، تاربيە نەگىزى بالالاقشادا قالانادى. بۇل تۇرعىدا مەملەكەتتىك-جەكەشەلىك ارىپتەستىكتىڭ دە تيگىزىپ جاتقان كومەگى مول. سونىمەن قاتار جازعى ساۋىقتىرۋ ماۋسىمىنىڭ جوعارى دەڭگەيدە وتۋىنە باسا نازار اۋدارىلۋى دا باس بارماقپەن باعالارلىق دۇنيە. ەل ەرتەڭى-جاس جەتكىنشەكتەردىڭ الا جازداي اسىر سالىپ، الاڭسىز تىنىعۋىنا نە جەتسىن؟!

باقىت جالعاس