ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى  حالىققا جولداۋىندا اگروونەركاسىپ كەشەنىن  تولىق  ىسكە اسىرۋ قاجەتتىگىن باسا ايتقانى بەلگىلى. وسىعان وراي بۇگىندە جامبىل وبلىسىندا  ەكپىندى جۇمىستار قولعا الىنۋدا. اسىرەسە، مويىنقۇمدىقتار كەڭەستىك كەزەڭنەن كەيىن ۇمىت قالعان ەگىن  شارۋاشىلىعىن  قايتا شالقىتۋ ءۇشىن ايانباي تەر توگىپ جاتىر.

جالپى، ءقازىر اۋداندا 5000 گەكتار سۋارمالى جەر بولسا، سونىڭ 1000 گەكتارىنا جۇگەرى ەگىلۋدە. بۇل باعىتتا العاشقىلاردىڭ ءبىرى بولىپ بىرلىك اۋىلىنىڭ شارۋالارى جۇمىستى باستاپ كەتكەن. اۋىلدىق  وكرۋگتەگى   1300 گەكتار ەگىستىك القابىنىڭ 350 گەكتارىنا  جۇگەرى ەگىلىپ جاتسا، قالعان القاپتارعا جوڭىشقا تۇقىمى سەبىلىپ بولعان.

- بىزگە  بيىلعا  بەرىلگەن  مەجە 350 گەكتار جەرگە جۇگەرى تۇقىمىن ەگۋ بولاتىن. وسى ماقساتتا  اۋدان اكىمدىگىنىڭ اۋىل شارۋاشىلىعى  بولىمىمەن اقىلداسا وتىرىپ الماتىلىق مامانداردان «بۋدان» جۇگەرى تۇقىمىن الىپ، 1000 گەكتارداي جەرىمىزدىڭ 500  گەكتارىنا  سۇدىگەر كوتەرىپ، جۇگەرى ەگۋدەمىز. مۇنداي  اۋقىمدى شارۋانى تاۋەلسىزىدك جىلدارىنان بەرى بىردە-بىر شارۋاشىلىق قولعا العان ەمەس. سوندىقتان اۋدانعا اكىم بولىپ كەلگەلى ەڭبەك ادامدارىنا قولداۋ ءبىلدىرىپ، تىڭ تىرلىكتى تۇلەتىپ وتىرعان مادەن مۇسايەۆقا ايتار العىسىمىز شەكسىز. بۇيىرتسا، بيىل رەكوردتتىق كورسەتكىشتە ءونىم الامىز دەگەن ءۇمىت بار، - دەيدى  «قۇرداستار»  شارۋا قوجالىعىنىڭ  جەتەكشىسى ەركەبۇلان جۇبايەۆ.

     بۇدان بولەك، بينازار  اۋىلدىق وكرۋگىندە دە دالا جۇمىستارى قىز-قىز قايناۋدا. مۇندا دا جۇگەرى شارۋاشىلىعىنا باسىمدىق بەرىلگەن.  

-مەن جەرىمدى ەرتەرەك  جىرتىپ،  جۇگەرى ەگۋدى باستاپ كەتتىم. شارۋاشىلىعىما  قاراستى 40  گەكتار القاپتىڭ بارلىعىنا جۇگەرى ەگۋدەمىن.  «كوكتەمنىڭ ءبىر كۇنى – جىلعا ازىق»  دەپ بەكەر ايتىلماعان عوي. سوندىقتان ءاربىر كۇنىمىزدى  ءتيىمدى پايدالانۋدامىز.

دالا جۇمىستارىنا  تۇقىمنان دا، تەحنيكادان دا قولداۋ بىلدىرگەن  اۋدان اكىمى مادەن مۇسايەۆقا العىستان باسقا ايتارىم جوق. وعان قوسا اكىمىمىز اعىن سۋ كەلەتىن كانالدارىمىزدى دا تازارتۋعا باسىمدىق بەرۋدە سوندىقتان بيىل ديحانداردىڭ جەر يگەرۋگە دەگەن ىنتاسى جوعارى، - دەيدى شارۋا  قامبار  اتايەۆ.

ءيا، بينازار اۋىلدىق وكرۋگى بويىنشا اعىمداعى جىلى   573 گەكتار سۋارمالى جەر  اينالىمعا  قوسىلىپ وتىر. ونىڭ 150 گەكتارىنا  جۇگەرى  ەگىپ وتىرعان ولار  مول ءونىم الاتىندارىنا سەنىمدى. سونداي-اق وكرۋگ اكىمى باعدات ناۋرىزبايەۆ تا  «جەر-انانى  باپتاي بىلسە، بەرەرى مول» ەكەنىن ءتۇسىندىرىپ، شارۋالاردى ۇعىنىستى ەڭبەككە شاقىرۋدا.

اۋداننىڭ اسىراۋشى سالاسىنا سەرپىن بەرۋ باعىتىندا كۇشاماندىقتار دا كۇش سالۋدا. مۇندا 387  گەكتار ەگىندى جەر بار بولسا، سونىڭ  115 گەكتارىنا  جۇگەرى، 60 گەكتارىنا  جوڭىشقا مەن  ارپا جانە 120 گەكتارىنا تارى ەگىلۋدە. ال بۇل جۇمىستارمەن  اۋىلداعى «كوركەم»، «مەرەي» جانە  «ىرىس» شارۋا قوجالىقتارى اينالىسۋدا. سونداي-اق  وبلىس اكىمى اسقار مىرزاحمەتوۆتىڭ تىكەلەي باستاماسىمەن  قۇرىلعان مەحانيكالىق  جاساق  پەن  شۋ اۋدانىنان جۇمىلدىرىلعان تەحنيكا دا جوسپارلى جۇمىستى جۇيەلى اتقارۋعا ولشەۋسىز ۇلەس قوسۋدا.

باقىت جالعاس