جامبىل وبلىسىنىڭ مەكتەپتەرىندە 222 مىڭنان استام وقۋشى بيىلعى وقۋ جىلىن ءتامامدادى. ولاردىڭ ىشىندە 8796-سى مەكتەپ بىتىرسە، 17700 بالا 9-سىنىپتى اياقتادى. وسى وقۋ جىلى بارىسىندا 245 وقۋشى دۇنيەجۇزىلىك، حالىقارالىق، رەسپۋبليكالىق ءپان وليمپيادالارىنا، عىلىمي جوبالار جارىسىنا قاتىستى. سونىڭ 51 پايىزى (28 التىن، 32 كۇمىس، 64 قولا مەدال) جەڭىمپاز اتاندى. سول قاتىسقانداردىڭ ىشىندە 124ء-ى جەڭىمپاز اتاندى. حالىقارالىق وليمپيادالار مەن عىلىمي جوبالاردان 28 بالا الدىڭعى ورىنداردان كورىنىپ، توپ جاردى. بۇل تۋرالى جامبىل وبلىسى اكىمدىگى ءبىلىم باسقارماسىنىڭ باسشىسى راحيا تۇرماحانبەتوۆا ايتىپ بەردى.
-ەلباسى ن.نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا «ءبىلىم ساپاسىن باعالاۋ جۇيەسى حالىقارالىق ستاندارتتارعا نەگىزدەلۋگە ءتيىس. ورتا مەكتەپتەردىڭ وزىندە بالالاردى مەيلىنشە سۇرانىسقا يە ماماندىقتارعا بەيىمدەپ، كاسىبي دياگنوستيكا جۇرگىزۋ ماڭىزدى. بۇل وقىتۋدىڭ جەكە باعدارىن جاساۋعا جانە وقۋشى مەن ءمۇعالىمنىڭ وقۋ جۇكتەمەسىن ازايتۋعا مۇمكىندىك بەرەدى» دەپ، ناقتى مىندەتتەر جۇكتەگەنى بەلگىلى. بۇل باعىتتا جامبىل وبلىسىندا ناقتى ناتيجەلەر بار.
اعىمداعى جىلعى رەسپۋبليكالىق وليمپيادا قورىتىندىسى بويىنشا «ەڭ ۇزدىك وليمپيادا مەكتەبى» اتاعىنا وبلىستىق مامانداندىرىلعان ەر بالالارعا ارنالعان «ءبىلىم-يننوۆاسيا» مەكتەپ-ينتەرناتى (10 جىل قاتارىنان)، وبلىستىق ايشا ءبيبى اتىنداعى مامانداندىرىلعان قىز بالالارعا ارنالعان «ءبىلىم-يننوۆاسيا» مەكتەپ-ينتەرناتى، وبلىستىق مامانداندىرىلعان دارىندى بالالارعا ارنالعان «دارىن» مەكتەپ-ينتەرناتى، تاراز قالاسىنداعى №40 گيمنازيا، №45 گيمنازيا جانە №32 ورتا مەكتەپ يە بولدى. 103 وقۋشى حالىقارالىق، رەسپۋبليكالىق شىعارماشىلىق بايقاۋلارى مەن سپورت جارىستارىنىڭ جەڭىمپازدارى اتاندى،-دەيدى ر.تۇرماحانبەتوۆا.
جامبىلدىق وقۋشىلاردىڭ ۇلتتىق ءبىرىڭعاي تەستىلەۋگە دايىندىعى دا جاقسى.
– قازىرگى ۋاقىتتا 9-11-سىنىپتار قورىتىندى اتتەستاسياعا دايىندالۋدا. اتتەستات الۋ ءۇشىن تاپسىرىلاتىن بۇل ەمتيحان 9-سىنىپتاردا 27 مامىر مەن 6 ماۋسىم، 11-سىنىپتاردا 27 مامىر-7 ماۋسىم ارالىعىندا وتەدى. بۇل جىلى 328 مەكتەپ بىتىرۋشىلەرىمىز «التىن بەلگىگە»، 245ء-ى «ۇزدىك اتتەستاتقا» ۇمىتكەر بولىپ وتىر.
ال، ۇلتتىق ءبىرىڭعاي تەستىلەۋگە كەلسەك، بيىل ايتارلىقتاي وزگەشەلىك جوق. بىلتىرعىداي فورماتتا 2 بلوكتا وتەتىن بولادى. بۇرىن ۇبت تاپسىراتىن پۋنكتكە سىناق تاپسىرۋشىلاردى جەرگىلىكتى اتقارۋشى ورگان جەتكىزىپ، تاماقتاندىرۋ جاعىن ۇيىمداستىراتىن. بيىل ونداي بولمايدى. ق ر ءبىلىم جانە عىلىم مينيسترلىگى ەنگىزگەن وزگەرىستەرگە سايكەس، ۇبت جوعارى وقۋ ورىندارىنا ءتۇسۋ ءۇشىن تاپسىرىلادى، سوندىقتان اتا-انالار بالالارىن وزدەرى جەتكىزەدى. بۇل جونىندە اتا-انالار اراسىندا ءتۇسىندىرۋ جۇمىستارىن جۇرگىزىپ جاتىرمىز. بيىل ۇبت قاڭتار ايىنان باستاپ 4 رەت وتكىزىلۋدە. سونىڭ ىشىندە ماۋسىمداعى سىناق جوعارى وقۋ ورنىنا مەملەكەتتىك گرانتپەن ءتۇسۋ ءۇشىن تاپسىرىلسا، وزگەسى اقىلى نەگىزدە وقۋ ءۇشىن وتكىزىلمەك. تاعى ءبىر ايتا كەتەرلىك جايت – كوللەدج بىتىرۋشىلەرى كەشەندى تەستتى بولەك تاپسىرماي، سىناقتان 11-سىنىپتارمەن بىرگە وتەدى. ياعني، بۇرىنعىداي كەشەندى تەستىلەۋ دەگەن بولمايدى. مەكتەپ، كوللەدج بىتىرۋشىلەر دە جانە بىلتىر تەستىلەۋدەن وتە الماي، بيىل تاعى تاپسىرۋعا نيەتتىلەر دە سىناقتى بىرگە تاپسىرادى. بارىنە بىردەي تاپسىرما بەرىلىپ، بىرگە تاپسىرىلاتىن بۇل سىناق 20 ماۋسىم مەن 5 شىلدە ارالىعىندا ۇيىمداستىرىلادى. بۇل تەك مەملەكەتتىك گرانتتان ۇمىتتىلەرگە ارنالعان،-دەيدى باسقارما باسشىسى.
باقىت جالعاس
