جاڭارتىلعان زاۋىت 82 ادامدى جۇمىسپەن قامتىماق

العاشقىدا كەشەندى يگەرۋ ماقساتىندا «BIAS TECH» ج ش س جۇمىس جاسادى. زاۋىت 120 ادامدى جۇمىسپەن قامتىپ، 125 مىڭ توننا گيپس شىعارعان. الايدا، 5 جىل بۇرىن قارجىلىق قيىندىقتارعا بايلانىستى ءوندىرىس توقتاعان بولاتىن.
كاسىپورىننىڭ بۇگىنگى تىنىس-تىرشىلىگىمەن تانىسقان وبلىس اكىمىنىڭ ورىنباسارى نۇرلان تاۋبايەۆ زاۋىتتى ارالاپ جاسالىپ جاتقان جۇمىسقا وڭ باعاسىن بەردى.
- بۇگىن ءبارىمىز ءۇشىن دە ۇلكەن قۋانىش. بەس جىلدان بەرى توقتاپ تۇرعان قۇرعاق قۇرىلىس قوسپالار زاۋىتى ىسكە كىرىستى. زاۋىت تولىق جاڭارتىلىپ، ەسكى قۇرال-جابدىقتار اۋىستىرىلدى. قازىرگى تاڭدا زاۋىت 80-نەن استام ادامدى جۇمىسپەن قامتىپ وتىر. زاۋىت يندەر اۋدانىنىڭ ەكونوميكاسىن دامىتۋعا ءوز ۇلەسىن قوساتىنىنا، سونداي-اق، مامانداردىڭ كاسىبيلىگى مەن تاجىريبەسىنىڭ ارقاسىندا ءونىمنىڭ الەمدىك تالاپتارعا ساي بولاتىنىنا سەنىمدىمىز، - دەدى نۇرلان تاۋبايەۆ.
وتكەن جىلدىڭ قىركۇيەگىندە «ازياكرەديتبانكى» جانە «Fincraft Resources» اكسيونەرلىك قوعامى جالعا الۋ ارقىلى ساتىپ الۋ كەلىسىم-شارتىن جاساقتادى. سوعان سايكەس، «Fincraft Resources» كومپانياسىنىڭ سەرىكتەسى «اقتاۋ بيتۋم» ەنشىلەسى جىل باسىندا زاۋىتتى وڭالتۋدى قولعا الدى. ەسكى تەحنيكالاردى جاڭارتتى. بىلىكتى مامانداردى تارتىپ، جۇمىستى جۇيەگە كەلتىردى. سونىڭ ناتيجەسىندە زاۋىتتىڭ 120 مىڭ توننا گيپس شىعاراتىن مۇمكىندىگى بار.
ء-وندىرىس ورنىنان 30 شاقىرىم جەردە گيپس وندىرەتىن جانە ۇساقتاپ سۇرىپتايتىن كەشەن جۇمىس جاسايدى. بۇل جەردەن 0 – 300 فراكسيالى گيپس تاسىن الۋعا بولادى. سونىمەن قاتار، زاۋىت جەكە تەمىر جول تۇيىعىمەن قامتاماسىز ەتىلگەن. وسىنىڭ بارلىعى ساپالى ءونىمدى تۇتىنۋشىعا كەدەرگىسىز جەتكىزۋگە مۇمكىندىك بەرەدى،- دەدى «اقتاۋ بيتۋم» قۇرعاق قوسپا زاۋىتىنىڭ قارجى جونىندەگى ديرەكتورى دامير مۋسين.
ايتا كەتەيىك، زاۋىت "دامۋ" كاسىپكەرلىكتى دامىتۋ قورى" جانە قدب-ليزينگ" اق – نان قارجىلاي كومەك العان.