ەكى ەل اراسىنداعى قالىپتاسقان دوستىقتى ىلگەرىلەتۋ، ارىپتەستىك بايلانىستى نىعايتۋ ماقساتىندا قازاقستاننىڭ وزبەكستانداعى جىلىنا وراي جامبىل وبلىسىنان ءبىر توپ مادەني دەلەگاسيا وزبەكستان رەسپۋبليكاسىنىڭ جيزاق وبلىسىنا باردى. ارنايى بەكىتىلگەن باعدارلاماعا سايكەس، وڭىرلىك ونەر يەلەرىنىڭ كەزەكتى گالا كونسەرتى جيزاق وبلىستىق مۋزىكالىق دراما تەاترىندا ءوتتى. ساحناعا جامبىل وبلىسى اكىمدىگى مادەنيەت، ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىبايەۆ پەن جيزاق وبلىسى اكىمىنىڭ ورىنباسارى ازيزبەك ەگامبەردييەۆ، جيزاق وبلىستىق مادەنيەت باسقارماسىنىڭ باسشىسى كامول فاحرودوۆ باۋىرلاس ەكى ەل اراسىنداعى جۇزەگە اسىپ جاتقان يگى ءىس-شارالار عاسىرلار بويى ۇزىلمەي كەلە جاتقان مادەني بايلانىستى ودان ءارى نىعايتا تۇسەتىنىنە سەنىم بىلدىرە وتىرىپ، جامبىلدىق دەلەگاسياعا قاسيەتتى مەككە قالاسى مەن وزبەكستاننىڭ عاجايىپ تابيعاتى سۋرەتتەلگەن ساعاتتارىن سىيعا تارتتى. ءوز كەزەگىندە اۋليەاتالىق دەلەگاسيا دا جامبىل وبلىسى اكىمدىگىنىڭ اتىنان وبلىس شەبەرلەرىنىڭ قولىنان شىققان جىر الىبى جامبىل جابايەۆتىڭ بەينەسى ورنەكتەلگەن كىلەمشە جانە «كونە تاراز» كارتيناسىن تابىس ەتتى.
جامبىل وبلىسىنان بارعان كەنەن ازىربايەۆ اتىنداعى جامبىل وبلىستىق فيلارمونياسىنىڭ «الاتاۋ» فولكلورلىق ءانسامبلى مەن سارىسۋ اۋداندىق «ايجان قىز» حالىقتىق بي ءانسامبلى جيزاق جۇرتشىلىعىنا جەرگىلىكتى جانە قازاقستان كومپوزيتورلارىنىڭ كۇيلەرى مەن اسەم اندەرىن ۇسىنسا، ايتىسكەر اقىن، رەسپۋبليكالىق اقىندار مەن تەرمەشىلەر قوعامىنىڭ مۇشەسى ديدار باسىقارايەۆ باۋىرلاس وزبەك ەلىنە قازاقتىڭ قاسيەتتى قارا دومبىراسىمەن ارناۋىن ايتىپ، كورەرمەننىڭ كوڭىلىنەن شىقتى. سونىمەن قاتار، كەنەن ازىربايەۆ اتىنداعى جامبىل وبلىستىق فيلارمونياسىنىڭ ءانشىسى، ق ر مادەنيەت سالاسىنىڭ ۇزدىگى وڭال ازاماتوۆا وزبەك حالقىنىڭ تانىمال «كەتما» ءانىن شىرقاپ، كوپشىلىكتىڭ كوڭىلىن كوتەردى.
دوستىق ساپارى بارىسىندا جۋالى اۋداندىق حالىق تەاترى باقىت بەدەلحاننىڭ «تاعدىر تاقتاسى» اتتى ءاسانالى ءاشىموۆتىڭ ءومىر تاريحىنا قۇرىلعان پوەتيكالىق دراماسىن ۇسىندى. قويىلىمعا ءتانتى بولعان حالىق قول شاپالاقتاپ، ءوز ريزاشىلىقتارىن ءبىلدىردى.
سونىمەن قاتار، قازاقستان دەلەگاسياسى جيزاق وبلىسىنىڭ تاريحي-مادەني ورىندارىن تاماشالادى. ورتالىق ازياداعى ەڭ ءىرى جانە كونە شاھار، ءارى جىبەك جولى بويىندا تۇرعان يۋنەسكو-نىڭ الەمدىك مۇرالار تىزىمىنە ەنگىزىلگەن سامارقاند قالاسىندا ورنالاسقان «رەگيستان» الاڭى، ءامىر تەمىر مەن بيبي حانۋم كەسەنەلەرى، مىرزا ۇلىقبەك وبسەرۆاتورياسى، «شاحين-زيندا» جانە «حازىرەت قىزىر» مەموريالدى كەشەنىنە جانە تاعى دا باسقا ەسكەرتكىشتەرگە ەكسكۋرسيا جاسادى.
دۋلات ايتباي
